په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١٦\١\٢٠١١

    ئەو شاژنەی عەرشم لەبەردەمی لەرزا...

شوان عوسمان

ئەی شاژنەکەم....
دابەزە لەو بەرزیە ،
تۆ بۆ خۆت بەرزی ،
نایەوێ لە سەر پەنجەکانت بەرزەپێ بیت ،
خۆ درەختی باڵات بەرزە..
ئەی شۆخەژنەکە..
با عەرشی پیاوەتیم ،
لەبەردەم رازی ژنایەتیت ،
تاوێک بچەمێتەوەو
بڕبڕەکەشم کووڕ ببێتەوە...
ئەوە کورسی عەرشەکەمە ،
فیدای چۆک دانێکی تۆ بێ و
با لە سەرسینگم بیگرسێنەوە...
دەبا قودرەتم لە بەرامبەر قادرت ،
بە قوربانی یەک تەشریفی خێرت بێ..
بە بێ فەرمانی ،
موتلەقی شاهانەت ،
ئەو کۆشکەم بە کۆریتێک ،
ئەزانم..
خەونە سپیەکانم ،
لە بن سێبەری تارای جەبەرۆتت ،
سیحریان بەتاڵ ئەبن و
بوون ونەبوونم وەکو یەک ئەبن...
لە بازاڕی موزایەدەیەکی کەرامەت وکبریائەتدا ،
پولێکی قەلپ ناهێنن...
من لە بەردەم ئەو تەخت وتاراجەتدا ،
باڵدارێکی باڵشکاوو...
جەستەیەکی بێ رۆحم..
ئاسودەم بە تەقدیس وتەکریمی ،
تاجی سەر سەرت...
خۆشبەختیە ئەو ملکەچی ،
بوونە....
من کە سوجدە بۆ نووری چاوی تۆ ،
نەبەم ،
میحراب ونوورو بەهەشتی دوای قیامەتم ،
لۆچیە ،
کە قیامەت و رۆژی حیسابم ،
لە دووری ئامێزی تۆوە بێت ،
سوتانم لە وجەهەنەمەی فیراقت ،
کوفرو ئیلحاد نیە...
ئەوانە برژانگم نین ،
فەرشی سۆرو مۆرن ،
پێیان لە سەردانێ...
با رەوتی شاهانشاهانەت ببینم ،
وەکو پۆڕ تێپەڕێت...
جۆڵانەی ئەرخەوانی سەرخەوێکی مەلیکانەت ،
بە رایەلی شادەمارەکانی دڵم ،
هەڵواسە....
هەمیشە بە سەفای راژەنینێک...
لە بەر پێی هاتنی فەخامەتت ،
ئەبنە خاکوخۆل و
خۆیان رائەخەن...
سەرکەوە با نوکی کەعبی پێڵاوەکانت ،
لەو دڵ ورۆحەم زیاتر راچێت ،
دەبا لە بن پێت باشتر بپلیشێنەوە...
ئەگەر دڵێک لە رێگەتە سەر دانەنێت ،
شەهیدێکی نەمر نیەو
با سەد جار بمرێت...
ئەوە لە بەخشندەیی خۆتە ،
ئەگەر جار نا جارێ ،
بە تیلە رقێک و
نەرمە خێسەیەکیش ،
ناوم بە سەر نوکی زارت بێنی و
لایەکی ئەو سەحرایەم ،
لێ بە بەهەشت کەیتەوە....

١٢\١\٢٠١١ - هۆڵەندە - دێلفت
ماڵپه‌ڕی شوان عوسمان