|
٢١\١١\٢٠٢٤
دۆزەخی ئەوین.
تاڤگە
سابیر
دەمەو ئێوارەیەکی درەنگ ئاشنای
گیانی یەکتر بووین و
چووینە ناو زریان و باو گەردەلوولەکانەوە
من بە دەستێکی
بۆش و دڵێکی خومارەوە
من بە گریانێکی تۆراو
و ئەوینێکی پووچەوە
ئەو بە بێدەنگییەکی قەشەنگ و تەنیاییەکی گەورەوە
دڵێکی بریندارەوە
چووینە ناو دڵی ئێوارەیەکانەوە
یەکەمین لاپەڕەمان ھەڵدایەوە
گەرچی یەکەم جار قسەیەکی ماندوومان پێبوو بۆ ژیان و
دیلی پرسیار و ئەوینێکی نەناسراو بووین
بەڵام ئەو لە قووڵاییەکانی
گیانیدا
زەردەخەنەیەکی سادە و
ئەوینێکی سپی ھەبوو
بۆ شەڕی مەرگ و سەمای ئێوارەکان
بەھەشتێکی ھەبوو بۆ پەیوەندیی
لەگەڵ ئاو و خوا و ئاسمان و ئەستێرەکان
چرایەکی داگیرساندبوو لە دڵی کەناردا
چرایەک
پێیوابوو ھەمیشە ئەدرەوشێتەوە
لە ناو دڵی زستانە سارد و نسرمەکانیشدا کز ئەسوتێ و
بە ناو باران و لافاو
و باهۆزەکانیشدا گەر تێپەڕێ
رێ وون ناکا
ئەو ھەمیشە بۆنی شەوەکانی دەکرد
و
لە رووتبونەوەیەکی
هەمیشەیی دەدوا
رووتبونەوەی ژێر باران و
زریانەکان
ھەمیشە وەك زستانێکی تەزیوو
لە دڵی شەوەکاندا دەنوست و
ھەناسەکانی بۆنی بەفریکی تازەیان لێدەھات
کەچی لە کانار ئێوارەیەکی غەمگینیشدا وونبوو
ئای چ سەختە تەنیایی
تەنیاییەکی درێژخایەنی دوای پێکەوەبوونێکی کورت
چ کۆچێکی کوشندەیە
بۆنی ئاو و خۆڕووتکردنەوە لە ئێوارەدا
چونکە ژیانیش جاروبار سەرمەستیی خۆی شۆڕدەکاتەوە و
دەیخاتە باوەشی ئێوارەکانەوە بۆ مردن
ئێوارانی دابڕان و ونبوونی
تاتایی
وەك کۆچی ئێوارانی تۆ..
وەك دابڕانی تۆ لە
هۆزان و لە ئەوین و لە منداڵیی
دوای تۆ لە ئێوارەیەکدا کۆبووینەوە
تێگەیشتین لە ئەفسوونی ژیان و
راستیی مردن
لە گومانی ئێوارەکان و بەھەشتی پووچی ناو
پەرتووکان
تێگەیشتین
لە دۆزەخی ئەوین و پیاسەی
پووچ.
ماڵپەڕی تاڤگە سابیر
|
