په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٧\٧\٢٠١٠

فاوڵى پەکەکە دەبینم، بۆ ئۆفسایدى تورک کوێرم.


هیوا رەش   


یەکێک لە دواڕێگە نەخوازراوەکانى خەبات بۆ وەدەست هێنانى مافە زەوتکراوەکان کە لە ئاکامى ستەم ، وەکو پەرچە کردارێکى ستەمگەرایى دەگیرێتە بەر ( تێکۆشانى چەکدارى ) یە ، ئەویش لە نەهامەتى بەولاوە هیچى لێ ناڕنین ، بەڵام سەرەنجام ڕێگەکە هەر دەگەڕێتەوە سەر مێزى گفتوگۆ ، ئەم ڕاستییە حاشا هەڵنەگرە و زۆر جاران ئێمەى کورد ناچار کراوین ڕێگاى بزووتنەوەى چەکدارى و پێشمەرگایەتى بگرینە بەر و بەو ڕێگەیەشەوە دوژمنمان یخ کردووە و ناچارى دانوستان و دانیشتنى سەر مێزى گفتوگۆمان کردوون ، ئەگەر خۆمان لە گێلى نەدەین و ئاووڕێک لە ژیانى پێشمەرگایەتى خۆمان بدەینەوە ، وەکو ئێستاى گەریلا وڵاتپارێزەکانى قەندیل گەلێک واقیعى تاڵمان چەشت لە ناو بزووتنەوەى چەکداریدا و بەرگەمان گرت ، ئەویش تەنها لە پێناوى بەرژەوەندى باڵاى نەتەوایەتیمان ، هێزى پێشمەرگە هێزێکى چەتە و ڕێگر و دزو پیاوخراپ و گیرفان پڕکەر ( موتەمەرید و موخەریب و غەوغائى و خائین و جاسوس ) و کرێگرتە و هەواڵگرى وڵاتان نەبوو ، کە بە تۆبزى بە سەر کۆمەڵًێک چەکداردا سەپێنرابێت بۆ وەدەست هێنانى دەسکەوت و دەسمایە ، هێزى پێشمەرگە هێزێکى ( شۆڕشگێڕ و داکۆکیکەر و ئاشتیخواز و نەتەوە و نیشتمانپەروەر ) بوو ، هەموومان خۆبەخش و ئارەزوومەندانە ڕیزەکانیمان تۆکمە کردبوو بۆ پاراستنى ناسنامەى نەتەوایەتیمان ، بەڵام ئەم دەورانە لە دواى تێکشکانى ڕژێمى بەعسییەکان بەسەر چوو ، لە جێى ئەو هێزە شۆڕشگێڕە بچووکە هێزێکى زەبەللاحى حزبیى بیشومارى بێتواناى داهات لووشکەر جێگەى گرتەوە و تەنانەت هەندێکیان بە هێزى بندیواریش ناو ئەبران ، وەلێ هێشتا ئێمە بەمەش ڕازین و قبوڵمانە هەرچەندە هەرچى بەرپرسى ناو ئەو هێزە هەیە پارتى و یەکێتى لە نێوان خۆیاندا برابەش بەشاندوویانەتەوە ، بێگومان بە هێزەکانى وەزارەتى ناوخۆشەوە ، بە پۆلیس و ئاساییشیشەوە ، ئەستەمە لە هەردوو وەزارەتى ناوخۆ و پێشمەرگەدا تەنها و تەنها یەک بەرپرسى بڕیار بەدەست بدۆزینەوە کە پیاوى حزب و ڕۆبۆتى بنەماڵە نەبن !

