٢٦\١٠\٢٠١٧

ئەوەی بە ''ئاڵا'' نەتواندرا بە کەرکوک بکرێ.

ئەرسەلان مەحمود  

زۆرێک وتیان ڕیفراندەم ناکرێت، ھەڵە نەبوون کەچی سەرئەنجام پرۆسەکە دوا نەخراوو لەوادەی دیاریکراوی خۆیدا "٢٥/٩" جێبەجێکرا، قسە لێرەدا لەسەر تێکەوتەو لێکەوتەکانی ڕیفراندەم نیە، ئەمە بابەتێکی ترە، دەمەوێ ھەڵوەستەیەک لەسەر ئەوەی ئاخۆ کێ بڕیاری دواخستنەکەی داو، کێش لەدوا مەتافدا بگۆڕی بڕیارەکە بوو بکەم و، چییەتی ئامانجی بگۆڕەکەیش ڕونبکەمەوە.

جێگۆڕکێ و بگۆڕی بڕیارەکە:

دوای ئەوەی مەڵبەندی کەرکوک/ی یەکێتیی نیشتمانی کوردستان، ئەنجامدانی ڕیفراندەمی لە کەرکوک و ئەو جوگرافیایەی لەدەستوری عیراقدا بەناوچە جێناکۆکان ناسراوە، ڕەتکردەوە، مەکتەبی سیاسی ھەمان ئەو حیزبە "ی.ن.ک" لەکۆبوونەوەیەکی تایبەت بەتاوتوێکردنی ئەم باس و بەلاغەدا، بەکۆی دەنگ دەگەنە تێگەشتن و تەفەھومێکی ھاوبەش لەمەڕ تەواوی پرۆسەکە بەدواخستنی ڕیفراندەم و تەحقیقکردنی ئەلتەرناتیڤە پێشنیارکراوەکان، دوای ئەمە، وەفدێک لەیەکێتیی نیشتمانی سەردانی بارزانی دەکەن، پەیامەکە دەگەیەنن، حەسەب مەعلومات سەرئەنجام بارزانی/ـیش کۆک دەبێت لەسەر دواخستنەکەو، دەڵێت: سەردانی کەرکوک دەکەم و، دوای ئەوە دەکەوینە کارکردن لەسەر بژاردەی بەدیلەکان، بەڵام پارێزگاری ئەوسای کەرکوک" نەجمەدین کەریم " پێچەوانەی ئەم باس و بابەتە، لەبەرامبەردا بارزانی دڵنیا دەکاتەوە لەوەی تەواوی پێکھاتە جیاوازەکانی کەرکوک خوازیاری ئەنجامدانی پرۆسەکەن و، ئەوەی دەیانەوێت تەنھا بریتییە لەوەی ئایندەیان ئارام و زەمانکراو بێت لەچوارچێوەی دەوڵەت و دامەزراوە تازە کوردییەکەدا، سەرئەنجام بارزانی/ـیش قسەکەی پارێزگاری کردە جێگرەوە، دڵنیام ھاوڵاتی بەئاگاو خوێنەری ھۆشمەند لێدوان و گوتارەکانی ئەوێڕۆژێی نێوان ھەردولای لەکۆبوونەوەکەو لەمیدیاکاندا بیرماوە.

چییەتی و ئامانجی لاڕێکارییەکە:

