|
گروپی(ف)و تیرۆری سۆرانی مامەحەمە.
ڕێبوار عارف
ژمارە 144ی بڵاوکراوەی هاوڵاتی چاوپێکەوتنێکی لەگەڵ کەسێک بەناوی (
ئازاد فاتع ڕەحیمی ) ئەنجامداوە لە پەیوەند بە ئەرکێک کە دەزگایەکی
ئەمنی یەکیتی نیشتمانی کوردستان پێیان سپاردووە، سەبارەت بە تیرۆرکردنی
کەسێک کە گوایە ئەمیرێکی ئەنساروئیسلامەیەکانە. جێگەی خۆیەتی لەمبارەوە
هەڵوێستەیەک بکەین وچاوێک بەم ڕووداوەدا بخشینین.
لەو چاوپێکەوتنەکەدا ( ئازاد فاتع ) ئاماژەی بەوەکردوە کە پێشمەرگەیەکی
دێرینی یەکیەتیەو یەکێک لە کادرە دیارەکانی دەزگایەکی ئەمنی یەکیەتی
نیشتمانی کوردستانە لە شاری کرکوک کە تائیستە چەندین کاری تیرۆریستیان
ئەنجامداوەو ئێستە زیاتر لە ساڵێکە لە زیندانی ئاسایش هێلاویانەتەوە
بەبی ئەوەی کە ڕێگەی پێ بدرێت نە پارێزەربگرێت و نە هیچ کەسێک سەردانی
بکەن. ناوبراو لەم چاوپێکەوتنەدا چۆنیەتی داستانی تیرۆرکردنی کەسێک
دەگێڕێتەوە کە بە فەرمانی دەزگایەکی ئەمنی نهێنی یەکیەتی نیشتمانی
کوردستان پێَی هەستاوە.
( چیرۆکە سەرسوڕهێنەرەکە لێرەوە دەستپێدەکات کە ڕۆژێک کارێکی پێدەسپێرن
و وەک خۆی باسی دەکات پاش سێ مانگ بێنەوبگرەو چەند دانیشتنێک لەسەر ئەو
مەوزعە ڕیکەوتوون. ئازاد دەڵێ: پێیانووتم کابرایەکی ئەمیری تیرۆریست
هەرجارەی بەشێوەیەک دێتە ناو کەرکوک، ئێستا ئەندامێکیان بەناوی مەلا
مەحمود سێ ڕۆژە گیراوەو ئەو ئەمیرە مەوعیدی لەگەل مەلا مەحمود هەیە،
بەلام ئەمیرەکە مەلا مەحمود ناناسیت .. ئازاد فاتح ئاماژەی بەوەکردوە
کە دەزگا ئەمنیەکە ڕایانسپاردووە لەگەل ( ف ) بڕۆن خۆیان بە مەلا
مەحمود بەو کەسە بەحساب ئەمیری ئەنساروئیسلامە بناسێنن،.. سەرئەنجام
بەپێی نەخشەیەکی پێشتر ئامادەکراو کەسێک کەبەحساب ئەمیری گروپێکی
تیرۆریستی بووە دەکوژن. پاشان ئازاد دەگێڕێتەوە کە چۆن لە دادگای بۆی
دەرکەوتووە کە دەزگا ئەمنیەکە کەسێکی تریان پێکوشتووە نەک ئەمیری
گروپێکی تیرۆریست. دواین پەیام و داواکاری ئازاد لەکاتی دادگای کردنا
بەم شێوەبوو :(( .... ڕاستە من ئەمڕۆو سبەی لەسەر ئەم قەزیەیە حوکم
دەدرێم ، بەلام با ئەمە دووبارە نەبێتەوە لەناو کۆمەلدا، کە حیزبەکەم
کلاوی کردووەتە سەرم)).
