١٢\٣\٢٠٢٢

    ئەفسووس لەوێش!

دارا خونچە

(پێشکێشە بە و ژن پیاوە ئازاد و یەکسانییخوازانەی

کە بە هۆی نەبوونی یەکسانیی رەگەزیی دەچەوسێنەوە).

خۆ هێشتا دێوجامە ئاڵوواڵایەکان
ماچ ئەشکەنجە دەدەن و
        رامووسانیش لە برینان دەگرن!
دەی هێشتاکەش
لە سەنگەری هاوسەرگیریی گیرۆدەین و
بە هاوشانی
ئەفسانەکانی ئاسمانان
    بانگخوازەکانی سەر زەوی
    ئەفسوونەکانی رمووزنی نێرەوزیی
مەژیی و بەژنی ''مێ و مێینەیی''
        لە پووڵ و پەڕۆ و پوولەکان
            لە زێڕ و زیو و تەنەکان
                         هەڵدەکێشین!
   ئەفسووس لەوێش
   لە دوڕ بەرەی بەرابەرییش
        بە ئەندازەی یەک موو کێمتر..
                          هەر وەتۆیە!
نا نا.. وەنییە؛
        ئەمن و ئەتوو و ئەو ئەوها نین
هەر ئەوانن؛

نێرەوزە میرزازادە پەتییەکانی دیوانانن
              لە ''قوز'' پتر هیچ نابینن!
     لێ ئەو ''ئەمن و ئەتوو و ئەو''ەش
                هێشتا فرچکمان نەگرتیە
              یاخود هێشتا
              هەر لە پشتی بابمانین و
              هێشتا لە دالک نەبووینە!
__________________________________________
ئەفسوون: پەرجوو، فرتوفێڵ، فرتوفێر.
رمووزن: دێوەزمە، مێردەزمە، دەعبایەکی ئەفسانەیی ترسناک.
نێرەوزیی: نێرینەیی پتر بە لایەنە زایندەییەکەی.
مەژیی: مێشک، ئاوەز.
دوڕ: هندوڕ، نێو، ناو.
کێمتر: کەمتر.
وەتۆ: ئاوا، ئەوها.
دالک: داک، دایک.

ماڵپه‌ڕی دارا خونچە