نەجمەدین کەریم، دوای ئەوەی مەلا مستەفا بارزانی لەسەرە مەرگدا جێھێشت، ڕێک بەبێ ئاوڕدانەوە خۆیکرد بەئامێزی مام جەلال/دا، سەرئەنجام جگە لەمانەوەی وەک پزیشکی تایبەتی، توانی لەم ڕێگەو پێگەیەوە بەپلەی حیزبیش بگاتە ناو مەکتەبی سیاسی یەکێتیی و، دواتریش پارێزگاری کەرکوک، بەڵام لەبەر ئەوەی لەبنەمادا نە ئەھلی سیاسەت بوو، نە توانست و تاقەتی ئەو شڕمبڕمێنە حیزبیەو سیاسیەیشی ھەبوو دەگوزەرا لەناوچەکەدا، کەوتە خۆی، دیارە بەمەبەستی بونیادنانی ئایندەی تایبەتی خۆی، پەیوەندییە تایبەتییەکانی خستنە گەڕ، ئەمە بێگەڕانەوە بۆ حیزبەکەی، توانی لەڕێگەی پەیداکردنی پشتیوانی گروپە شیعیگەراو بەشێک لەپێکاتە پارڵمانییەکانی تری عیراق، دەستەبەری ئەوە بکات وەک وەزیری تەندروستی عیراقی دەستبەکار بێت، بەڵام یەکێتیی ئامادەی پشتیوانی کردنی نابێت، کاتێک"مام" لەمەکتەب سیاسیەکەی دەپرسێت سەبەب چییە پشتیوانی نەجمەدین ناکەن، دەڵێن: لەدەرەوەی یەکێتیی ئەمەی کردوەو، گەر جەنابیشتان فەرزی دەکەن، ئەوە فەرمان ھەر فەرمانی بەڕێزتانە. بەڵام "مام" لەوڵامدا دەڵێت: من کەس فەرز ناکەم. ئەم کاردانەوەیە، نەجمەدین کەریم نیگەران دەکات، دوای ئەوە بەماوەیەکی کورت، ناوبراو سەفەری ئەمریکا دەکات.

تەپڵەکەکە:

ئەو سەردەمە، میدیای بەر ڕۆژو سێبەری پارتی، ڕاستەوخۆو زۆریش بەتوندی لەدژو دوژمنایەتی نەجمەدین کەریم/دا بوون، باوەڕ دەکەم ھەمووان وەھا ڕاستینەیەکیان لەیادو یادەوەریدا مابێت. ھۆکارەکەیش مەعلومەو مەبەست لەسنگ و شکۆدانی ھەیمەن و ھەژموونی جەماوەری و ئیداری یەکێتیی بوو لەکەرکوک و جۆگرافیای ئەو پارێزگایەدا، ئەمەیش بەئامانجی دەست بەراگرتنی ئابورریەکەی و شتی تریش، کەچی دوای گەڕانەوەی جەنابی پارێزگار لەئەمریکا، بەماوەی کەمتر لە"١٥" ڕۆژ، دیسانەوە بەبێ ئاگاداری و گەڕانەوە بۆ حیزبەکەی، سەفەری تورکیای کردو، لەگەڵ میت و گەورە بەرپرسانی تری ئەم وڵاتە کۆبوونەوەو میتینگی تایبەتی گرێدا، لەبەرامبەردا پارتی و تۆڕە میدیاییەکانی پارتی بەگۆشەی نەوەت پالامارو ھەڵمەتەکانیان لەدژی نەجمەدین نەک ھەر ڕاگرت، کەوتنە پیاھەڵدان و میوانداریکردنی لەستۆدیوو سەرشاشەکاندا، تەنانەت ئەداو لێدوانی خودی پارێزگاریش گۆڕانکاری گەورەی بەسەردا ھات، پێشتر دەیگوت: من پارێزگاری پارێزگایەکی عیراقیمەو گوێ بەبارزانی نادەم، دواتریش بەدیدارو گفتوگۆی ڕاستەوخۆ لەگەڵ بارزانی گۆڕدرا، وەک ھەردەم بێگومان ئەمەیش ھەر لەدەرەوەی ئاگاداری حیزبەکەی، دوای نەخۆشکەوتنەکەی "مام" شێلگیرانەتر پەرەیدایە پەیوەندییە تایبەت و ژێربەژێرەکانی، ئامانجەکەیش بەلای نەجمەدینەوە، خود بردنە پێشەوەو خود زومکردن و مسۆگەر کردنی ئایندەیەکی ترو، خود قوتار کردن بوو لەو دۆخە جەھەننەمییەی تێیکەوتبوو، بەلای لایەنی بەرامبەرەیشەوە ئامانجەکە لێدان بوو لەپێگەی یەکێتیی و کردنەوەی دەرچەیەک لەپێناو پێچەوانەکردنەوەی ھاوکێشە سیاسیەکە لەکەرکوک/دا، ئەمە وایکرد جارێکی دیکە بەڵام ڕون و ڕاشکاوتر نەجمەدین دەستداتەوە خۆ نمایشکردن، لەبەرامبەر پاڵیوراوی حیزبەکەی بۆ سەرکۆماری عیراق، دیسانەوە بەبێ گەڕانەوە بۆ حیزبەکەی، بەبێ گوێدانە لێکەوتەکانی لەسەر سایکۆلۆژیای دەرون حیزبیەکەی خۆی پاڵاوت، بەمەیشەوە نەوەستا، کەرکوکی لەڕێگەی دەستبەسەرداگرتنی چەند کێڵگەیەکی نەوتی، شڵەژاند، بەڵام یەکێتیی زوو فریاکەوت و نەیھێڵا ئەو دەستەی نەجمەدین دەیەوێ لەم ڕێگەیەوە کێشیبکاتە کەرکوک و بیانوو بداتە عیراق و ئەملاو ئەولا، بگاتە ئامانجەکەی، خێرا ڕەوشەکەی ھیورکردەوەو مەسەلەکە کۆنتڕۆڵکرا، ئەمە وایکرد کێشەکانی لەناو مەکتەب سیاسیدا بتەقنەوە، تەپڵەکی تێگیرا، لێپرسراوی دەستەی کارگێڕی بەئامانجی دروستکردنی فشار بۆ سزادانی ڕونکردنەوەی دا، تەنانەت بۆماوەیەکی دیار، ئۆفیسەکەی لەمەکتەب سیاسییەوە بەرەو دەزگای ڕۆشنگەری چاودێر، جێھێشت!!

