٩\١٠\٢٠١٠

ئەتککردنی ناوگەڵی مێینە گوزارشتە لە بەدڕەوشتیی نێرینە.

ئەرسەلان مەحمود

شەش ساڵانە بوم، لەناو پێخەفێکی هێمنا، خەونی ئەرخەوانی منالانەم ئەبینی، لەپڕ هەستم بەدەستێکی گەورەو، ساردو سڕ کرد، گرتمی، دەستێکی تر دەمی گرتم، نەفەسێکیان بۆ هاوارم نەهێشتەوە، هەڵیانگرتم بەرەو گەرماوی ماڵەوە، نەمزانی ئەوان چەند کەس بون، شێوەشیانم بیر نەماوە، نایشزانم پیاو بوون یا ئافرەت، دنیا لەپێشچاوم تاریکهەڵگەڕا، ئەوەی تەنها بەسەر کاشیە لوسەکانی گەرماوەکەوەو، بەسەر جەستەی روتەکراومەوە هەستم پێکرد، لێکخشاندنی شتێکی کانزایی بوو کە دواجار خستیانە ناو ڕانەکانمەوەو شتێکیان بڕی!، ئەو شتە، پارچەیەک بوو لەجەستەم، کە گەورە بووم تێگەیشتم هیچ کچێک لەوە دەربازی نەبووە!  ''نەوال سەعداوی''

میللەتی ئێمە ( کورد) خاوەن زمانێکی مرۆڤانەیەو، لەبەراییەوە هەڵگری چجۆرە زمانێکی نوسین یا شێوە ئاخاوتنێکی رەگەزی نەبووە، ئایا ئەمە مانایی ئەوەیە کورد پێش گەلانی ئەوروپایی و، ئەمریکی، لەباری چۆنایەتییەوە بەرهەڵستی سیستەمی پیاو سالارییانکردوە؟..

رەنگە تازە بەتازەیی، هەڵکشانی بزوتنەوەی ئافرەتانی دنیا بەرەو گۆرینی زمانی رەگەزی بۆ زمانێکی مرۆڤانەی هاوبەش، باشترین وڵامی ئەرێنی وەها پرسیارێک بێت، کەچی پێچەوانەی ئەو مێژوە، ئەمرۆ میللەتی کورد، بەشانازییەوە کەمئەندامکردنی جنسی رۆڵە نا کامەکانیان، هەروا سادەو، سەرپێی دەبینن و، بەشانازییەوە ئەو مەراسیمە دەماو دەم دەگوازنەوە، گوایە بەمە جڵەوی ناموسپارێزی و، لغاوی کردەوەی شەهوانی شەیتانی دەکەن!..

لێ‌، ئەگەر دۆڵانی مێینە، بەکردەوە گوزارشت بێ لە نامووسی نێرینە!، پێچەوانەکەی دیارە لەبنەمادا وەها گوزارشتکردنێک، لە بەدڕەوشتیی نێرینەوە سەرچاوەی گرتووە! ئایا تۆیەکی نێرینە وەها بەدڕەوشتییەکی ناوەکی و، سروشتیبوونی خۆتت پێقبووڵە؟! ئەگەر وڵامەکەی ئەرێیە پێویستە لەبەرچاوی کۆمەڵگە، ددان بەو بەدڕەوشتییە سروشتیە دابنرێ‌، یان ئەوەتا ئەبێ‌ روونبکرێتەوە خودی ئابڕووی نێرینە لەناو خۆیدا بەچییەوە بەندە؟!، باوەڕدەکەم نێرینە چ لە بەدرەوشتیی خۆی، ئابڕووی مێینە بەهی خۆی بزانێ‌ و، چ لەباری ڕەگەزییەوە، بوونییەی خۆی لەدۆڵانی مێینەدا ببینی، بەدڕەوشتیی هەر بەدڕەوشتییە.

ئەی ئەگەر ئەم خۆ بەکەمگرتنە ڕەگەزییەی لای نێرینە، گریمان لەوڵاتانێک بووە بەحالەتێکی سروشتی! خودی مێینە ئەم هەرزانفرۆشییە جەستەییەی خۆی لەچییە؟ ئەگەر هۆکاری نا هۆشیاری، یا زوڵمی کۆمەڵگەو، کارتێکردنی کاریگەریەکانی دنیابینی باوگەراییە، ئەی ئیشی گروپ و، ئەم هەموو رێکخراو گەلەی بەناو ئافرەتان، ژنان، خوشکان، خانمان، باجیان و دایکان و،...تاد، چییە؟! هێشتا ساڵانە بەدەیان هەزار لەکچانی ئەم وڵاتەی ئێمە، لەبەرچاوی ئێوە کەمئەندامی جنسی دەکرێن! ئێوە ئەگەر بەکاری شمولکاری و تەشکیلاتی یا پەیوەستبوونی ئایدیۆلۆژییەوە، نەتانتوانیبێ‌ کاریگەرییەک بۆ نەمان و بەرپێگرتنی ئەم دیاردەیە دابنێن، بەکردەوە ئەگەر کارتان، بۆ دەرهێنانی هاو رەگەزەکانتانە لەو قەسابخانە کۆمەڵایەتییە، بۆچی خۆتان هەڵناوەشێننەوەو، ساڵانە ئیش و فشارتان بۆ یەک ئامانج تەرخانبکەن؟ ئەی رۆڵی ئێوە، رێکخراوەکانی بەناو کۆمەڵگەی مەدەنی، ئایا ئەمەیە مەدەنیەت؟!..

