٦\٦\٢٠١٧

ئەمە سیاسەت نییە.

ئەرسەلان مەحمود  

موتڵەقخوازی"بێ‌ چەند و چۆنی" لەهەر شتێكدا بوونی هەبێت، ئیدی ئەو شتە ئەگەر ئاسمانی بێت یا ئەرزی، ماددی بێت یا مەعنەوەی، لەزیهنیەتدا بێت یا لەپراكتیكدا، هەر چییەك بێت دواجار سەرئەنجامەكەی ڕونە، بۆگەن دەكات.

وەها بكەرو هزرینێك ئەبەد لەسیاسەتدا جێگەی نابێتەوە،"سیاسەت بەمانا زانستییەكەی، سیاسەت بەمانا واقیعییەكەی" چونكە لەسیاسەتدا شتێك نییە بكەوێتە دەرەوەی نەشتەرگەركاری و شرۆڤەكاری و پرسیاركارییەوەو، بتوانێ‌ بەنەگۆڕی بمێنێتەوە، سیاسەت خود وێناكردنەوەو بەرهەمهێناوەی خودگەرایی نییە لەبازنە هێشوییە خێڵەكی و مەزهەبی تائیفیە داخراوەكاندا، جوینەوەی بانگەوازە بەسەرچووەكان و، مانەوەش نییە لەڕابردوە دورو نزیكەكاندا، سیاسەت زانستە، واقیعبینییە، هەڵێنجانەوەی ماناو، بەماناكردنەوەی بێماناییە لەڕاستیدا.

لەبەر ئەمە، ئەوەی ئەمڕۆ دۆخی كوردەواری لەخۆیدا گەناندووە، لیخناوی سیاسەت نییە لەڕاستیدا، بەرئەنجام و سەرئەنجامی هزرینێكە لەناخدا موتڵەقخوازو بەڕواڵەت سیاسەتگەرا، یەكڕەنگ و تاكڕەهەندگەرایی لەسیاسەتدا نییە، سیاسەت ناتوانێ بەردەوام یەكڕەنگ بێت، سیاسەت مۆڕاڵە، ئەمە بەمانا خۆرهەڵاتییەكەی نا، بەمانا خۆرئاواییەكەی، مۆڕاڵە وەك ئەوەی دەشێت، وەك ئەوەی دەكارێ‌ ئیزافە بخاتە سەر پێكهاتە خۆسەری و هەبوونە مرۆییەكە، وەك وەرگرتن و دانانەوە، ڕەنگدانە، ڕەنگڕێژی و ڕەنگبێژییە، نەك بەمانا موجەڕڕەدەكەی" یا هەموو یا هیچ " نەك بەمانا ئەفلاتوونییەكەی"پاوانی كوێخاو ئاغاو خێڵگەراو ئەرستۆكراتەكان بێت".

هەروەك چۆن ئەركی سیاسەتوانیش ئەوەیە سیاسەت بكاتە پردی پەیوەندی نێوان خەڵك و دەسەڵات و ئامرازی تێپەڕاندن و پەڕینەوەی قۆناغێك بەقۆناغێكی دی، نەك وەك ئەوەی لەكوردەواریدا دەگوزێ‌، لەلایەن سیاسەتوانەكانییەوە بكرێتە دیاردەیەك ئەوپەڕی ناپەسند، ئەگینا وەك ئەوەی بووە بەوێردی سەر زوبانی خەڵك و ئیدیعا دەكرێت، سیاسەت درۆزنی و درۆزانی نییە، درۆ ئەوەیە سیاسەتوانبیت لێرەو، هەڵگری جنسیە بیت لەوێ‌، ئەوەیە گەنجانی وڵات بەناوی بەرگریكاری و ڕزگاری نیشتمانی لێرە بدەی بەكوشت و، منداڵەكانی خۆیشت لەوسەری دونیا بەپارەی میللەت خەریكی خوێندن و ژیانكردن بن، درۆ ئەوە بەناوی سیاسەتەوە خەریك بەفەرهودكردنی سەرخان و ژێرخانی وڵاتەكەت بیت، ئەوەیە هۆكاری ئەو هەموو نەهامەتییە بگەڕێنیتەوە سەر گوایە نەشازی و نەگونجاوی دۆخە هەرێمایەتی و نێودەوڵەتییەكانەوەو داڕمانی نرخ و بەهای بازەكانی نەوت لەجیهاندا.

كەی ئەوە سیاسەتە: پارلمانت هەبێ‌ و عورفی حزبی ئەدای بكات، كەی ئەوە سیاسەتە: حكومەتت هەبێ‌ و هەژموونی خێڵگەرایی ئاڕاستەی بكات، كەی ئەوە سیاسەتە: هێزە سەربازی و ئەمنییەكانی وڵات، پێشمەرگە، لەبری نیشتمانی ڕەنگباری حزبی بكرێن، كەی ئەوە سیاسەتە: لەبری شەفافییەت هەڵلوشینت هەبێ‌، كەی ئەوە سیاسەتە: لەهەولێر شایی بێ‌ و لەسلێمانی شین، كەی ئەوە سیاسەتە: دوای ٢٧ ساڵ لەحوكمڕانێتی خۆجێیی، نەدەستورت هەبێ‌ و نەسیستمێكی ڕۆشنی حكومڕان، نەژیانت هەبێ‌ و نەویژدان، نەمافت هەبێ‌ و نەئازادی، ئەوەی هەتە نادیاربێ‌ و دیارێكت نەبێ‌!

سیاسەت و سیاسەتوانی كورد، دەنساڵە لەبری پێناسەكردنەوەی ئازادییە فەردی و گشتییەكان، لەبری بونیادنانەوەی سەرخان و ژێرخانی وڵات، لەبڕی هێنانە ئاراوەی فۆڕمێك ئەوپەڕی نوێ‌ و گونجاو لەبەڕێوەبردندا، لەبری كرانەوە بەڕوی خۆدا، بەڕوی دەرەوەدا، لەبری پەرەپێدانی مەدەنیەت و چەسپاندنی دیمۆكراسیەت، ئۆڵفەتیان بەمۆدیلاتی پۆشاك و سەفەرو سیاحەوە گرت، دەستیاندایە گۆڕانكاری لەڕەنگ و ڕۆخسارو سەیارەو تەیارەو ماڵەكانیاندا، بەڵام نەیانتوانی زەررەیەك لەناخی شاخاوی و خێڵەكیانەی خۆیان بگۆڕن، بەناوی بازاڕی ئازاداوە، بازاڕیان داگیركرد، بەناوی كەرتی تایبەتەوە بوونە خاوەنكارو كۆمپانی!!

لەڕاستیدا ئەمە سیاسەت نییە، هەناو ڕەشییە، ڕەنگە ئەو ڕەنگ ڕەشەی قاتەكانیشیان سەرچاوەكەی هەر لەو هەناو ڕەشیانەیانەوە گرتبێت، ڕەنگە بیانەوێ‌ هەر لەڕێگەی ئەم ڕەنگە ڕەشیەیانەوە ڕەنگەكانی دی بپەڕێنن.

ماڵپه‌ڕی ئه‌رسه‌لان مه‌حمود