٣١\٧\٢٠١٥

    دزەکان.

ناڵە حەسەن

دزەکان دەتوانن ئاراستەی با و
سروودەکانی گەردەلوول و گۆرانییەکانی ڕووبار بگۆڕن
دەتوانن ڕەنگەکانی پەلکەزێڕینە و لەنجەکانی باران و
دیزایینی درەختەکان و ئاییندەی سروشت بگۆڕن
دەتوانن بەسەر بازگەکاندا بازبدەن و سنوورەکان ببڕن
دزەکان لە ئاگر نزیک و لە خۆرەتاو دوور
لە ژیان نزیک و لە عەشق دوور
دزەکان لە بەهەشتەکان لەگەڵ حۆرییەکان دەخەون
لە تیاترۆخانەکان لەگەڵ لەشفرۆشەکان سەما دەکەن
لە نێو کۆشکەکانیش لەگەڵ شاژنەکانییان
زەردەخەنە و ماچ و پێکەکانییان دەگۆڕنەوە
دزەکان ناڕۆن بۆ دۆزەخ لە ئێمە سەروەرترن
ئەبەدییەت ماڵی ئەوانە و لە مردن بەهێزترن

                       مرۆڤی لە ئێمە چێترن دزەکان.

دزەکان لەسەر ئەستێرەکانن
لەسەر شەقامەکان و
لەسەر کورسییەکان و
لەسەر سەکۆ و شانۆکانن
دزەکان لە نێو کۆشکەکانن
لە نێو باڵەخانەکان و
لە نێو پەرستگە و بەهەشتەکان و
لە نێو کتێب و ئەفسانەکانن

                       لە هەموو شوێنێکن دزەکان.

دزەکان لە نێو بەیانییەکانن
لە نێو شەوەکان و
لە نێو ڕۆژەکان و هەفتەکان و مانگەکان و
لە نێو ساڵەکان و سەدەکان و
لە نێو وەرزەکانن

                       لە نێو هەموو زەمەن و کاتێکن دزەکان.

دزەکان بە جلی سپییەوە
دەچن بۆ ماڵی خودا
بە دەوری بەردە ڕەشەکانەوە دەسووڕێنەوە
یان لەسەر کورسی شاهانەوە
بە جلی ڕەشەوە
لە نێو کەژاوە سپییەکانەوە
بە بوخچەی شەهوەتەکانییان و
بە دەوری خەونەکانیان دەسووڕێنەوە
دزەکان جلی ڕەنگاورەنگ دەپۆشن
چاویلکەی ڕەنگاورەنگ دەکەنە چاو
تەزبێحی ڕەنگاورەنگ بادەدەن
دزەکان لەنێو ئاونە ئاڵتوونییەکان
باڵە وشکهەڵاتووەکانی پەپوولەکان و
گەڵا وەریوەکانی ئومێدەکان و
تووتنە بۆندارەکانییان بەیەکەوە دەکوتن
توند توند دەیانکوتن
گوڵە ڕەنگاوڕەنکانییان بە خوێن ئاودەدەن
بە قەڵەمەکانیش ئاگردانەکانییان گەشدەکەنەوە
ماڵ و ڤێلاکانییان گەرم ڕادەگرن

                       لە ئێمە ناسکتر و لە جنسی فریشتەکانن دزەکان.

دزەکان سوپایەک لە جەلادییان هەیە
سوپایەک لە دەرگەوان و
سوپایەک لە نووسەر و لە زانا و دانا
سوپایەک لە شێخ و مەلا و کوێخا و گەدا
سوپایەک لە فەلەکناس و دەروونناس و ڕێگاناس
دزەکان کتێب ناخوێننەوە و
گوێ لە حیکمەتە ساویلکەییەکانی فەلسەفە و
قسەقۆڕەکانی مەعریفە ڕاناگرن
لەگەڵ ئەوەش جارجارە
سەیری فیلمە زایەندییەکان و فیلمە پڕ ئاکشن و کاوبۆییەکان دەکەن
یان گوی لە حیکایەت و ئەفسانەی پیاوە مەزنەکان ڕادەگرن
                       لە ئێمە دانا و بە مەعریفەترن و دزەکان.

    ئەستێرەی سەر  گومبەزی دزەکان.
هەڵسە لە خەو ئەی سەرۆک
بەیانییت باش ئەی سەرۆک
هەموو کاتێکت باش ئەی سەرۆک
هەڵسە لە خەو و توند توند
توند توند توند
توند توند توند توند توند
دەست بە تفەنگەکەت و
دەست بە کورسییەکەت و
دەست بە کلیلی خەزێنەکەتەوە بگرە / ئەی سەرۆک.

ئایاری ٢٠١٥

ماڵپه‌ڕی ناڵه‌ حه‌سه‌ن