٢٢\٨\٢٠١٤

    فریشتەیەک کە هەرگیز

  لە ئاسمانی مندا ون نابێ.

ئەفسانە سروش

       بۆ چله‌ی مەرگی سارا.

ئەوە چل ''رۆژ و چەندە''

من و خەمی ئەو سەفەرە ناوەختەت
لەگەڵ شەوانی پڕ بوغزی نەهاتنەوەتدا
خۆیان بە دیواری رازی رەشی چاوەکانمدا
هەڵواسیوە.
چل رۆژ و چەنده‌؟
مانگ و خۆر و پەنجەرە و دیوار
دەریا و ئەستێرەکان
لەو سەفەرەت دڵشکاون
ئەوە ''چل رۆژ و چەندە''

با لە کۆڵانەکانی ئەودیوی خەندەکانت
هەموو رۆژیک دانە دانە خەمی دزینی پەنجەکانت
دەکاتە خەناوکە و

دەیکاتە ملی

ئەندێشەی سەمای خەندەی سەر لێوەکانت
ئەوە چل رۆژ و چەندە؟
ئەگەرچی وا دیارە نایەیتەوە و چاوەڕێتم
تا هەزار چل رۆژی تر
چاوەڕوانت بم؟
باوڕ ناکەم چاوەکانت بکەونە سەر
ئەو هەموو ئارەزووانەی
قەتیس ماون تێیاندا.
ناکرێ
ناکرێ نا کە تۆ نەبی و
ئاسمان ساف بێ و دڵی ئەویشت
بەڵێ، دڵی بیەشێ
ئارام به‌!
ئەی تۆ چۆن فستانی مردنت پۆشی
ئەوە کامە ئاسمانە
بۆتە تارای شۆڕی
سەر پرچە خاوەکەت؟
کامە بادە و کام شەرابی زۆر تاڵ بوو

ئاوا مەستی ئامێزی مەرگی کردی؟

ئاوا لە ئامێزی مەرگ کردی بە تراویلکە؟
لە کامە درزی ئەو خاکەدا
خونچەی حەزی ئەو سەفەرەت

شکۆفەی کرد

کەوا ئێمە و ئەویشت

سپاردە دەستی تەلیسمی
نەشکاوی هاتنەوەت سارا.

٢١\٨\٢٠١٤ - رانیه‌
ماڵپەڕی ئەفسانە سروش