دڵه‌ گه‌وره‌که‌ی تێکۆشه‌ر'' فاتح ره‌سوڵ '' وه‌ستا.

1931 ــ 2008

فـه‌هـد گـرده‌وانـی

سیاسه‌تمه‌داری تێکۆشه‌ر و نووسه‌ر هاوڕێ فاتح ره‌سول ، سه‌ر له‌به‌یانی ئه‌مڕۆ رێکه‌وتی 23/7/2008 کۆچی دوایی کرد . چه‌ند رۆژ له‌مه‌وبه‌ر به‌ فرۆکه‌ی تایبه‌تی فریاگوزاری سوێد ، کاک فاتح ره‌سول له‌ نه‌خۆشخانه‌ی هه‌ولێر  گه‌یاندرایه‌وه‌‌ نه‌خۆشخانه‌ی [سه‌نتیوڕان]ی ستۆکهۆڵم . ئه‌وه‌ی له‌توانای دوکتۆره‌کان بوو بۆ درێژکردنه‌وه‌ی ژیانی کاک فاتیح ره‌سول و چاکردنه‌وه‌ی دڵی کرا ، به‌ڵام به‌داخه‌وه‌ سه‌ر له‌به‌یانی ئه‌مڕۆ دڵه‌ گه‌وره‌که‌ی ئه‌و تێکۆشه‌ره‌ له‌ لێدان که‌وت و ماڵئاوایی له‌ {هاوسه‌ری ژیانی دایکی ئاسۆس و تاڤگه‌ و ته‌لار و ئاسۆس و هۆگر و نزار و ئاراس } و هاوڕێ یان و که‌سه‌وکار و دۆستانی کرد . نووسه‌ر و تێکۆشه‌ر کاک فاتیح له‌ساڵی 1931 له‌شاری کۆیه‌ له‌ بنه‌ماڵه‌یه‌کی کاسبکار له‌دایک بووه‌ و له‌ساڵی 1938 ده‌ستی کردووه‌ به‌ خوێندن له‌ قوتابخانه‌ .هه‌ر له‌ سه‌رده‌می لاوی دا به‌شداری کاری سیاسی کردووه‌ و وه‌کو ئه‌ندامێکی چاڵاکی حیزبی شیوعی عێراق کاری کردووه‌ ‌ . له‌ساڵی 1947 بۆ یه‌که‌مجار له‌به‌ر به‌رگری کردن له‌ بارزانی یه‌کان به‌ساڵێک زیندانی حوکم درا . له‌ کۆتایی 1960 دا بوو به‌ ئه‌ندامی لێژنه‌ی هه‌رێمی کوردستانی پارتیی کۆمۆنۆنیستی عێراق و له‌ 1973 شدا تا کۆنگره‌ی چواره‌می پارتیی کۆمۆنیستی عێراق به‌ ئه‌ندامی کۆمیته‌ی مه‌رکه‌زی هه‌ڵبژێردرا . له‌ 1986 تا 1989 له‌ سوریا مایه‌وه‌ و له‌دوای 1990 له‌گه‌ڵ هاوسه‌ره‌که‌ی که‌وتنه‌ سوێد . 

خاوه‌نی چوار کوڕ و دوو کیژه‌ . باوکی هونه‌رمه‌ندی گۆرانیبێژ {ئاراس} ه‌ .

له‌ بڵاوکراوه‌کانی نووسه‌ر فاتیح ره‌سول :

1. ده‌نگدانه‌وه‌ی ئاشتی 1954 له‌ژێر ناوی دلێر ئه‌حمه‌د پۆلیس له‌ چاپخانه‌ی دئجله‌ ده‌ستی به‌سه‌ر داگرت .

2. توتن و توتنه‌وانی له‌ کوردستانی عێراق 1958 .

3. هه‌ندێ رووداوی گرنگی 1979 ــ چه‌ند لاپه‌ڕه‌یه‌ک له‌ مێژووی گه‌لی کورد به‌رگی یه‌که‌م 1991 .

4. شه‌ڕه‌کانی براکوژی 1980 ــ 1981 چه‌ند لاپه‌ڕره‌یه‌ک له‌ مێژووی خه‌باتی گه‌لی کورد به‌رگی دووه‌م 1992 .

5. کۆمه‌لێک رووداوی ساڵانی 1981 ــ 1990 کاره‌ساتی پشت ئاشانی 1983 و به‌ره‌ی کوردستانی، چه‌ند لاپه‌ڕه‌یه‌ک له‌ مێژووی خه‌باتی گه‌لی کورد    به‌رگی سێیه‌م .

6. له‌ کاروانێکی دوورودرێژددا ، ئه‌زمون و تاقیکردنه‌وه‌ی په‌نجا ساڵ 1997 .

7. بنچینه‌ی مێژووی بیرۆکه‌ی چه‌پ له‌ کوردستاندا  2001 .

8. کتێبی مشتێک له‌ پاشماوه‌ی خه‌رمان هه‌ندێک گۆتار و نووسین و نامه‌ چاپی یه‌که‌م هه‌ولێر 2007 .

9. له‌ پێناو ده‌سه‌ڵاتدا چاپی یه‌که‌م هه‌ولێر 2007 .

کاک فاتح ده‌گه‌ڕێته‌وه‌ باوه‌شی نیشتمان ... رۆژی دووشه‌مه‌ 28/7/2008 ته‌رمه‌ پیرۆزه‌که‌ی ڕه‌وانه‌ ده‌کرێته‌وه‌ بۆ کوردستان و له‌شاری کۆیه‌ ، شاری حاجی قادر و بناری هه‌یبه‌ت سوڵتان و باواجی به‌ خاک ده‌سپێردرێت . چه‌پکه‌گوڵ بۆ سه‌ر گۆڕی پیرۆزی هاوڕێم کاک فاتح ره‌سول .

 23/7/2008

ستۆکهۆڵم