١٩\٤\٢٠١٣

راگەیاندنی ''گرووپی مۆر بۆ گەڕاندنەوەی شکۆ بۆ مرۆڤ''.

بۆ بەردەم:

رای گشتی، پەرلەمانی کوردستان، حکومەتی هەرێمی کوردستان،

رێکخراوەکانی کۆمەڵگەی مەدەنی، دەزگاکانی راگەیاندن.

بابەت/ راگەیاندنی گرووپ.

سڵاو...
ناو/ گرووپی مۆر

ناسنامە/ پێکهاتووین لە چەند ژنێک لە بواری پرسی ژنان و مافی تاک و جیاوازی نەکردن لەسەر بنەمای رەگەزی کارمان کردووە، لە بەر رۆشنایی چاودێری بارودۆخی مافەکانی مرۆڤ و بەتایبەت ژنان، ئەو توندوتیژییە زۆرەی رووبەڕووی ژنان دەبێتەوە، هەروەها هەموو ئەو پێشێلکاریانەی بەرامبەر تاکەکان ئەکرێن وەک هەستکردن بە لێپرسراویەتی کۆبوینەتەوە تا لەسایەی گرووپێکدا کار بۆ بڵاوکردنەوەی کلتوری نتوندوتیژیی ومرۆڤدۆستی بکەین و هەڵ بدەین بە رێگای جۆراو جۆری مەدەنی کۆمەڵگە بەماف و ئازادیەکانی تاک ئاشنا بکەین.

دروشممان/ گەڕاندنەوەی شکۆ بۆ مرۆڤ.

دەستپێک:

توندوتیژیی دیاردەیەکی بەرچاوی کۆمەڵگەی کوردیە، بە پاساوی ئەوەی ئەم دیاردەیە لەگەڵ مێژووی مرۆڤایەتیدا هەبووەو لەهەموو کۆمەڵگایەکدا بوونی هەیە هەندێجار چاو پۆشی لێدەکرێت، ئەوەی لە کاتی ئێستا و لەم سەردەمەدا لە کوردستان دەگوزەرێت لەژمارەدا زۆرو لە شێوازو جۆردا هەڵکشانی بەخۆوە دیوە، هەر چەند ئەستەمە بتوانرێت ئاماری وورد بۆ ئەم دیاردەیە بخرێتەڕوو لەبەر ئەوەی تا ئێستا هەموو توندوتیژیی و کەیسێک بەرەو یاسا ناڕوات و چارەسەرکردنیان یا راستتر شاردنەوەیان لە بەر هۆکاری کۆمەڵایەتی و بوونی تارمایی لەسەر سەروەربوونی یاسا، بەڵام رۆژانە رووداوو توندوتیژیی دڵتەزێن دەبینین و لە کەناڵەکانی راگەیاندن و تۆڕە کۆمەڵایەتیەکانیش نموونە و وێنەی زۆر تراجیدی دەبینین، بێجگە لەوە کەلتوری توندوتیژیی لە زۆر بواری تری وەک سیاسی و پەروەردەیی ... تاد بووەتە دیاردەی باو.

ئێمە ئەمە بەمەترسی گەورە بۆ سەر کۆمەڵگەکەمان دەزانین و بەشێک دەبین لەهەوڵی بڵاوکردنەوەی کلتوری نتوندوتیژیی و مرۆڤدۆستی و مافی تاک، لە پێناو هاتنە ئارای کۆمەڵگەیەکی تەندروست و دوور لە توندوتیژیی، هەروەها داواکارین دادگاو یاسا سەبەخۆو سەروەر بکرێت و هەموو تاکەکان بەرامبەر یاسا یەکسان بن و ئامانجەکانمان بەگشتی لەم خاڵانەدا دەخەینەڕوو:

ئامانجمان:

١- کارکردن بۆ بڵاوکردنەوەی هوشیاری کۆمەڵایەتی، بەمەبەستی رووبەڕووبونەوە ی جیاکاری رەگەزی.
٢- ناساندنی کۆمەڵگە بە بیری نتوندوتیژیی و مرۆڤدۆستی و بەرزراگرتنی شکۆمەندی مرۆڤ.
٣- بەدەستهێنانی رایگشتی بۆ پاڵپشتی لە پرسی ژنان و ئەو پرسانەی شکۆی تاکەکان دەخەنە ژێر پرسیارەوە.
٣- چاودێری و بە دواداچوون بۆ ئەو یاساو بڕیارو بەڵێنانەی بۆ پرسی ژن دەردەچن.
٥- هەڵسەنگاندنی ئەو دامەزراوانەی بۆ پرسی ژن دامەزراون، نیشاندانی لایەنە ئیجابی و سلبیەکان و دەستنیشانکردنی کەموکورتیەکان و خستنەرووی پێشنیاز بۆ کاراکردنیان یان بە رەمزی نەمانەوەیان.

بانگەواز:
بانگەوازی هەموو ئازادیخوازێک دەکەین بە هەر جۆرێک دەتوانن هاوکاریمان بکەن بە سوپاس و پێزانینەوە پێشوازی لێدەکەین بۆ پەیوەندی بە ئەندامانی گرووپەوە لە رێگەی ئەم ئیمێلەی لای خوارەوە.

لەگەڵ رێزی ئەندامانی گرووپ:
چلورە هەردی

چیمەن محەمەد رەشید
سۆز عەبدولقادر

سەمیرە محەمەد
سەیران عەبدوڵا