بێدەنگبوون نیشانەی رازیبونە، ئەگەر نا، شەرەفپارێزی و، رێگریکردن لەرەها بوونی ئەندامە سێکسییەکان، پەیوەستە بەهاتنە کایەی پەروەردەیەکی بنەڕەتی مرۆڤسالاری، نەک برینی یەکێک و تیژ کردنەوەی ئەوی دی، فەرموو جیهانی عەرەبی ببینە، وەک ئەوەی ئاینی ئیسلام تەنیا ئاینێکبێ‌ و، رێیبەو ئازادیە تاک رەگەز سالاری و سێکسیە دابێت، پیاوانیان لەهەموو سەردەمەکان، تایبەتیش لەو ساتەوەی سیستەمی خیزانی باوکسالاری سەری هەڵداوە، بەردەوام لەدەرەوەی ژیانی هاوسەرێتی و، بەنهێنی سێکسیانکردوە، خۆ پیاوانی کڵێساش بەنهێنی وەها سێکسێکیانکردووە، ئەی ئایا گرتنە بەری هەموو ئەو رێوشوێنە جیا بینیە رەگەزیە، دزاجار لەشفرۆشییان زیاترو بەربڵاو تر کردوە یا پاشەکشێیان پێکردووە؟..ئەرێ‌ هەرگیز گوێبیستی ئەوە بوون بگوترێ‌ ئەو ئافرەت و ئەو پیاوە، لەشفرۆشن لەبەر ئەوەی کەمئەندامی جنسی نەکراون و، ئەوانەیەش بەشەرەفن لەبەر ئەوەی بەشێکی جەستەیان بڕدراوە؟!..

ئەگەر ئیسلامێتی، وەک ئەوەی دەگوترێ‌، روانینێکی گوناهبارانەی بۆ حەوا وەک پاشخان بۆ مابێتەوە، بەوەی سەرپێچی لەفەرمودەی خودا کرد، بۆیە لەبنەرەتەوە سێکس بەشەیتان و ئافرەت، پەیوەستکرا بێ‌، یانی پیاو هەر چەن ئارەزوێکی زۆر تری هەبێ‌، گوناهەکە ناکات تەنها بەهۆی دڵکێشی و، شەیتانیاویبوونی ئافرەتەوە نەبێت، خۆ هەزاران ساڵە لەکۆمەڵگە هاوشێوەکانی وەک ئێمەدا، خۆشی و ترشی هیلانەی شەیتان! دەبڕدرێ‌، ئەی ئێستا ئەو ئاژەوەگێڕە، ئەم هەموو گەرایە لەکوێ‌ دەرێژێ‌؟، کەوابوو دەبێ‌ ئەم دیاردەیە وەک میرات و کاردانەوەی ململانێیەک ببینین کە بۆ کۆتوبەندکردنی ئافرەتە وەک رەگەز نەک کۆنترۆلی سێکسی و سنوربەندی ئارەزویەکی شەیتانی و تافی، چونکێ‌ ئەگەر بڕینی بەشێکی جەستەی پیاو، هۆکارێکی زانستی و تەندروستی لەپشتەوە بێ‌، ئەی برینی بەشێک لەجستەی ئافرەت چمانا یا پاساوێک زانستی هەڵدەگرێ‌؟، شارەزایان لەو باوەڕەدان پیاو لەئافرەت بترسێت، دەڵێن ترسەکەیشی سروشتیەو، باوەڕدەکا ئافرەت هەمیشە شتێکی نا سروشتی دەسەپێنێتە سەر سروشت، بەلاتەوە سەیر نەبێ‌ هێشتاش زۆرێک پیاو هەبن هیچ لەنهێنی سکپری ئافرەت نەزانن، چیرۆکەکەی ئادەم و حەوا، بەو مانایەی شەیتانێتی ئافرەت بەرجەستەکردنی ترسی پیاوە، ئێ‌ ئافرەتێک هێندە بەهێز بێت، پیاو لەبەهەشتەوە بەرەو دۆزەخ راکێشێ‌، هەردەبێ‌ لێی بترسێ‌! زانایانی بواری دەرونشیکاری باس دەکەن بەرئەنجامی هەموو ترسێک رق لێبوونەوەو سەرهەڵدانی جەنگێکی شاراوەو، تەنها لەهێماو ئاماژەو کاردانەوەکاندا دەتوانرێ‌ ببینرێ‌ و، بەرجەستە بکرێ‌، ئەوەتا فرۆیدا ددانی بەو راستیەدا هێناو دەڵێ‌" پیاو بۆیە رقی لەئافرەتە چونکێ‌ بەسەرچاوەی مەترسی سەر خۆی دەزانێ‌".

ماڵپه‌ڕی ئه‌رسه‌لان مه‌حمود