٩\١١\٢٠٢٥

ئەوانەی ئازادییان کوشت، باسی ئازادی دەکەن!؟

موحسین کەریم      

یەکێك لە سەیروسەمەرەکانی کەمپینی هەڵبژاردنی خولی شەشەمی هەڵبژادنی پەرلەمانی عێراق لە کوردستان، بانگەشەی یەکێتی و پارتیە سەبارەت بە نەبوونی ئازادی لە هەریەکە لە ناوچەکانی ژێر دەسەڵاتی یەکتر!

بافڵ تاڵەبانی دەڵێ خەڵکی هەولێر جادەی پان و بینای بەرز چی لێبکات لەکاتێکدا ئازاد نیەو لەسەر قسەیەك زمانی دەبڕدرێت! بەرپرسانی پارتیش دەڵێن ئەوانەی سەرۆکی سێ حزبی ئۆپۆزیسیۆنیان زیندانیکردوە و کارەساتی لالەزاریان خوڵقاندوە، ناتوانن باسی ئازادی بکەن! ڕاستیەکەی هەروودکیان هەم ڕاست دەکەن و هەم درۆ! ئەوەی بەرامبەر بەیەکتر دەڵێن، ڕاستە، ئەوەشی سەبارەت بە خۆیان دەڵێن درۆیە! خەڵکی هوشیاری کوردستان هەردوولایان باش دەناسن. ئەوان بە ئەزمونی ژیانی رۆژانەیان، درۆکانی سەرانی پارتی و یەکێتی و پووچی بانگەشەکەیانیان سەبارەت بە ئازادی تاقیکردۆتەوەو هیچ خۆشباوەڕیەکیان بەو پڕوپاگەندانە نیە.

کاتێك یەکێتی باسی نەبوونی ئازادی لە هەولێر دەکات، خۆی بێشەرمانە سەرکوتی ئازادی دەکات و رێگری لە هەرجۆرە ناڕەزایەتی دەربڕینێکی خەڵك دەکات کە ئاراستەی یەکێتی بکرێ، چ لە پەیوەند بە مووچەو خراپی و نەبوونی خزمەتگوزاریەکانەوە، یاخود پەیوەست بە هەرپرس و مەسەلەیەکی سیاسیەوە کە بەدڵی یەکێتی نەبێ، لەوانە نارەزایەتی و خۆپیشاندان بۆ پشتیوانی لە بزوتنەوەی ژینا ئەمینی لە سلێمانی، خۆپیشاندان دژی پیلان و هێرشە تیرۆریستیەکانی تورکیا و ئێران بۆ سەر هێزەکانی ئۆپۆزیسیۆنی ئەو دوو ووڵاتە لە هەرێمی کوردستان، سەرەڕای رێگریە بەردەوامەکانی لە ئازادی رۆژنامەگەری و هێرشکردنە سەر کەناڵەکانی ڕاگەیاندن و دەستگیرکردنی پەیامنێران و رۆژنامەوانان. سەرباری ئەوەی کە دەسەڵاتی دادوەری و یاسای بەکارهێناوە بۆ زیندانیکردنی نەیارانی سیاسی خۆی، تەنانەت بەناوی یاساوە شوێنی ژیانی خەڵکی کردە گۆڕەپانی جەنگ و تەسفیەحسابی سیاسی کەدەیان قوربانی لێکەوتەوەو سوکایەتی بە دیل و تەرمی کوژراوەکان کرا. ئەگەر زۆر دوور نەڕۆین بۆ مێژووی چەندیین ساڵەی ڕابردووی یەکێتی لەئەنجامدانی تاوانی تیرۆرو سەرکوت و زیندانیکردنی هەڵسوڕاوانی سیاسی و کۆمۆنیست و نەیاران و رکابەرانی سیاسی یەکێتی، ئەوا یەکێتی و بافڵ تاڵەبانی ئەهلیەتی ئەوەیان نیە باسی ئازادی و بەرگری لەئازادی بکەن و خۆیان بە پاریزەری ئازادی خەڵکی هەولیر و بادینان بەرامبەر بە سەرکوتگەری پارتی ناوزەد بکەن.

