٢٩\٤\٢٠١١

     گه‌ڵا سه‌وزه‌كان

  وا خه‌ریكن هێدی هێدی كاڵ ببنه‌وه‌!

خالید شه‌یدا

قه‌ت ئه‌وه‌م ره‌چاو نه‌ده‌كرد

به‌م به‌هاره‌ خۆش و ته‌ڕه‌

ئه‌و داره‌ جوانه‌ی به‌رماڵمان

كه‌ پڕ بوو له‌ گه‌ڵای سه‌وز و

           له‌ به‌رائه‌ت و

                 سۆز و خۆشه‌ویستی

     وا خه‌ریكه‌ هێدی هێدی

     ره‌نگ و روخساری زه‌رد هه‌ڵگه‌رێ

     ئه‌و گه‌ڵا سه‌وز و جوانانه‌ی كاڵ ببنه‌وه‌،

ئه‌و داره‌ی

له‌وه‌تی خۆره‌تاوی لێ دووره‌

    هێز و گوڕی تیا نه‌ماوه‌

هه‌ره‌كه‌ تێنووشی ده‌بێ

           ئاوه‌ نییه‌ بیخواته‌وه‌

له‌وه‌تی دڕكوداڵ له‌ ده‌وریا رواوه‌

    رۆژ له‌ دوایی رۆژ

        هه‌ر لار و لاواز و

                  بنێس ده‌بێ،

گه‌ر وا بڕوا

ئه‌و داره‌ هه‌رگیز جارێكی تر ناژێته‌وه

       له‌ ره‌گ و ریشه‌وه‌ ووشك ده‌بێ.

28\4\2011 - هانۆڤه‌ر

ماڵپه‌ڕی خاڵید شه‌یدا