په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٦\١٠\٢٠١٣

ئەو (شەرع)ەی حیزبە ئیسلامییەكان لە دەستی دوو وەریدەگرن.


ئەرسەلان مەحمود   


دڵشاد گەرمیانی، ئەندامی مەكتەبی سیاسی كۆمەڵی ئیسلامی، ئەو كەسەی بە رابەری سەلەفیەكانی ناو ئەو حیزبە دەناسرێت، لەپەیجەكەی خۆیدا نووسیویەتی، "به‌زاندنی هه‌ندێ له‌سنوره‌ شه‌رعیه‌كان، به‌ناوی كرانه‌وه ‌‌و، به ‌مه‌به‌ستی كۆكردنه‌وه‌ی ده‌نگی غه‌یره‌ ئیسلامییه‌كان، حازر به ‌قه‌رزدان‌ و، بازرگانیه‌كی دۆڕاو بووه"‌، زیاتری نووسیوە و، گوتووشیەتی" خه‌ڵك‌ و جه‌ماوه‌ری ئیسلامی قسه‌ی فه‌لسه‌فیی بێناوه‌ڕۆك‌ و، سیاسه‌تی شوێن پێهه‌ڵگرتن‌ و، لاساییكردنه‌وه‌ی حیزبه‌ عه‌لمانیه‌كانیان ناوێ"، بە بڕوای گەرمیانی لەبری وەها لاڕیكارییەك، وەك خۆی لە بەشێكی تری پۆستەكەیدا نووسیویەتی" خەڵك و جەماوەری ئیسلامی عه‌وداڵی دینداریه‌كی ڕاسته‌قینه‌‌و، ئیسلامه‌تیه‌كی بێ غه‌ل‌ و غه‌شن ".

دیارە له‌به‌رامبه‌ر خستنە ڕووی ئەم ڕوانگەیەی ئەو ئەندامەی مەكتەبی سیاسی كۆمەڵی ئیسلامی، چه‌ندین كادیری كۆمه‌ڵی ئەو حیزبە، وڵامی ئەندامەكەی مەكتەب سیاسی حیزبەكەیان داوه‌ته‌وه، سەرنجڕاكێشتریینیان بە لای منەوە، "ره‌وشت محه‌مه‌د"ـە، ناوبراو نووسیویه‌تی "پۆسته‌كه‌ی گه‌رمیانی، ئاگاداركردنه‌وه‌یه‌كه‌ بۆ هه‌موو ئه‌وانه‌ی بیر له‌ كرانه‌وه‌ی زیاتر و پێداچوونه‌وه‌ ده‌كه‌ن، به‌و بنه‌ما ئاڵۆزكاو و چه‌قبه‌ستوانه‌ی به ‌ناوی شه‌رعه‌وه،‌ بوونه‌ته‌ ئاسته‌نگ له‌به‌رده‌م گوتار و كاری كۆمه‌ڵدا"، ئەو كادیرەی كۆمەڵی ئیسلامی، سەبارەت بەو باسە روونتر و بە دیاریكراوی هەر لە وڵام بە گەرمیانیدا، دەڵێت" ئه‌و شه‌رعه‌ی ئێمه‌ له‌ده‌ستی دوه‌وه‌ وه‌ریده‌گرین ‌و خۆمان نه‌مانتوانیوه‌ وه‌كوو نه‌ته‌وه‌یه‌ك له‌و په‌یامه‌ی خودا بۆ مرۆڤایه‌تیی ناردوه‌، تێگه‌یشتنێك بۆ ژیانی خۆمان دروست بكه‌ین ".