وێنەکانی پشت ئەم ڕووداوە بە کوێمان دەگەیەنن ؟
لەکۆمەڵگایەکدا کە بەفراوانترین شێوە تارمای تووندوتیژی ژیانی
هاولاتیانی هەرسانکردبێت و نائەمنی لە هەموو ئاستە سیاسی و کۆمەلایەتی
و ئابوری و فەرهەنگیەکاندا تەنگی بە ژیانی خەڵک هەڵچنیبێت، ئەوا وەک
ئێستە ئەوەی کەبە گۆشت وپێست ئیسقانی خۆمانەوە هەستی پێدەکەین
پەلهاوێشتنی تیرۆر، کوشتن، ڕاونان، بۆردمان، لەشکرکێشی، گەمارۆ،
تەقینەوە، هەلاوسان، گەندەلی تا نەبوونی ماف و ئازادەیە فەردی و
مەدەنیەکانیەکان باڵ دەکێشێت بەسەر ژیانی هاولاتیاندا. بۆیە ئیتر
قسەکردن لەڕوداوێکی وەک تیرۆرکردنی کەسێک ڕەنگە زۆر جێگەی بایەخپێدان
نەبێت. بەلام مخزاوپەیاِمەکانی پشت ئەم ڕووداوە پێویستە زۆر هۆشیارانە
سەرنجی بدرێت و ڕاگوزەرانە بەسەر جەستەی قوربانیەکانیدا تێنەپەڕین و
هەر لێرەشەوە پێویستە بە قوڵی لە پەیام و دەرئەنجامە شاراوەکانی تری
ئەم ڕووداوە ووردبینەوە.
دەکرێت لەو پرسیارگەلەوە دەست پیًبکەین کە ئاخۆ پەیوەندی تیرۆرو
یەکیەتی نیشتمانی کوردستان چیە ؟ ئەگەر یەکیەتی خوازیاری حکومەتێکی
مەدەنیە، ئەگەر یەکیەتی خوازیاری سەروەری یاسایە، ئەگەر یەکیەتی
پڕوپاگه‌نده‌ی دیموکراسیەت دەکات ئەگەر یەکیەتی... ئەوا دەزگای تیرۆری
بۆچیە ؟ کەواتە سەرەتا وەلامدانەوە بەو پرسیارەی کە ئاخۆ پەیوەندی
نێوان ( یەکیەتی وتیرۆر ) چیە ؟ دەکرێ وەک کلیلی چوونە نێو باسەکە
تەماشابکرێ. پرسیارەکە ئەوه‌یە کە ئایا یەکیەتی نیشتمانی لەپاڵ هەموو
پڕوپاگه‌نده‌کانی خۆیدا پەنای بۆ کاری تیرۆرو تیرۆریستی برودوە ؟
وەلامی ئەم پرسیارە نەک هەر ئەمڕۆ لە زمانی یەکێک لەو کەسانەوە پەردەی
لەسەر لادەبرێت کە خۆی بە فەرمانی دەزگایەکی ئەمنی پێی هەڵساوە، بەڵکو
لە ڕاستیدا تیرۆر چەکێکی تەمەنی درێژو یارو یاوەری یەکیەتی بووە.
کەبەدلنیای بەشێکی زۆری خەڵکی کوردستان دوورو نزیک ئاگاداری کارنامەی
سیاسی یەکیەتی نیشتمانی کوردستانن ئاگادارن کە چۆن لەهەر قۆناغیکی
جیاوازدا بەپاساوی جیاواز چەکی تیرۆریان بۆ دەستەبەرکردنی ئامانجەکانی
خۆیان بەکارهیناوە. جێگەی خۆیەتی لێرەدا چەند نموونەیەک لەئەرشیفی
کارنامەی ئەم هێزە دەربکێشین کە زیاتر لە چارەکە سەدەیەک بەر لەئێستە
ڕوویداوە. ڕەنگە زۆرێک لە ئێمە لەیادی مابێت کە کۆتای سالانی حەفتاکان
وسەرەتای هەشتاکانی سەدەی رابردوو هێزی چەکداری یەکیەتی لە شاخ بڕیاری
کوشتن و تیرۆرکردنی ژمارەیەک لە ژنان و کچانی شارەکانی کوردستاندا
بەبەهانەی بێڕەوشتی و گومان لێکردنیان بەوەی کە گوایە سیخورن و سەربە
بەعسن. لەمبارەوە ئەم کارە بە ریکخستنەکانی ناو شار سپیردراو بێگومان
زۆرێک لەو هاوڕێ و دۆستانەی کە سەربە ڕێکخستنەکانی یەکیەتی و بەتایبەت
کۆمەڵەی ڕەنجدەرانی کوردستان بوون، کێشمەکێش و راوەستانەوەکانی ئەو
سەردەمەیان لەیادە لە پەیوەند بە کوشتن و تیرۆرکردنی ئەو ژن و کچانەی
کە ناوەکانیان لەشاخەوە دیاری کرابوو بۆ تیرۆرکردن.
بەلام لەپال هەموو نارەزایەتیەکانی ئەو ڕۆژگارەشدا سەرئەنجام تا ئەو
شوینەی کە من ئاگادارم لەشاری هەلەبجە تەقە لە چەند ژنێک کرا کە
دوانیان بەناوەکانی ( س ، گ )ەوە بوو... ئەو سەردەمانە کوشتن و تیرۆری
ئەم بەشە لە ژنان بەپاساوی پاکردنەوەی ڕیزەکانی گەل بوو لە جاسووس و
کەسانی بێ رەوشت وخراپ . قۆناغی دواتر پەنابردنی یەکیەتی بوو بۆ هەر
ڕەوشتێکی ناسیاسیانە دژ بەو جولانەوەی کە بەناوی عیراقچیەکانەوە خستیە
ڕێ هەر لە چەککردن و سووکایەتی پێکردن و سزادان و ((ترۆکردن ))و
دەسبەسەرکردن و ئەشکەنجەوە تا پەنایان بردن بۆ لەناوبردن و تیرۆرکردنی
مغالفینی سیاسی خۆیان کە خوێنی ئازادی مەلاو کوشتنی وریا ڕەش بە تەور
نموونەیەکی تری ئەو ڕاستیانەن کە (تیرۆر) چەکێکی هەمیشەی یەکیەتی
نیشتمانی کوردستان بووە لەسەرەتای دەستبەکاربوونیانەوە تا ئەمڕۆ.
گاڵتەجاری پاساوی ئەم کردەوانە لەوەدابوو کە پاساوەکانی ئەو سەردەمانە
بۆ کوشتن وتیرۆرکردنی مغالفینی سیاسی خۆیان بە ( پاکردنەوەی ڕیزەکانی
شۆڕش لە کەسانی خائین بە گەل و شۆرش لەقەلەم دەدا ).
بێدەلیل نیە بەلام ...
