|
دووبارە
پێداچوونه‌وه به کەیسى هەڵەبجە
ره‌هه‌ندێکی سیاسى
بەعسیگه‌رانەى هەیە.
بێستون حەسەن
تێپەڕ بوونى زیاتر لە بیست ساڵ لە نەهامەتی و کەڵەکەبوونى خەم و ئازارە
نەبڕاوەکانى خەڵکى هەڵەبجە و پاشماوەى دانیشتوانەکەى بەس نییە بۆ ئەوەى
هەموو دونیا لەوە بەئاگا بێت کە شارێک هەیە و پڕاو پڕ واتا مرۆییه‌کانی
لەخۆدا بەرجەستە کردووە و نوقمی کۆڵێک ناعەدالەتى بەها ره‌وشتییه‌کانى
مرۆڤایەتى بووەتەوە و کەم کەس هەیە ڕاستییەکانى ئەم شارە بریندارە
نەزانێ و نەچووبێتە ناو قوڵایی چیرۆکەکانیەوە. ئەوەتا سەرانى بەعسى
ڕووخاو و پاشماوەى ڕژێمە لەناوچووەکەى سەدام بە بەرگێکى تر و بەجۆرێک
لەجۆرەکان جێ دەستیان دیارە لە ئاژاوە نانەوە و پەکخستنى دۆزى ڕەواى
کورد و لەناو هەموشیاندا دۆسێى شەهیدکردنى شارى هەڵەبجە و دواخستن و
داواکردن بۆ دووبارە پیاچوونەوەى هەموو ئەو دیکۆمێنت و شایەتیانەى کە
هەیە لەسەر کیمیابارانکردنى هەڵەبجە لەلایەن سەرانى ڕژێمى بەعسەوە .
ئێمە وەک هەڵەبجەییەک و کەس و کارى سیانزە شەهیدى یەک بنەماڵە بەتوندى
هەموو ئەو هەوڵ و کارانە مەحکوم و ڕیسوا دەکەین کە بۆ وەلاوەنانى کەیسى
هەڵەبجەو ئەو هەموو قوربانیە دەدرێ کە میللەتى کوردى بە سەرانسەرى
دەوڵەتانى دونیا ناساند و مەسەلەى خۆناساندن و هەبوونى قه‌واره‌ی
نەتەوەیی بەرانبەر هەموو نەتەوەکانى ترى دونیاى هێنایە ئاقارێک کە
تەواوى مافى مرۆڤى نێو دەوڵەتى لە هەموو کارەسات و گۆڕانکارییە
نەوعییەکانى ئەمڕۆ ئاگادارببێت و وا بکات لەو ڕێیەوە مەسەلەى بە
جینۆساید ناساندنى ئەنفال و کیمابارانکردنیش بخرێتە نێوەندى باس و
لێکۆڵینەوە و تەنانەت لەزۆر ڕووەوە کاریش کرا بۆ یەکلایی کردنەوەى ئەو
مەسەلەیە .
بۆیە هەموو هەوڵێکى وەک ئەم هەوڵەى کە دەدرێت بۆ دواخستن و پەراوێز
خستنى مەسەلەیەکى گەورەى پڕبایەخى وەک کەیسى هەڵەبجە ، بەتوندى
بەڕوویدا دەوەستینەوە و هەموو لایەنە پەیوەند دارەکانیش ئاگادار
دەکەینەوە کە ڕازیبوون و بێدەنگ بوون لەمەڕ جۆرە کردارێکى وەک ئەمەى
ئێستە لاواز کردن و پەک خستنى هەنگاوەکانى سیاسەتى کوردە بەرانبەر
هەموو دەوڵەتانى ڕۆژهەڵاتى ناوەڕاست و لەلایەکى تریشەوە بە فیڕۆدانى
خوێنى هەموو ئەو شەهیدانەیە کە ساڵانێکە بۆ ئازادى و ڕزگارى میللەتى
کورد داویانە.
پێداچوونه‌وه کەیسى هەڵەبجە ئەوەندەى ره‌هه‌ندێکی سیاسى لە پشتە بەو
هێندەیە دەلالەت نییە لە پاکى و پیرۆزگرتنى دادوەرانەى نێو حەرەمى
بیناى مەحکەمە . لەبەر ئەوە هیچ پاساوێک نیە بۆ دەرخستەى ئەم مەسەلەیە
و هەموو لایەک لەو دیوەى ترى ئەم بارودۆخە ئاگادارن کە بەهەر شێوەیەک
بێت و هەموو کات نەیارانى کورد و خەڵکى ستەم لێکراوى هەڵەبجە ویستویانە
ئەو دادگایی کردنەى کە پەیوەستە بە کیمیاباران کردنى شارى هەڵەبجە دوا
بخرێت و ناوە ناوە و بەهەرهۆیەک بووبێت لە دەمێکەوە خستوویانەتە دەمێکى
تر و تا کار گەیشتە ئەوەى سەرلەنوێ بچنەوە بە هەموو مەلەفەکانى تایبەت
بە کەیسى هەڵەبجەدا.
بۆیە دوا خاڵى سوور و دوا پەیام ئاڕاستەى لایەنى پەیوەند دار و حکومەتى
ناوەندى بەغداد ئەکەینەوە کە ئەگەر ئەم تەحقیق کردنە نایاساییەى کە
بڕیارى لێدراوە ، بەهەر جۆرێک لەجۆرەکان بخرێتە بابى بەتاڵبوونەوە و
قبوڵ نەکردنى ، ئەوا ئێمە دەیان و سەدان ڕێگە هەیە بیگرینە بەر تا ڕێ
لەو کارانە بگرین و چیتر ڕێنەدەین ناهەقى و نا عەدالەتى بەرانبەر
دانیشتوانى هەڵەبجە و کەیسى هەڵەبجە بکرێت .
دەکرا دەسەڵاتى سیاسى کوردیش بەتوندى بەرپرچى ئەو جۆرە بڕیارەیان
بدایەتەوە کە دڵنیان ئاکامەکەى لە دژى میللەتى کورد و خەڵکى ستەم
لێکراوى هەڵەبجە تەواو دەبێت ، هەق وایە قەڵەم بەدەستان و نوسەرانى
خەمخۆر بە دۆزى سیاسى کورد و ناوچەکە چیتر مه‌ره‌ەکەبى بێدەنگى بڕژن و
تەواوى میدیاکانى دونیاى لێ ئاگاداربکەنەوە بۆ ئەوەى مەسەلەیەکى گەورەى
وەک هەڵەبجە نەخرێتە ئەودیو دەرگا داخراوەکانى مێژووەوە و قۆناغێکى نوێ
و حوکمێکى عادیلانەى سەراپا گیر هەموو کون و قوژبنێکى ئەم جیهانە
بگرێتەوە و ناعادیلانى هەر بڕیارێکیش بە سزاى یاسایی گەل و وڵات
بگەیەنرێت .
Bestoon1617@yahoo.com
|
