|
گەر فریانەکەوین
مۆبایل جینۆسایدمان دەکات.
فەرهەنگ جه‌لال
وەک دەبینین ئەمڕۆ لە کوردستان کەم کەس هەیە مۆبایلى تایبەتى خۆى نەبێت
،چونکە تەکنەلۆجیایەکى سەردەمەو نوێیە بۆتە ئامێرێکى گرنگ و پێویستى
ئەم سەردەمە ڕەنگە ئەمەش بگەڕێتەوە بۆ هەرزانى نرخەکەى کە بە ئاسانى
دەستەبەر دەکرێت ، بۆیە لەم ڕوانگەیەشەوە دەتوانین بڵەین تاکە ئامێرێکە
بەهۆى بچووکى قەبارەکەى و چەندین تایبەتمەندى تر تەنیا بۆ یەک کەس
بەکاردێت ، هەرچەندە ئێمەى کورد ئەم ئامێرەمان کردووە بە بۆمبێک کە بە
خۆمان و خۆشەویستانمانا دەیتەقێنینەوە ، بەڵام بە داخەوە ئێمەى پیاو
زیاتر بە شێوەیەکى سلبى بەکارى دەهێنین بۆ شکاندنى شەرەفى خەڵکى کە لەو
بڕوایەشدام قوربانى دەستى یەکەمیش لەم گێژاوى تەکنەلۆجیایەدا ئافرەتە .
وەک سەرجەممان ڕۆژانە گوێبیستى کێشەى گەورەى خێزانى دەبین ، کۆمەڵگەى
ئێمەش کۆمەڵگەیەکى ڕۆژهەڵاتیە کە بەهۆى ئامێرى مۆبایلەوە لەم دوایەنەدا
کێشەى زۆر سەرى هەڵداوە و ڕووى لە زیاد بوونە کێشەى زۆرى لە ناو
خێزانەکاندا دروست کردووە بە جۆرێک کە تاڵترین و ناخۆشترین ڕووداوى
لێکەوتۆتەوە وە لە ئەنجامدا بۆتە هۆى لە دەست دانى دەیان کچ و کوڕى ئەم
کوردستانە ، بە بڕواى من ئەویش دەگەڕێتەوە بۆ هەڵە بەکارهێنانى لە
لایەن خۆمانەوە ، بۆیە دەبێت مۆبایل کەسى تێگەیشتوو بەکارى بهێنێت نەک
بۆ منداڵ یان هەرزەکارێک چونکە لە ئەنجامدا تووشى کێشە دەبێت ، وە
هەمیشە لەم کۆمەڵگایەى ئێمە جیاوازى هەیە لە نێوان ژنان و پیاوان ئەمەش
ئەوە دەگەیەنێت کە بەداخەوە لەم بوارەشدا هیچ کاتێک ئافرەت ناتوانێت
وەک پیاو بە ئازادى هەڵسوکەوت بکات چونکە هەمیشە لە ژێر چاودێریەکى
بەردەوامدایە ، جگە لە لایەنى ئابووریش کە ڕۆڵێکى سەرەکى دەبینێت لەم
بوارەدا لەبەر ئەوەى ئەو دەسکەوتى ماددیەى کە پیاو هەیەتى بە ڕێژەیەکى
زۆر کەم ئافرەتان هەیانە بۆیە داهاتی ئافرەت سنووردارە ، هەرچەندە وەک
دەبینین ژنان کەمتر ئازادن لە بەکارهێنانى وەک لە ڕەگەزى بەرامبەریان ،
خۆ ئەگەر ئەو ئامێرەشیان هەبێت ئەوا بێگومان کە چاودێرى دەکرێت جا چ لە
لایەن برا یان باوکەوە یان هاوسەرەوە بێت ، تەنانەت هەندێ جار لە کاتى
زەنگى مۆبایلدا کە بۆى دێت دەبێت بزانێت ئەو کەسە کێیەو بۆچى تەلەفۆن
دەکات !
بە داخەوە ئەم ئامێرەمان زۆر بە زوویى پێشوازى لێکرد بەڵام زۆربەشمان
سەرنەکەوتین لە بەکارهێنانى وە بگرە لە سوودى ئەو تەکنەلۆجیا
بچووکەشمان نەزانى ، لەبەرئەوە پێویستە دەسەڵات و لایەنى پەیوەندى دار
و کۆمپانیاکانى مۆبایل لە ڕێگەى ڕاگەیاندنەکانەوە و وە هێنانى پسپۆرى
تایبەت لە بوارى کۆمەڵناسى و دەروونناسى تاکو ئەم ئامێرە بە سوود
وەرگرتن بە کاربهێنین وە مەرجى کڕینى ئەو خەتەى کە لە کۆمپانیاکاندا
هەیە تەمەنى سەروو هەژدە ساڵ بتوانێت بیکرێت و داواکاریشم دەسەڵات
بەڕێوەبەرایەتیەکى تایبەت بەم بوارە بکاتەوە بۆ چارەسەر کردنى ئەو
کێشانەى کە لە ئەنجامى مۆبایل دروست دەبێت.
با چیتر ئەو نەخۆشیە کۆشندەیە ڕوونەکاتە سەرجەم ماڵەکانمان ، بۆ ئەوەى
هەر هیچ نەبێت لە بەهاى ئەم تەکنەلۆجیایە کەم نە کەینەوە .
سلێمانى
Farhang_jalal@yahoo.com
Farhang_jalal@hotmail.com
|
