|
|
|
٢٥\٦\٢٠٢٢ ئەوانەی یارییان وە ئاورەوە کرد.
دارا خونچە لە نۆژەنەوە پێداچوونەوە وە لووتکە سەرکەشەکانی پێشمەرگایەتی کێلبوونەوە ١ نە دووند و تیش و ملە و ترۆپکە وەئاسمانداچووەکانیان ٢ لێبوونە گۆنا و گەردەن و پووز و کەفەڵ و مەم و گۆی مەمان نە کانیی و ئاوەزێی گەلیی و قەپاڵ و نێوقەدی شاخانیان ٣ لێبوونە جامی مەی و ئاوی دەم و چۆڕاوگەی گۆم و ئەستێرکان ٤ نە بەر و بەرسێبەری دارودەوەن و گەنجینە خاوەکانیان لێبوونە دەسمایەی مفت و هەواری حەز و ئارەزووەکان... دیسان تا گەیشتنە دوا ترۆپکەکان پفکەی پێیانیان پەقین و بەفر قوتیدا کەوشانیان (٥-٦-٧) گیزەگیزی گوللان.. گرمەگرمی تۆپان دایانبێژین خوێنپژان و برینە گەرماوگەرمەکان نەیانخستن گوڕ و هاوڵای رەشەبا و باهۆزی ژار نەیوەستاندن ٨ هەنووکانێش لە دەڤەری ژۆرێ و رۆژێ (٩-١٠) کە وە قەندیل هەڵدەبەزن.. هەمان بەزمە.. ئەوان یارییان وە ئاورەوە کرد و دەیکەن ١١ ئەوان مەرگی خۆیان خستەپێش و دەیخەن تا کەوشەنە داسەپایەکان بپسێنن ١٢ دیوار و بەربەستەکان بڕمێنن تا کێش و سەروا و کێشەوبێشەی سەرۆ و سەردار و سەرسەرییان تێکبشکێنن وە سەربەستیی هۆنراوەی ئازاد بخوێنن وە تێردەستیی ژیاری خۆیان بگوزەرێنن.. ١٣ جا ئەز کەنگێ کارم وەسەر ئەو دابەستە بێ دەربەستە سفت و سستانەوە هەیە ١٤ ''نۆ لە دە''نە تەنێ خوازیاری ئەوەنە زگیان وەسەر پشتیان کەوێ.. ١٥ باکیان وە ''خاک'' و ''ماک'' و ''زاگ''ەوە نییە (١٦-١٧) بەستەزمانانە چاوەڕێی ١٨ تیز و تیغ و تیر و شیری خاوەنیانن. ١٩ ئەوانەی وە راستیی یارییان وە ئاورەوە کرد نە دەستیان وە ئاوری سالاریی و لاسارییەوە دەسۆژێ ٢٠ نە لە ''تەقەی خۆشیی'' و ''یارییە ئاورینەکان'' بەشدار بوونە و دەبن.. ''خوێنگرەوە''ش نین.. ٢١ تا چاوەڕێی یاداشت و پاداشت و پاشماوەی ئێسکوپرووسکان بن! ___________________________________________________ فەرهەنگۆک: ١- کێلبوونەوە: هەورازبوونەوە. ٢- تیش: لووتکەی تیژی شاخ یان چیا. ٣- ئاوەزێ: ئەو پارچە زەوییەی ئاوی لێ دەزێ، نەک وەک کانیی کە لە کونەک یان پنتەک ئاوی لێهەڵدەقوڵێ. ٤- ئەستێرک: ئەستێڵک، گۆل، گۆم. ٥- پفکە: پۆقڵە، هەڵئاوسان. ٦- پەقین: تەقین. ٧- کەوش: پاتە، پێڵاو، یەمەنی. ٨- باهۆز: بای وە تەوژم، گەردەلوول. ٩- هەنووکانێش؛: ئێستاکانێش. ١٠- ژۆرێ و رۆژێ: باکوور و رۆژەڵات. ١١- ئاور: ئاگر. ١٢- کەوشەن: سنوور، ناوان. ١٣- تێردەست: هەبوو، دارا، زەنگین. ١٤- دابەستە: مەڕوماڵات وەخێوکردن لە ماڵێ. ١٥- زگ وەسەر پشت کەتن: واتە وە رادەیەک قەڵەوبوون کە زگ بەرەو لای پشتی بکشێ. ١٦- ماک: رەسەن. ١٧- زاگ: منداڵبوون. ١٨- بەستەزمان: بێ زمان، نەبوونی توانای ئاخافتن. ١٩- تیز: گاڵتەپێکردن، حەنەکپێکردن، پێڕبواردن. ٢٠- دەسۆژێ: دەسوتێ. ٢١- خوێنگرەوە: وە پێی نەریتی کەونەپەرستیی.. نێزیکترین خزمی کەسەک کە دەکوژرێ یان وە رووداوەک لەنێودەچی لە بری خوێنەکەی قەربوو دەکرێتەوە!
|
|
|
