دواهه‌مین شه‌و .           

   به‌ندی عه‌لی                 

ئه‌م دواشه‌وی سه‌ری ساڵه‌

زه‌نگیانه‌کانی گه‌ردانه‌ پچڕاوه‌که‌ی           

گه‌ردنی عومرێکی شه‌که‌ت

ده‌نکێکی که‌ی لێ وون ئه‌بێ و

پێکی روحی ئاسمانیش

 وورده‌ به‌فری ماڵئاوایی

 له‌ووشکه‌ ساڵێکی تری

 بێ به‌ره‌که‌ت

 ئه‌م دواشه‌وی سه‌ری ساڵه‌

 شه‌قامه‌کان که‌لله‌مه‌ستن

 به‌باده‌ی خوێن

 خوێنی گوڵه‌ کوژراوه‌کانی ئه‌وین و

 گیانه‌ هه‌ڵوه‌ریوه‌کانی ژن و

 ڕه‌زی چاوه‌ گوشراوه‌کانی

 ئاره‌زوو

 ئاره‌زووی زام بۆ مه‌رهه‌م و

 ئاره‌زووی دڵ

 بۆ خه‌م ڕه‌وێن

 ئه‌م دواشه‌وی سه‌ری ساڵه‌

دوا جگه‌ره‌ی تاڵی حه‌سره‌ت

 ئه‌کێشم و

 له‌دوا پێکی خه‌ستی حوزنا

 نغرۆ ئه‌بم

 دوا چرکه‌سات

 دوا هه‌ناسه‌ی ئه‌م شه‌و ئه‌ده‌م

 به‌دواهه‌مین نه‌وره‌سی خه‌و

 خه‌وێکی قوڵ

 قوڵتر له‌هه‌ناوی که‌ون و

 که‌نده‌ڵانی ئازاره‌کان

 به‌ئومێدی ساڵێکی نوێ و

دیده‌نی که‌ناری ئاوات.