١٣\١\٢٠٢٦

ئەوە چ جیهانێکە وا بێدەنگە لە بەرانبەر حەلەب؟

تاڤگە سابیر       

ئەوە چ جیهانێکە تێیدا مرۆڤ وا خوساوە ناتوانێ پرسیار بکا، گومان بکا، تووڕە بێ و بڵێ ئەو نایەکسانییە بۆ؟ ناتوانێ ئەلتەرناتیڤێکی دی لە سیاسەت، لە کەلتوور، لە جیهانبینیی ئافەریدە بکا؟ ئەوە چ جیهانێکە تێیدا لەسەر سفرەی خواردن و خواردنەوە سەیری مەرگی حەلەب دەکەین و بەردەوام دەبین لە خواردن وەك ئەوەی هیچ رووینەدابێ؟ هێشتا سفرەکەمان نەپێچاوەتەوە دەنگوباسی کارەساتی كۆمەڵ كوژی كورد لە حەلەب لە لایەن سوریای فاشیستەكان دەبیستین و ناپرسین ئەوە چ جیهانێکە، ناپرسین چی دەگوزەرێ و بۆ؟ لە دەستدانی ئەو هەست و ویژدانە بۆ؟ ئەوە چ فەرهەنگێکە دەسەڵاتی سوریا بەڕێوەدەبا و پاساو دادەتاشێ بۆ ئەم هەموو ستەم و نایەکسانییە، کە هەر کاژێرەک لە کوردستانی رۆژئاوا روودەدەن؟ ئایا ئاوەز لێپرسراوە یا نائاوەز لەو جیهانە ، کە خۆی وەك " باشترین جیهانێك کەشیاوە" دەخاتەڕوو؟ ئەو پرسیارانەو دەیان پرسیاری دی دەبێ ویژدانی ئەوانەمان بورژێنێ کە دەمانەوێ مرۆڤ بین لە جۆرێکی دی، بەڵام سەرەتا دەبێ ئازادبین و جیهان رووتبکەینەوە لەو هەموو بەرگ و پەلاسە درۆینەی ، کە بۆی دووراوە، رووتیبکەینەوە لەو هەموو بازنە پیرۆزییەی، کە خراوەتە نێوی، دەبێ ئەو هەموو دیوار و حەسارەی کە گوتارەکان بۆیان دروستکردوە بیڕووخێنین بۆ ئەوەی بیبینین وەك ئەوەی کە هەیە، هیچ نییە جگە لە جیهانێك پڕ لە نەبوون پڕ لە نابەرابەریی پڕ لە ریاکاریی و بێ باکیی و تاوان و تاوان.

جیهانێك پڕ لە بێ باوەڕیی لە بەرگی باوەڕدا، پڕ لە درۆ لە بەرگی راستییدا، پڕ لە گەمژەیی و بیرنەکردنەوە لە بەرگی هزر و زانستدا، پڕ لە تاوان دژ بە مرۆ بەناوی ئازادیی مرۆڤەوە ، پڕ لە دڕندەیی بە ناوی شارستانیبوونەوە، پڕ لە ڕیاکاریی بەناوی سەربەخۆبوونەوە، پڕ لە ستەمکاریی بە ناوی دیموکراسیەوە، پڕ لە مێگەل بە ناوی تاکگەراییەوە، جیهانێك کە کۆیلەکان حوکمی دەکەن، کۆمەڵانی خەڵك حوکمیدەکەن، بەڵام بە ناوی سەروەرەکانەوە جیهانێك، کە لەمێژە رەوشتی سەروەر و جوامێریی سەروەرانەی تیرۆرکردوە و ئەوەی ماوەتەوە فڕتوفێڵ و فێڵبازیی کۆیلەکانە، جیهانێك کە هەموو شت تێیدا رەوایە، کوشتنی دیل و لەدەستکردنەوەی کاتژمێر و قرتاندنی زریزە و خشڵەکان و لەپێکردنەوەی پێڵاوی کەسی کوژراو لە گۆڕەپانی جەنگدا، بۆمبارانکردن و کوشتنی منداڵانی حەلەب.

هەموو شت رەوایە ، گەمژەیی و بێباکیی و بێ ویژدانیی و بێ هۆشیی و درۆ و کوشتن، بەڵام هەر هەموو لە ژێر ناوی جیاوازبوون و تاکەکەسیبووندا، بەها پیرۆزەکاندا لە ژێر ناوی مۆدێرنبوون و بنەڕەتخوابووندا، کوشتنی هزر بە ناوی خوداوە، کە خۆی خودا هیچ نییە جگە لە پەروەردەکردنی هزری ریاکاریی بە ناوی باوەڕەوە، کە باوەڕ هیچ نییە جگە لە لەئامێزگرتنی راستیی، بوون بە کۆیلەی بتەکان بتی بازاڕ بتی نەتەوە بتی ئایدیۆلۆژیا، بتی شارستانێتی، بتیدینیی و بتی ڕەگەز.

ئەمڕۆ ئێمە لە جیهانێکدا دەژین، کە سوریا بە ناوی سیاسەتمەدارییەوە بڕیاردەدا چۆن بژین، چۆن بیربکەینەوەو بیر لە چ بکەینەوەو چ بپۆشین و باوەڕمان بە چ بێ، لەپێشینەکانی ژیانمان کامانەبن؟ کام پەرتووک بخوێنینەوە؟ کام بەها بە پیرۆز دابنێین؟ هەر خۆشیان بڕیار دەدەن کێ تیرۆریستە؟ کێ مەدەنیە؟ کێ دیموکراتە؟ کێ تووڕەیە و کێ ئاشتییخوازە؟ کێ خاوەنی بەهایە و کێ شوێنی مەترسییە و کێ دەبێ بژیێ و کێ دەبێ بکوژرێ؟ ئەحمەد شەرع بڕیاردەدا مرۆڤبوون واتای چیە؟ مرۆڤی چاك کێیە و خراپ کێیە؟ دەتوانین کام خودا بپەرستین، نەفرەت لە کام خودا بکەین کام دین باشە و کامەی دەبێ سەنگەسار بکرێ.

سوریا ئەو وڵاتەی گوایە دیموکراسییە لە نێو دەریای ستەمکارییدا، بەڵام سیاسەتی سوریا دژ بە هەموو جووڵانەوەیەکی دیموکراسییە، لە جیهانی ئەحمەد شەرع شکستی هێزی ئازادییخواز لە وڵاتی سوریادا لە بەدیهێنانی سیستەمی ستەمکارییە، کە مێژوویەکی درێژی هەیە لە سوریا، ستەمکاریی و نەزانیی و هەژاریی لەو وڵاتە، ئینجا شکستی ئیسلامیش وەك دین لە قووتاربوون لەو تەنگەتاوییەی کە چەند سەدەیەکە تێیکەوتووە بە هۆی هێزە پەرچەکردارەکانی نێو جیهانی ئیسلامەوە، شکست لە رزگاربوون لە راڤەی یاسایی و شێوازی جێبەجێکردنی تێکستە پیرۆزەکان، شکستی ئایدیۆلۆژیایەکانی خەونببینین بە سیستەمێکی کاولانەترەوە کە تێدا ئازادیی فەراهەم بکا بۆ تاکە کەسەکان تا ئەگەرەکانیان تاقیبکەنەوە و رێگە لەبەردەم بەهرەی کەسەکاندا ئاوەڵا بکرێ.
 

ماڵپەڕی تاڤگە سابیر