 

ئەم دوو هێزە لە شێنەییدا هەریەکەیان وەکو دوو دۆست و دوو دراوسێ و دوو خزمى یەک لەگەڵ یەکدا ڕەفتار ئەکەن ، وەزارەتى ناوخۆى سلێمانى و هەولێر ، وەزارەتى پێشمەرگەى هەولێر و سلێمانى ئەگەر چى بە ڕواڵەت برا بن بەڵام لە ناوەڕۆکدا بەیەکتر بێگانەن ، ئەوە باس لە فەرماندەیى لەشکرى کوردستانى هەولێرى پارتى و فەرماندەیى گشتى هێزى پێشمەرگەى کوردستانى سلێمانى یەکێتى ناکەم ، چش لە باسى دەزگاى دژەتیرۆر و ئاژانسى پاراستنى هەرێم کە هەم هەڕەشەن بۆ سەر ژیان و هەمیش هەڕەشەن بۆ سەر گیرفان ، چونکە ئینتیماى ئەم دەزگایانە هەموو کەس ئەیزانێت کە ئینتیمایەکى حزبییە بەر لەوەى ئینتیمایەکى نەتەوەیى و نیشتمانى بێت ، ئەم هەمو هێزە جگە لە شەڕى کورد قڕانى نێوانى خۆیان ، بۆ چاوساغى و پێش لەشکریى دوژمنانى گەلى کورد لە باکور و ڕۆژهەڵاتیش ڕۆڵێکى باڵایان گێڕاوە بۆ لەبار بردنى شۆڕشى ئەو دوو پارچەیە و لەناو بردنى ڕۆڵە شۆڕشخوازەکانیان . کەچى هەندێ زوڕناژەنى حزبیى گووپیان پڕ با ئەکەن و فوو بە زوڕنادا ئەکەن و خۆیان لە ڕاستییەکان گێل ئەکەن و بوونەتە چاوشى ئاهەنگى جینۆسایدى گەلەکەمان لە لایەن ڕژێمە کۆنەپەرستەکانى ئێران و تورکیاوە ، بەس لەبەر خەندەیەکى ژەهراوى دوژمنان بە ناوى ( کرانەوە ) کە مەبەست لێى ( کڕڕانەوە )ى گەلەکەمانە لە سەر خاکى خۆى و لەبەر خاترى پێشوازییەکى مەرام پەنهانى سەرۆک و بەرپرسەکانیان ئەیانەوێت ناوى گەریلا ناشرین بکەن ، و بێشەرمانە هەق بە دوژمنان ئەدەن کە لەشکرکێشیى ئەکەنە سەرمان و لە ئاستیاندا ڵاڵ و کەڕ و کوێرن بەڵام لە ئاستى مقاوەمەت و داکۆکى گەریلاکان بە عەدەسەى چاوەوە ناوەستن و زەڕەبینیش بەکار دەهێنن و خەتاباریان دەکەن و بە فاولى ناو دەبەن و ئاساییشى نەتەوەیى گەلەکەمان ئەبەستنەوە بە بۆندە بازرگانى و ئابورى و هەواڵگرییەکانەوە ، بە بێ ئەوەى ئاوڕێک لە ڕابردووى سەردەمى شۆڕشى خۆمان لە باشور بدەنەوە کە چۆن جاشە چڵکاوخۆرەکان ڕێزیان بە هەبوونى پێشمەرگەوە هەبوو ، تا بۆیان دەربکەوێت کە ئێستاش گەریلاکان و هێز و حزبە کوردستانییەکانى باکور و ڕۆژهەڵات نەبوایە ئێمەش ئەو ڕێزەمان لاى دۆست ەکانى ئەو نووسەرە دووسەر و دوو جەمسەرانە نەئەبوو کە بۆ پێشلەشکریى حزب ئامادەى لەشکرکێشیى بێگانەن جا چ بە کردەوە بێت یان بە قەڵەمى کوول و شکاو !