ئەوەی دڵشاد گەرمیانی، پشت بەستووە بە سنوورە شەرعییەكان، وەك خۆی گوتوویەتی، لە پوختەترین واتادا، دەرئەنجامی ئەوەیە، ئەوەی لەم قۆناغەدا كۆمەڵ و حیزبە ئیسلامییەكانی دی، بە ناوی ئیسلامەوە دەیكەن، ناڕاستە و تەنانەت پڕاوپڕە لە غەل و غەش و، كەوتووەتە دەرەوەی بەهاكانی ئیسلامەوە " خەڵك و جەماوەری ئیسلامی، عەوداڵی دیندارییەكی ڕاستەقینە و ئیسلامیەتێكی بێ‌ غەل و غەشن "، بەڵام ڕەوشت محەمەد، پێچەوانە بەو ئەندامەی مەكتەبی سیاسی حیزبەكەی، لە پوختەی واتادا، خولانەوەی حیزبە ئیسلامییەكان لە بازنە داخراوە ئیستراد كراوە شەرعییەكاندا، وەك هۆكارە بنەڕەتییەكەی داڕمانی ئەو بەرەیەوە دەبینێت" ئه‌و شه‌رعه‌ی ئێمه‌ له ‌ده‌ستی دووه‌وه‌ وه‌ریده‌گرین ‌و خۆمان نه‌مانتوانیوه‌ وه‌ك نه‌ته‌وه‌یه‌ك له‌و په‌یامه‌ی خودا بۆ مرۆڤایه‌تیی ناردوه‌، تێگه‌یشتنێك بۆ ژیانی خۆمان دروست بكه‌ین ".

دڵشاد، دەیەوێ‌ بڵێت، رەتكردنەوەی گوتاری فەلسەفی و هەژموونی شارستانیەتی نوێ‌، دەبێت بخرێتە ئەولەویاتی كار و كردەوە و كاردانەوەی تەواوی حیزبە ئیسلامییەكانەوە، یانی ئەو بوون و بەهای ئیسلام، بە تەنها لە ڕەتكردنەوەی دنیایی نوێدا، دەبینێت، بەڵام بە بڕوای رەوشت، گرفتی هەرە گەورە بە هۆی ئەو هزرە دۆگمایانەوەیە وایكردوە وەك خۆی دەڵێت لە دۆخێكی چەقبەستوودا بیانوەستێنێت، بە واتایەكی دی، رەوشت یان با بڵێین لە ناو ئیسلامییەكاندا، ئەوانەی وەك رەوشت بیر دەكەنەوە، ئیسلامییەكانی كوردستان، ئێستا لە دۆخێكی قورسدا دەژین، ئەمەیش بە هۆی چەند بكەرێكی وەك دڵشاد گەرمیانییەوە، ئەگەر نەڵێین سووكایەتی، ئەوا هەست بە قێزەونی و بە دڵشكاوی دەكەن، واتە لەو باوەڕەدان، رێگوزەری پێشكەوتن و شارستانییەت زۆر پێشییان كەوتووەو، بەو عەقڵییەتگەراییەی (دڵشاد)شەوە، بە گومانن لەوەی ئیتر بتوانن بگەنەوە بە خۆیان.

پوختەی كۆمێنت، هەرچۆنێك بێت، سەرهەڵدانی ئەم جۆرە جەدەلە، پۆزەتیڤە و، جێگەی دڵخۆشییە، دیارە بە واتا بابەتییەكەی، چونكە سەردەمی ئەمڕۆ، سەردەمێكە مرۆڤ دەبێ بە هەموو توانا زیهنیەكانی خۆیەوە‌ بەرگریی لە بنەما عەقڵانییە پۆزەتیڤەكان بكات، بە تایبەتیش لەم بارودۆخەی ئێستای كوردستان و، ناوچەكەدا بە گشتی، مرۆڤی ئەمڕۆ، ئەوەندەی شوێنكەوتەی ئایندەگەراییە لە ژیانیدا، هەرگیز بەو ئەندازەیە نە ئاوڕ لە دواوە ئەداتەوە و، نە چاویش دەبڕێتە گەڕانەوە بەرەو ڕابردوو، بەڵام دەبێ‌ ئەوەیش بزاندرێت، پرۆسەی خودبەخاوەندارێتیكردنی خودیش لە خۆدا، هەروا سادە و ئاسان نییە و، دەبێت‌ ئەلتەرناتیڤێكی خاوەن میسداقییەت پێشكەش بكەین، ئەگینا دڵشاد و هاوشێوەكانی وەك دڵشادیش، بەو ئاسانییە واز لە جوینەوەی بانگەوازی بەسەرچوو ناهێنن.
 

ماڵپه‌ڕی ئه‌رسه‌لان مه‌حمود

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک