٤\١٢\٢٠١٢

ئێوارە کۆڕێک لە بارەی زمان بۆ دکتۆر ''جەعفەری شێخولئیسلامی'' لە هەولێر.

لە درێژەی چالاکییەکانی ئەکادیمیای کوردی، ڕۆژی چوارشەممە ٥\١٢\٢٠١٢، کاتژمێر سێی و نیوی ئێوارە لە ھۆڵی ''مەلا مەحموودی بایەزیدی''، لە ناو تەلاری ''ئەکادیمیای کوردی'' ئێوارە کۆڕێک بۆ بەڕێز ''پ.ی.د. جەعفەر شێخولئیسلامی'' لەژێر ناونیشانی (قانوونیی زمانیی و ململانێی ئایدۆلۆژییەکان لە ھەڵبژاردنی زمانی فەرمییدا: زمان وەکو کەرەستە، پێناسە و ماف) ساز دەدا.

لەم کۆڕەدا دکتۆر تیشک دەخاتە سەر زۆر مەسەلەی ھەستیاری زمان و نەتەوە، ئەگەر نەڵێین ھەموو، زۆربەی پرۆسەکانی نەتەوە دامەزراندن بەرەو ڕووی پرسی زمانی فەرمیی و زمانی ستاندار بوونەتەوە. ھەر نەتەوەیەک، بەپێی ھەلومەرجی مێژوویی، کۆمەڵایەتی کولتووری و سیاسیی خۆی بەرەو رووی ئەو پرسە بووەتەوە و کۆششی کردووە قانوون و پلانی زمانی گونجاو ھەڵبژێرێ و بیانخاتە مەیدانی کردەوە. لە کوردستانی باشوور ئەم پرسە زمانییە تووشی ھەندێک کێشەی راشکاو بووەتەوە. یەکێک لەو کێشانە بریتییە لە ھەڵبژاردن یان ھەڵنەبژاردنی یەکێک لە شێوەزارە کوردییەکان وەکو زمانی فەرمیی ھەرێم .

ئەم باسەی ئێستا ئەو ئایدیۆلۆژیانەی زمانیی شیدەکاتەوە کە پاڵپێوەنەری ئەو ملمڵانێ و کێشە زمانییەن لە گۆڕەپانی گوتاری زمانی ستاندارد و زمانی فەرمیی لە کوردستان. باسەکە ھەوڵ دەدا بەم ئەنجامە بگا کە پلاندانانی سەرکەوتووانە بۆ زمان دەبێ زۆر ئامانجی لەبەرچاو بێ ، لەوانە بریتیین لە: دیاریکردن و مسۆگەرکردنی پلە و پایەی زمان وەکو یەکێک لە کەرستە ھەرە گرینگەکانی نەتەوە دامەزراندن بۆ مەبەستی پێوەندیگرتن و پێوەندیکردن، داننان بە گرنگیی زمان لە چێکردنی پێناسەی تاکەکەسیی و نەتەوایەتیدا و لەبەرچاوگرتن و رێزلێگرتنی مافی زمانیی.

دەستەی سەرۆکایەتی ئەکادیمیای کوردی
٤\١٢\٢٠١٢

info@kurdish-academy.com
zyadnadr@yahoo.com