٢٥\٩\٢٠١٤

ئەتاتورک کاتێک کە مرد تورکیای نەبردە ژێر گۆڕەوە،

بەڵام تا ئێستاش هەر کورد تیرۆر دەکا.

دەریا         

مێژووی عوسمانییەکان مێژووەکی دەوڵەمەندە لە چەندین سەدە لە خوێنڕشتن و شەر و وێرانکاریی وڵاتان، بە خوێن ئیمپراتۆرییەکی گەورەیان دروستکرد؛ کۆشک و قەڵای پتەویان لە سەر لاشەی مرۆڤە بێ گوناھەکان بنیات نا، تا نەمانی دەسەڵاتەکەیان ئەو مێژووەیان قیزوەنتر و خوێناوییتر و رەشتر دەبوو، زۆربەی خاکی یۆنانیان داگیر کرد و ئەوان دەسەڵاتدار و برا گەورە، نەتەوەکانی تر ژێردەستە و کۆیلە و چەوساوە.

دەسەڵاتداریی ئەردۆغان و کوشتنی سێ ژنە چالاکوانەکەی پەکەکە لە پاریس و هێرشی بەردەوام بۆ سەر پەکەکە و ئاوڕنەدانەوە لە ماڵوێرانەکان و بنەماڵەکانی کوژراوانی بوومەلەرزەی شاری (وان) و دروستکردنی داعش و پەلاماردانی کوردستان و... تەنانەت مێژووش ناتوانی ئاوڕ لەو ھەموو جەور و ستەمانەی ئەوان بداتەوە و تۆماریان بکا، تاوان و کردەوەکانیان ئەوەندە زۆر و گەورەن مێژوو لە ئاستیاندا شەرمەزار دەبی.

لێرەدا لەو روانگەیەوە روو دەکەینە رۆمانێک، کە دەرگایەکی بچووک لە جیهانە بەرفراوانەکەی عوسمانییەکان و ئایدیا و کردەوە و یاسا و فەرمانە نەزۆک و پەڕچۆیەکانی ئەوان دەکاتەوە، جیهانی رۆمان خۆی جیهانێکی ئاڵۆز و پڕ کێمەکێش و قووڵ و بەرفرەیە، جا رۆمانێک! بەر نەفرەتی جیهان بکەوێ، رۆماننووسی مەزن (یەشار کەمال) ھەمیشە لە چیڕۆک و رۆمانەکانی خۆی ئەو مێژووەمان بۆ دەگێڕێتەوە. ئەگەر سەیری رۆمانی (بڕوانە فورات خوێناوییە) بکەین دەبینین (عەلی پاشا) لە بەرامبەر (پۆیراز موسا) دەڵێ: (تۆ نەزانی ئەم عوسمانیە چەند فێڵباز و خوێنمژە. ئەو، بۆ بەپەنددانی دنیا قەڵا و منارەی دروستکردوون لە کەللەسەری مرۆڤەکان. نییە لە دونیا بۆ مرۆڤ دوژمنتر لەم عوسمانییە...).

داگیرکەرانی تورکیا لە چەند ساڵی رابردوودا بە هەزاران ملیار دۆلاریان لەو پێناوەدا خەرج کردوە بۆ سەرکوتکردن و لاوازکردنی جوولانەوەی کوردان بە تایبەتی ئەو کاتەی کە داوای سەربەخۆییان کرد، بە دەیان جار کڕنووشیان بۆ وڵاتانی بێگانە بردووە بۆ ئەوەی کورد بێ هیز بێ.

کە عوسمانییەکان لە کۆتایی سەدەی هەژدەدا کز و لاواز بوون ئەوروپییەکان پێیاندەگوتن ''پیاوە نەخۆشەکە''! منیش بە وەزیری دەروەی ئەو وڵاتەی کە لەسەر ئێسکی کورد و ئەرمەن دروست بووە دەڵێم: ''خەونی پیاوە نەخۆشەکە''!

که‌نه‌دا / ئه‌لبێرتا

ماڵپه‌ڕی دەریا