لەوبەریشەوە، پارتی کە فایلێکی قورسی هەیە لە سەرکوت و بێدەنگکردنی هەر دەنگێکی ناڕازی و رفاندن و تیرۆرکردنی نەیارانی سیاسی خۆی، لە کوشتن و سوکایەتیکردن و شەقهەڵدان لە خۆپیشاندەران و مامۆستایان و مووچەخۆران، لە رێگریکردن لەگەر جۆرە کۆبونەوەو خۆپیشاندانیکی ناڕەزایەتی، لە سزادان و فایل دروستکردن بۆ رۆژنامەنوسان و هەڵسوڕاوانی سیاسی نەیاری حزبەکەی، لە سوتاندنی بارەگای ئەحزابی ئۆپۆزیسیۆن، لە تیرۆری سەردەشت عوسمان تەنها لەسەر نوسینێکی تەنزئامێز لەسەر کچەکەی سەرۆك! لە ناردنی بەڵتەجی بۆ لێدان و لەخوێنهەڵكێشانی ئەندام پەرلەمانەکانی ئۆپۆزیسیۆن، لە پیلانگێرێ و تیرۆری هەڵسوراوانی چەپ و کۆمۆنیستی لە بادینان و هەولێر و سەرەنجام سەپاندنی کەشێکی ترس و تۆقاندن بەسەر خەڵکی ناوچەکانی ژێردەسەڵاتی خۆیدا، ئەویش لەیەکێتی خراپتر، مافی ئەوەی نیە باسی ئازادی بکات و خۆی بە بەرگرکار و لایەنگری ئازادی لە ناوچەکانی ژێردەسەڵاتی یەکێتی هەڵخات و شیوەن بۆ قوربانیەکانی لالەزار و هەناسە بۆ دەستیگرکردنی سەرۆکی حزبە ئۆپۆزیسۆنەکانی سلێمانی هەڵبكێشێت! یەکێتی و پارتی لە پەیوەند بە پرسی ئازادیەوە نەك هەگبەکەیان بەتاڵە، بەڵکو توێشووی تاوان و سەرکوتی نەیارانی سیاسی و خەفەکردنی هەر دەنگێکی ناڕازی و داپڵۆسینی هەموو جۆرە ناڕەزایەتیەکی خەڵک، ئەوەندە پڕە کە وەکو دوو هێز و دوو دەسەڵایی دژە ئازادی لەمێژووی سیاسی کوردستاندا ناویان تۆماردەکرێت!

بەڵام بۆچی یەکێتی و پارتی پەنا بۆ ئەمجۆرە پڕوپاگەندەیە دەبەن لە کەمپینی هەڵبژاردندا!؟ ئەوان جاران لەپەیوەند بە هەڵبژاردنی پەرلەمانی عێراقەوە باسیان لە لیستی هاوبەشی حزب و هێزە کوردیەکان دەکرد تا گوایە نوێنەرایەتی کورد لە بەغدا بەهێزبێت و بتوانن پێکەوە بەرگری لە مافە سیاسیەکانی کورد بکەن! ئەوکاتە بنەمایەکیان هەبوو بۆ رێکەوتن لەسەر دابەشکردنی پۆستە سیاسیەکان لەنێوان خۆیاندا، بەڵام ئێستا کە ئاراستەی دۆخی سیاسی کوردستان رووی لە بەغدا و حکومەتی ناوەندیە و زەمینەی ئەو رێکەوتنەی پێشووی نێوان یەکێتی و پارتی لەنێوچووە، ئیتر پێشبڕکێی ئەوە دەکەن کە ئایا کامیان دەتوانێ بەشێکی گەورەتر لە بەغدا بۆخۆی بەدەست بهێنێ! لەمبارەشدا ئەوە ژمارەی کورسی هەرلایەکیانە کە بڕیاری ئەوە دەدات چ پێگەو بەشیكی دەبێت لە دەسەڵاتی ناوەند دا، بەپێی ئەوەش پێگەی لەئاستی هەرێمدا بەهێز یان لاواز دەبێت! بەڵام بەدەستەوەگرتنی پرسی ئازادی کە بۆ هیچکامیان چەکێكی پڕوپاگەندەیی کاریگەر و سەرکەوتوو نیە، تەنها بەتاڵبوونی باڵانسی کارنامەی ئەوان نیشان دەدات بەرامبەر بە خواست و چاوەڕوانیەکانی خەڵکی کوردستان!

ماڵپه‌ڕی موحسین که‌ریم