په‌یوه‌ندیپه‌رتووکخانه‌ئێمهلینکئه‌رشیفنووسه‌رانده‌سپێک

٥\٣\٢٠١٠

گۆڕان چی ده‌‌گۆڕێ ؟!

مه‌حمود ئه‌حمه‌د 


دوای شه‌ق بوون و جیا بوونه‌وه‌ی کۆمپانیای ووشه‌ له‌ یه‌کێتی نیشتیمانی کوردستان له‌ناو ده‌یان ته‌م و مژی سیاسی دا ، ئه‌مڕۆ گۆڕان سوار شه‌پۆلی هه‌ڵگه‌ڕانه‌وه‌و ناڕه‌زایه‌ته‌کانی جه‌ماوه‌ری خه‌ڵکی کوردستان بووه‌ که‌ له‌ دژی ده‌سه‌ڵاتی پارتر ڕه‌نگاوڕه‌نگه‌کانی کوردی دا ده‌نگیان به‌رزکردۆته‌وه‌.. سه‌رکردایه‌تی و به‌رپرسانی شه‌ریکه‌ به‌شی دوێنێ ، ئه‌مڕۆ خۆیان قوت کردۆته‌وه‌و له‌سه‌ر ناڕه‌زایه‌ته‌کانی خه‌ڵک و خه‌ریکن خۆیان بکه‌نه‌ سومبول و فریاد ڕه‌سێکی مرۆیی و ، خه‌ریکن خۆیان بێبه‌‌ری ئه‌که‌ن له‌هه‌موو ئه‌و تاوانانه‌ی که‌ده‌رهه‌ق به‌خه‌ڵکی کوردستان کراوه‌ له‌ماوه‌ی 18 ساڵی ده‌سه‌ڵات و حوکمڕانیاندا ....


تۆمه‌ت بارکردنی هه‌ردوولا به‌هێنانه‌وه‌ی به‌ڵگه‌و سه‌نه‌دی نامرۆیی له‌ ڕابردوویاندا به‌رامبه‌ر به‌ خه‌ڵکی کوردستان که‌ خه‌ریکن په‌رده‌پۆشی ده‌‌که‌ن و ئه‌یکه‌ن به‌ژێر لێوه‌وه تا خه‌ڵک ئاگادار نه‌بێته‌وه‌ له‌ کارو کرده‌وه‌ی چه‌ندین ساڵه‌یان ، کارنامه‌و باگراووندێکی سیاسی ڕه‌شه‌ که‌ ئیتر ناتوانن هه‌روا ئاسان هۆش و چاوی کراوه‌ی خه‌ڵک له‌ئاستیاندا قه‌تیس و ناکام بهێڵنه‌وه‌ له‌ ناو ته‌پوتۆزو ڕه‌کلامی هه‌ڵبژاردندا...

 
ناڕه‌زایه‌تیه‌کانی خه‌ڵک له‌ چنگ و ددانی حیزبه‌ باڵا ده‌سته‌کانی کوردستان فرسه‌تێکی مێژوویی هه‌رزان به‌های بۆ سه‌رانی گۆڕان فه‌راهه‌م کرد که‌بتوانن له‌م ڕێگایه‌وه‌ هه‌رچۆن بووه‌ خۆیان به‌ هاوسه‌نگه‌رو هاوخه‌باتی خه‌ڵکی بێبه‌شی کوردستان بناسێنن و " براءة ذمة " ی خۆیان له‌ دادگای خه‌ڵکدا پێشکه‌ش بکه‌ن و ،هه‌موو تاوان و پێشێل کاریه‌کان بخه‌نه‌ ئه‌ستۆی به‌رامبه‌ره‌وه‌....


خه‌ڵکی کوردستان له‌بیریان نه‌چۆته‌وه‌ دوژمنه‌کانی ئه‌مڕۆی یه‌کێتی نیشتیمانی که‌ ئه‌مڕۆ خۆیان خزاندۆته‌ سه‌نگه‌ری خه‌ڵک و هاواری گۆڕان ئه‌که‌ن به‌شێکی گرنگ و حه‌یاتی بوون له‌ هه‌یکه‌له‌ی گشتی وتایبه‌تی له‌هه‌موو بڕیارو هه‌ڵوێسته‌ ستراتیژی و مه‌بده‌ئیه‌کان له‌ ناو ی . ن . ک دا...

 

دوژمنه‌کانی ئه‌مڕۆ هه‌رئه‌و پایه‌به‌رزو ده‌سه‌ڵاتدارانه‌ی دوێنێ ی ناو ڕیزه‌کانی ئه‌وان بوون که‌ ڕاسته‌وخۆ به‌رپرسی هه‌موو ئه‌و پێشێل کاری و نان بڕین و گرتن و کوشتنه‌ یه‌ک له‌دوا یه‌کانه‌ بوون که‌ به‌ ئاشکراو په‌نهانی ئه‌نجامیان داوه‌ له‌ماوه‌ی چه‌ند ساڵی ڕابردوودا .. حیکمه‌تی ئه‌م تیشکی مه‌عریفه ‌و مرۆدۆستیه‌ به‌مه‌به‌ستی ئاڵ و گۆڕ به‌ قازانجی خه‌ڵکی کوردستان بۆچی چه‌ندین ساڵه‌ دیارنه‌بوو ، وه‌ هۆی چی بوو کارو کرده‌وه‌ی زاته‌ گه‌وره‌و بچوکه‌کانی ناو پارته‌ ده‌سه‌ڵاتداره‌کانی کوردستانیان که‌شف نه‌ئه‌کرد و ، خه‌ڵکیان له‌ هه‌ڵوێست و کاروکرده‌وه‌ی نامرۆییان ئاگادار نه‌ئه‌کرده‌وه‌ ؟! ئه‌گه‌ر ئه‌وان شه‌ریکه‌ تاوان نه‌بوون  ئه‌ی که‌واته‌ کێ ده‌ستی گرتبوون بۆ ئه‌نجامدانی گۆڕانکاری و که‌نار خستنه‌وه‌ی ده‌سه‌ڵاتی ره‌های ئه‌م حیزبانه‌ و ، هه‌ر ئه‌مه‌ی ئێستا که‌ ئه‌یکه‌ن ئه‌وکات بیان کردباو ڕوویه‌کی سپیان بۆ خۆیشیان تۆمار بکردبایه‌ ...

به‌رنامه‌و ستراتیژی " دوژمنانی ئه‌مڕۆ" ی ی.ن.ک " دیار و ئاشکرایه‌ که‌ مه‌سه‌له‌ شه‌رافه‌ت و ئازادی یه‌کانی خه‌ڵکی کوردستان نییه‌‌ .. مه‌سه‌له‌ داکۆکی کردن نییه‌‌ له‌ قووت و ژیان گوزه‌رانی خه‌ڵک ...

 

ئه‌وه‌ی که‌ سه‌رانی بزووتنه‌وه‌ی گۆڕان نامرۆیی و ناعه‌داله‌تی و دزی و فزیه‌کانی ده‌سه‌ڵاتدارانی کوردستان ئه‌خه‌نه‌ ژێر پرسیاری کۆمه‌ڵایه‌تیه‌وه‌ ، زۆر له‌مێژه‌ خه‌ڵک په‌ییان به‌و هه‌ڵوێسه‌ دژی مرۆییانه‌ بردووه‌و به‌ ئێسک و پرووسکه‌وه‌ هه‌ستیان پێ کردووه‌ و باجی نه‌هامه‌تیه‌کانیان له‌ژێر سایه‌ی ئه‌واندا به‌هه‌زارو یه‌ک ڕه‌نگ داوه‌ته‌وه‌.....
 

هات و هاواری سه‌رانی گۆڕان بۆ جیابوونه‌وه‌ی کوردستان نیه‌ له‌ عێراق و بۆ کۆتایی هێنان نیه‌ به‌ وه‌زعی مه‌ینه‌ت بارو دیاری کردنی چاره‌نووسی خه‌ڵکی کورد ؛.. که‌ ئاشکرایه‌ له‌پێناوی جێگیر کردنی ده‌سه‌ڵات و چه‌ند کورسی یه‌کی تر مافی میلله‌تێک بۆ دیاری کردنی چاره‌نووس هه‌روا ئاسان گرێ ئه‌ده‌نه‌وه‌ به‌ ده‌وڵه‌تی مه‌رکه‌زی و ته‌سلیمی حکومه‌تی جڕوجانه‌وه‌رانی ئیسلامی شۆڤێنیه‌کانی ئه‌که‌نه‌وه‌ ...لۆژیکی ئه‌م مه‌سخه‌ره‌یه‌ په‌رده‌ پۆش کردن و ڕوو سپی نیشاندانه‌ بۆ جه‌ماوه‌ری کوردستان و ، خۆ بێ به‌ری کردنه‌ له‌ هه‌موو ئه‌و ڕوداوو کاره‌ساته‌ نامرۆییانه‌ی دۆست و دوژمنی دوێنێ و ئه‌مڕۆ که‌ ده‌رهه‌ق به‌ نه‌یاران و به‌ خه‌ڵکی ئازادی خوازی کوردستانیان کردووه‌ به‌درێژایی سێ ده‌ی ڕابردوو ..بۆ ئه‌م نه‌به‌رده‌شیان له‌ جیاتی تیپی هه‌ڵبژارده‌ی فراکسیۆنی کورد" که‌ یاری چی یه‌کانیان ئه‌دایان باش نه‌بووه‌ ، گوایه نه‌یان توانیوه‌ گۆڵ ی به‌رامبه‌ر تۆمار بکه‌ن له‌ گه‌ڵ هه‌ڵبژارده‌ی عێراقدا ، ئه‌مجاره‌ له‌ڕێ ی جه‌ماوه‌ری توڕه‌ی دژ به‌ ده‌سه‌ڵاته‌وه‌ هه‌وڵ ئه‌ده‌ن له‌ یاری یه‌کانی داهاتوودا له‌ڕێ ی زیاد بوونی کورسیه‌کانیانه‌وه‌ له‌ منتخبی عێراقدا ئه‌دای باش و گۆڵی زیاتر تۆمار بکه‌ن و ، خۆشیان ته‌یارو ئاماده‌ بکه‌ن بۆ یاری کردن له‌گه‌ڵ هه‌ڵبژارده‌ی کوردستاندا و له‌ به‌غداده‌وه‌ کوردستانیش بگۆڕن...ئه‌بێت خه‌ڵکی کوردستان ڕاستیه‌کان له‌ناو ئه‌م ته‌پ و تۆزی ڕیکلام و قه‌ره‌باڵغیانه‌دا ده‌ربکێشێته‌ ده‌وه‌وه‌و گومانی نه‌مێنێته‌وه‌ له‌سه‌ر شێخه‌ ووردو درشته‌کانی خێزان و بنه‌ماڵه‌ی ناسیونالیزمی کورد به‌ده‌سه‌ڵاتدارو بێ ده‌سه‌ڵاتیانه‌وه‌..
 


3\3\2010

halat-60@hotmail.com