٢٩\١\٢٠١١

ئەمڕۆ کونسوڵخانەی ئێران

بە دروشمی (ئەی کۆماری سێدارە، دەربچۆ لەم شارە) بەردباران کرا.

ئەمڕۆ کاتژمێر 2ی پاش نیوەڕۆی رۆژی شەمە 29/1/2011 بە ئامادەبوونی کۆمەڵێک پارت و گروپ و رێکخراوی سیاسی و کۆمەڵگای ەدەنی و کۆمەڵێک کەسایەتی سیاسی و رۆشنبیری لە شاری هەولێر لەبەردەم کونسوڵخانەی کۆماری ئیسلامی ئیران خۆپیشاندانێکی ئاشتیانە بەڕێوەچوو لەژێر دروشەکانی(ئەی کۆماری سێدارە... دەربچۆ لە شارە) کە لەلایەن رێکخراوی چاودێری کوردۆساید و ستاڤی گۆڤاری ئێوە و ناوەندی ئایندە بۆ پرسەکانی گەنج و رێکخراوی را بۆ پرسە نەتەوەییەکان رێکخرابوو، سەرەتای گەیشتن بە پێش کونسوڵخانە سەرجەم جامی تابڵۆکانی کونسوڵخانە کە وێنەکانی خومەینی و خاتەمی و ئەحەدی نەژاد و چالاکیەکانی کونسوڵخانەی تێدابوو لەلایەن خۆپیشاندەرانەوە شکێنران، پۆلیسی پاراستنی خۆپیشاندان دەست بەجێ گەیشتە بەردە کونسوڵخانە، دواتر وتاری خۆپیشاندانەکە لەلایەن شێرزاد عومەر سەرنووسەری گۆڤاری ئێوە خوێنرایەوە و دواتر لەلایەن هەڤاڵ نەژادەوە واژووی رێکخراو و پارتە بەشداربووەکان کۆکرایەوە و ئینجا گوتاری پارتەکانی کوردستان خوێنرایەوە، دواتر بە گوتنەوەی مارشی نەتەوەیی ئەی رەقیب و دەیان دروشمی وەک(ئێران تیرۆریستە، شەهیدان نامرن، ) جۆش و خرۆش کەوتە نێو خۆپیشاندەران و لە ئەنجام تەواوی کونسڵخانەکە بەرد باران کرا و سەرجەمی جام و پەنجەرەکانی تێکشکان و هیچ یەکێ لە کارمەندانی کونسوڵخانەش جورئەتی هاتنە دەرەوەی نەکرد، دیسانەوە بە گوتنەوەی دروشم کۆتایی بە خۆپیشاندانەکە هێنرا کە ماوەی کاتژمێرێک و نیوی خایاند، خۆپیشاندانەکە هیچ دەستگیرکردن و پشێوی و زیانی لێ نەکەوتەوە و زۆر بەسەرکەوتوویی بەڕێوەچوو، بەڵام بڕیاردرا لە 11ی مانگی شوباتی 2011 کە رۆژی دامەزراندنی کۆماری ئیسلامی ئێرانە و بڕیاروایە لە هەولێریش کونسوڵخانەی ئێران یادی ئەو رۆژە بکاتەوە و چالاکوانان و بەشداربوانی خۆپیشاندانەکە بڕیاریاندا لە رۆژە لێ نەگەڕێن ئەم یادە لە هەولێر بکرێتەوە بە ئەنجامدانی ناڕەزایی و خۆپیشاندان و کامپین سازبدرێت.

رێکخراوی چاودێری کوردۆساید

ستاڤی گۆڤاری ئێوە

ناوەندی ئایندە بۆ پرسەکانی گەنج

رێکخراوی را بۆ پرسە نەتەوەییەکان