ئۆپەراسیۆن و کێوماڵ و لەشکرکێشیى بۆ سەر گەریلا تاوانێک نیە پاساوى بۆ بهێنرێتەوە ، گشت لایەکیشمان دەزانین کە تا ئێستا گەریلاکان چەند جار تاکلایەنە ئاگربەسیان ڕاگەیاندووە ، وەلێ ئەمە هیچى لە ناخى ڕەشى کەمالیستە شۆفینییەکان سپى نەکردۆتەوە و هەمیشە لە هەوڵدا بوونە تا کوشت و کوشتارى ئەرمەنەکان بەسەر گەلەکەماندا دووبارە بکەنەوە ، ئەگەر لە ڕووى یاساییشەوە بە ویژدانەوە هەڵسەنگاندن بکرێت ، لەبەر ئەوەى تورکەکان دێنە سەر ماڵمان و پەلامارمان دەدەن بێگومان ئەوان تاوانبارن ، ئێمە نە تورک بە کورد ئەزانین و نە خاکى تورکیا بە هى خۆمان ، ئێمە نە زمان نە فەرهەنگ و نە کولتور و نە کەلەپور و نە ڕۆشنبیرى ئەوانمان یاساغ نەکردووە ، ئەوە ئەوانن نکوڵى لە بوونى گەلێک دەکەن و ئەوانن شاڵاوى جینۆساید دەهێننە سەرمان و پەلامارمان دەدەن ، بۆیە مقاوەمەتى گەریلا نەک هەر ڕەوایە بەڵکو ئێمە قەرزارى ئەوانین و ئەگەر ئەوان نەبوونایە بوونى حکومەتێک بە ناوى هەرێمى کوردستانەوە بە تورکەکان قووت نەدەچوو ، هەر لە ترس و سۆنگەى گەریلاشەوەیە پێ بە جەرگى خۆیاندا ئەنێن و شەرمەزارانە و بە ناچاریى پێشوازى و گفتوگۆمان لەگەڵدا دەکەن لە پێناوى پاراستنى بەرژەوەندییە هەواڵگرى و سەربازى و بازرگانى و ئابورییەکانیان ، بۆیە پێویستە وێڕاى دەسخۆشیمان لە زەبرى ڕەواى گەریلاکان خۆمان بە قوربانى لوولەى تفەنگەکانیشیان بکەین چونکە ئەوان نەبوونایە تورکەکان بە تەنها چاویان نەدەبڕییە کەرکوکى ( دڵ و قودسى ) کوردستانى داگیرکراو بەڵکو ئێستا بەرەى تورکمانى گەمەى بە موقەدەراتى بەشە ئازادەکەى کوردستانیشەوە دەکرد ! لام وایە ئەو کاتە زوڕناژەنەکان جۆرێکى تر فوویان بە زوڕناکانیانەوە دەکرد و لە ئاهەنگى تەتریک ى کورداندا گاوانى و سەرچۆپى بە دەستى خۆیانەوە دەبوو و لەوانەبوو لەسەر ژمێریشدا خۆیان بە تورک مان لە قەڵەم بدایە و شێخ سەعیدى پیران و قازى محەمەدیشیان بدایەتە بەر نەشتەرى ڕەخنە مەبەستاوییەکانیان .

ئەمە لە ویژدانى کێدا جێى دەبێتەوە ، تورکەکان لە هێرشى بەرەو ڕوو لووتیان شکاوە ، دەیانەوێ لە باشورى کوردستانەوە خەنجەرى ژەهراوى لە پشتى گەریلا بوەشێنن ، بە تۆپ و ڕۆکێت فڕۆکەوە سەدان کەسى سڤیلیان ئاوارە و شەهید و بریندار کردووە ، هەزاران دۆنم زەوییان سووتاندووین ، گەریلاش پێش لە پێشڕەوى سوپا بێشومارەکەیان و هێرشە دڕندانەکەیان دەگرن ، هێشتا کردارى شۆڕشگێڕانەى گەریلا بە فاوڵ بزانرێت و ڕەفتارى فاشیستانەى قەرەگول و میت پێى نەووترێت ئۆفساید ؟ ! ئەمەیە دەڵێن :

تا خاوەن ماڵ دزى گرت ، دز خاوەن ماڵى دایە دادگا.

ماڵپه‌ڕی هیوا ره‌ش