٢٨\١٢\٢٠١١

فاروق رەفیق و فەرید شەوقى؟!

هیوا رەش     

کاتێک لە شاشەوە کاک فاروق دەبینم منداڵیم دێتەوە یاد ، لەو سەردەمانەدا هەموومان زۆربەى شەوان لە ماڵێکدا کۆ دەبووینەوە تا تەماشاى تەلەفزیۆن بکەین ، لەبەر ئەوەى لە گەڕەکێکدا ماڵێک یان دوان تەلەفزیۆنیان هەبوو بۆیە لەو شوێنەى تەلەفزیۆنى لێبوو ئێمەش جەم دەبووین ، جارى وا هەبوو خاوەن ماڵمان بێزار دەکرد و نان و ئیسراحەتمان لێ تێک دەدان ، هەر لە فلیمى کارتۆنەوە تا فلیمى شەو لەبەردەم شاشەى تیڤییەکەیان دادەنیشتین و درەنگانى شەو خەو بردوومانیەتیەوە و ناردویانە بە دواى دایک و خوشکماندا و بە باوەش بردوومانیانەتەوە بۆ ماڵ ، ئێمەى منداڵى بەستەزمان بە خۆشییەوە لەچاوەڕوانى فلیمى شەودا خەوەکورکێمان تێدەکەوت و چەند جارێک دەموچاومان دەشۆرى تا بەرگەى خەوى دواى شەڕەشەقى کۆڵان بگرین ، بیرمە زیاتر حەزمان لە فلیمى شەڕى بیانى بوو ، کەچى پێچەوانەى خواستەکەى ئێمە زۆربەى جار فلیمەکان عەرەبى دەردەچوون و لە عەرەبییەکانیش - فەرید شەوقى - کە بە - بەتەڵى شاشە - ناسراو بوو خەونەکەمانى سەراوبن دەکرد ، ئێستاش لەگەڵ ڕێزمدا بۆ کاک فاروق ، جێگەى بە - فەرید شەوقى - لێژ کردووە و هەر ڕۆژەى بە شێوازێک دەورەکە دەبینێ و دەبێتە میوانمان ، لە کتێبەوە بۆ مایکى سەراى ئازادى و لەوێشەوە بۆ شاشەى تیڤى ، لە توێژەرى فەلسەفییەوە بۆ تێکەڵبوون بە جیهادچى و لەولاتریشەوە خۆیمان لێدەکات بە فریادڕەسى سیاسیى و ئینجا بەرنامە پێشکەش کردن ، ئەمانەش خەسڵەتى - خۆدەرخستن - ى ئەو بەڕێزەمان دەردەخات ، هەرچەندە لە هەموو قسەکانیدا دەیان جار (ئەزانى) واژەیەکە بەردەوام بەکارى دەهێنێ ، کە دەلالەتى بە کەم تەماشا کردنى بەرامبەرەکەى دەدات بە دەستەوە ، لە هەمان کاتیشدا بە بارتەقاى (ئەزانى) بە (وانیە) قسەکانى دەڕازێنێتەوە ، دیارە ئەمەش بەڵگەى بێمتمانەیى خۆیەتى بە قسەکانى!

نەک بە وردى ، بەڵکو سەرپێیى و هەڕەمەکیش لە قسەکانى ڕا بمێنین ، مارکس وەکو دەرۆزەکەرى بیرمەندایەتیى خۆى چاو لێدەکات ، لینین دیکتاتۆرە، ستالین و نازیزم هاوتاى یەک دەکات ، گاڵتە بە ماوتسى تۆنگ دەکات ، کیم ئیل سۆنگ توتالیتارە و کاسترۆش هەر مەپرسە ! کەسێک ناهێڵێتەوە تروسکایى تێدا بێت ، خودا ڕەحمى کردووە گیڤارا نەماوە ئەگینا بەویشدا هەڵدەشاخا ، ئیستیهزا بە مێژوو دەکات و واقیع بەتاڵ دەکاتەوە و ڕەخنەگرانە لە ڕابردوو ناڕوانێت ، حیزبى شیوعى ؟؟؟ پارتى دیموکراتى کوردستان ؟؟؟ کۆمەڵەى ڕەنجدەران و تەواوى حیزب و گروپەکان هیچ نەبوون و هیچ نین و هیچ نابن و زەڕبى هیچن! بۆ ئەمەشیان سەردەمى هەرزەکاریى خۆمم دەهێنێتەوە یاد کە لە قۆناغى ناوەندیدا خوێندکار بووم ، هەموو جار مامۆستا - حەسەن جاف - کە وانەى جوگرافیاى پێدەوتینەوە ئەم گۆرانییەى لەبەر خۆیەوە دەوت : (بەهارێ نەمرم کچێ خەجێ شایى و سەیرانە ، هاوینێ نەمرم کچێ خەجێ خەلە و خەرمانە ، پاییزێ نەمرم کچێ خەجێ گەڵاڕێزانە ، زستانێ نەمرم کچێ خەجێ بەفر و بارانە) ! ، لە دواییدا دەیووت : ئەى باشە ئاخر پێم ناڵێى بە تەماى کەى بمریت؟! بۆیە ئێستاش هەمان پرسیار لە مێشکمدایە ، کاک فاروقیش ئایدیۆلۆژیایەک ، فەلسەفەیەک ، حیزبێک و ئاراستەیەکى سیاسیى نامێنێ هەجووى نەکاتە سەر؟ بە بێ لەبەرچاو گرتنى دیالیکتیک ، ئەوەى خۆى لەگەڵیدا وێک نەیاتەوە ، دەبێت مەسخەرەى پێبکات ! جا خۆى و خوداى خۆى دەزانێت کێى بە دڵە و نەشتەرى لێنادات؟!

تەنها و تەنها یەکجار بۆ خوێى چێشت ، دواى لەتوپەت کردنى مونەزیر و موفەکیر و ئەنکیر و مونکیرەکان ، گوێبیستى بوومە و دەستى خێرى بەسەر یەک کەسدا هێناوە و وتەیەکى ئەوى بە نمونە هێناوەتەوە ، نەک ئەنجومەنى سەراى ئازادى ، ئەویش بەڕێز خاتو - ناسکە - ى هاوسەرى بوو ، بە هیوام بۆ جارێکیش بێت ، وەکو خێزانەکەى لە یەکێک لە خاوەن شاکار و فەیلەسوفەکان بڕوانێ و بۆ جارێک و بەس ! دانى خێر بەویشدا بهێنێت و بیخاتە ژێر ڕەحمەتى تیئۆرى فاروقیزمى بنەماڵەگەرییەوە ، چونکە ئەو لە باتى کورسیى دەسەڵات تەنها مایکێک هەبوو زەوتى بکات ، بەردەوام لە دەستى نەدەکەوتە خوارەوە ، وەکو بنەماڵەش ڕۆڵى هاوسەرەکەى لەبەر چاواندا دیار و ئاشکرا بوو لەو سەرایەى خۆى کردبووە دەمڕاستى جەماوەر بە دەنگدەرانى یەکێتى و پارتیشەوە ، لەو بڕوایەدام ئەو جورئەتەى ئەو ، زلحیزبەکانیش پەى پێنابەن و ڕێگەکەى پێنازانن زەفەرى پێنابەن.

ماڵپه‌ڕی هیوا ره‌ش