بێدەلیل نیە کەپارتی و یەکیەتی لەوپەڕی هەوڵوتەقەلای خۆیاندان بۆ
پەلکێشکردنەوەی حیزبی بەعس بۆ سەر شانۆی سیاسی و شەرعیەت دانەوە
بەوهێزەی کە گۆشەیەک لە کارنامەی دەسەلاتداریەتیان بەخۆینی سەدان هەزار
ئینسانی ئەنفالکراو، کیمیاباران کراو، ئیعدام وگولەبارانکراو
تۆمارکراوە. ئاخر بەعس پەلکێشکرێتەوە یا نا ئەمان لە سەروساماندان و
وەفاداربوون بۆ یاساو ریساو داب ونەریتەکانی بەعسدا کەمیان نەهێناوە و
داهینانیان لەخۆنیشانداوەو جیاواز لە ڕەسمیەت پێدانەوە بە یاساو
ڕێساکانیان، لەگەلێک ڕەوشت و ڕێگەی دەستەلاتداریەتی بەعس بەهرەمەند
بوون. ئاخر ئەمڕۆ لە کوردستان تەنیا دەزگاکانی زانیاری و پاراستن
لەباتی مخابەرات و ئستخباراتی بەعس نیە بەڵکو دروست کردنی دەزگای ئەمنی
وتیرۆریستی لەسەردەمی لوتکەی دەسەلاتداریەتیاندا. کەواتە ئەنجامدانی
تیرۆر لە فەرهه‌نگی سیاسی یەکیەتی نیشتمانی کوردستاندا لە هەر
قوناغێکدا تیرۆری خۆی هەیە وەک باسمان کرد سەردەمانیک خۆینی ژنان حەلال
دەکەن بەپاساوی ئەوەی کە ڕیزەکانی گەل لە جاسووس و بێروشتەکان
پاکینەوەو لە قۆناغیکیتردا کوشتن و تیرۆری مغالفینی سیاسی بە پاساوی
پاکردنەوەی ڕیزەکانی گەل و شۆرش لە کەسانی خائین و لادەرو دژی شۆرش لە
قوناغی ئەمڕۆشدا بەکارهێنانی چەکی تیرۆر بۆ هێشتنەوەو پاراستنی
دەسەلاتیان.
بێدەلیل نیە کە یەکیەتی نیشتمانی و ئەم حزبە دەسەتدارانە سالەهایە بە
تەوای مانا شانی خۆیان لە کوشتن و تیرۆرکردنی هەزاران ژن لە کوردستاندا
خاڵی کردوەتەوەو کەمترین پەرچەکردار لەخۆیان نیشان نەداوە، ئاخەر ئەگەر
بێتو دەست بەرن بۆ کردنەوە فایلی تیرۆری ژنان لە کوردستان ئەوا ئەوان
وەک داهێنەری ئەم نەریتە پشکی شێریان بەردەکەوێت کە ڕەنگە ئەو خەلاتە
زۆر بە قازانیجان نەبێت.
هەربەو مانایەش بێ دەلیل نیە کە پارتی و یەکیەتی لەبەرامبەر بە تیرۆرو
مەرگی سۆرانی مامە حەمەدا قۆلترین بێ دەنگی و خۆکڕکردنیان لەخۆیان
نیشانداوە. هەرلێرەوە جاریکیە سەرنجتان بۆ دانپیانانەکەی ئازاد فاتح
ڕادەکێشمەوە کەباس لە ئەنجامدانی چەندین عەمەلیات و تیرۆرکردنی چەندین
کەس دەکات .... ئایا ئەو دانپانانە ئەو پرسیارە ناوروژێنێت کە بلین
ئایا هەر گروپەکەی ( ف ) و گروپە هاوشیوەکانیان نین کە بە فەرمانی
دەزگا ئەمنیەکانی ئەم حزبانە دەکەونە گیانی ئەو کەسانەی کە لەسەر ((ئەمنیەتی
قەومی)) مەترسیان هەیەو تیرۆریان دەکەن؟ کەواتە تا ڕۆشنکردنەوەو یەکلای
کردنەوەی فایلی مەرگ وتیرۆرکردنی سۆرانی مامە حەمە تەنیا ڕێگە بەرپرسی
کردنی دەسەلات و حیزبە سیاسیەکانیانە بەشێوەیەک گوشارێکی گەورە لەسەر
ئەم حیزبانە دابنیریت بۆ ناساندنی تاوانباران بەرلەوەی کە چاوەران
بکەین لە ئایندەیەکیتردا، ئازاد فاتحیکیە پەردە لە ڕووی تاوانێکی تری
دەزگا ئەمنیەکانی ئەم حیزبانە هەڵبداتەوەو دانبنی بە تیرۆرکردنی سۆرانی
مامە حەمەدا بنێت .
r-arif@welho.com
|