بەڕیفراندەم کردیان:

نەجمەدین لێرەوە دڵنیا بوو لەوەی وجودی لەناو یەکێتیی/دا بەتەواوەتی کەوتووەتە ژێر پرسیارو چاودێری جیددیەوە، ھەر بۆیە لەبری گەڕانەوە، جارێکی دی کەوتەوە خۆی و لەڕێگەی وروژاندنی ھەست و سۆزگەرایی قەومی و ڕۆمانسیەتی کوردایەتی، مەسەلەی ئاڵا/ی ھێنایە ڕۆژەڤەوە لەکەرکوک/دا، سەرئەنجام ئەوەی لەگەڵ بارزانی نەیانتوانی لەمەسەلەی ئاڵا/دا بەکەرکوک/ی بکەن، لەڕیفراندەمدا بەکەرکوک/ـیانکرد!!

ئێستا نەجمەدین بە بێ کەرکوک، پارتییە:

ئەگەر خولیاو خەمەکەی بارزانی کوردایەتی بوایە، لەبری کەرکوک دەیتوانی ھەولێر بکاتە ئامانج، ئەوکاتە نە دەرو دەروسێکان ھێندە کۆک و مکۆم دەھاتنەوە سەر ھەست و دەگەیشتنە مانۆڕو جوڵاندنی ھێز، نە کۆمەڵگەی دەولی و، زلھێزەکانیش ئەمەیان لەعیراق و ھاو ئاوازەکانی قبوڵ دەکرد لەبەرامبەر کورددا، ئەم ڕەوە بەکۆمەڵەی لەڕێگەی میدیاکانییەوە" حەشدی پڕوپاگەندە " بەکەرکوکییەکانی کرد، بەھەولێرییەکانی کردبایە، دنیا لەسەرمان دەھاتە دەنگ، ئەو بەرگرییەی میحوەری چوار لەکەرکوک/ی کرد، ئەگەر میحیوەری پێنجیش بیکردایە، ھەر ھێندەی ئەوەی لەپردێ لەھەولێر/ی کرد، ھاوکێشەکە بەجۆرێکی دی دەکەوتەوە، ئێستا نەجمەدین بەبێ کەرکوک، پارتییە، ھیچ ماکینەیەکی پڕوپاگەندەو ئیعلامیش ناتوانێ شکستەکان بشارێتەوە، ئەوەی لەم شکستەیش شەرمھێنە ترە، جگە لەبەشینەوەی تۆمەت و دڕدۆنگی، ھەڵاتنە لەدداننەھێنان بەخودی شکستەکەدا.
 

ماڵپه‌ڕی ئه‌رسه‌لان مه‌حمود