٥\٦\٢٠٢٤

''گۆیژە'' و ''پۆسیتانۆ''ی ئیتاڵی.

 شوان سدیق      

چەند پەیجێکی حیزب و مێدیایەکی یەکێتی و کۆمپانیاکانی حیزب، بانگەشەی ئەوە دەکەن، مۆدێلی پۆسیتانۆی ئیتاڵیا لە گۆیژە دووبارە دەبێتەوە، ئیدی ئەم هەڵاو هوریایەی بۆ چیە و ڕقتان لە ئاوەدانکردنەوەی سلێمانییە!
ڕەخنەم لەپارتی سەوزی سلێمانی نییە، پاڵپشتی پرۆژەی ڕووحانی گۆیژە دەکەن!
دیارە ئەوانیش وەکو یەکێتی+سۆشیال دیمووکرات و پارتی دیمووکرات و حیزبی دادگەری و نەوی نوێ پێچەوانەکانیان ڕاستن!
باوەڕناکەم کەس ڕقی لە ئاوەدانکردنەوەی وڵاتەکەی بێت، ئەوانەی زەوی گشتی و مووڵکی میلەت تاپۆی سەر سەرمایەداری حیزبی دەکەن، ئەمە خۆی ڕقبوونەوەیە لە نیشتمان و خیانەتیشە.

گروپێکی کەمی سوودمەند و دەهۆڵ لێدەری حیزب و نزیک کەسانێکی دەستڕۆیشتوو گلاونەتە نێو مێدیاو ئۆرگانە جیاوازەکان زۆر بێشەرمانە خەریکی چەواشەکارین و دەیانەوێ پێمان بڵێن ئێمە دۆستی وڵات و ئاودانکردنەوەین!
ئەوە زانیمان پرۆژەکەی بناری گۆیژەو دەوروبەری زەویەکانی مووڵکی گشتین و دراون بەکۆمپانیای
و شەریک وهاوبەشی حیزب.
ئەوانەش پشتیوانی پرۆژەی لەم شێوەیە دەکەن کەسانێکی سوودمەندن و شوێنکەوتوانی حیزب و گروپە بەناو سەرمایەدارەکانن.
لە کوردستان شتێک نییە بەناوی کەرتی حکوومی، کەرتەکان هەمووی بەتایبەت و شەخسی کراون، سیاسەتی ئابووری گۆڕدرا بۆ بەنیولیبراڵیزم!
ئەگەر لانیکەم ئابووری هەرێم ئابووریەکی تێکەڵ بوایە حکوومەت خۆیشی پرۆژەی گەشتیاری و وەبەرهێنانی هەبووایە دەکرا ئومێدت پێی هەبێ بەرژەوەندی گشتی ڕەچاوکرابایە.
بەڵام کەرتی تایبەت و بەتایبەتی کەرتی حیزبی هاوشێوەی ئەم پرۆژانەو ئەوانەی شاسواری چاڤیلاند کەهی خەڵکە و پرۆژەکان لە سنووری هەولێریش داهاتوویەکی باشیان بۆ کۆمەڵگە نابێت!!

با بزانین پۆسیتانۆ لە ئیتاڵیا کەوتۆتە کوێ و هی کێیە؟ حیزبیەکان دەڵێن گۆیژە وەکو ئێرەی لێدەکرێت!
شارۆچکەی پۆسیتانۆ دەکەوێتە ناوچە کەناراوی و گەشتیاریەکانی سنووری ئەماڵفی لە باشووری ئیتاڵیا.
لەڕووی ئیداریەوە سەربەهەرێمی کامپانیایە پایتەختەکەیان شاری دڵگیری ناپۆلیە.
پۆسیتانۆ مێژووی نیشتەجێبوونی هاوڵاتیان بۆ سەدەی ١٣ و پێشتر دەگەڕێتەوە.
ئەمڕۆ ژمارەی دانیشتوانی نزیکەی پێنج هەزار کەسێک دەبێت.
ژمارەیەکی زۆر شوێنی پشوو و گەشتیاری تێداکراوەتەوەو بۆتە ناوچەیەکی گەشتیاری گرنگ.
خەڵکی ئەم شارۆچکە بچووکە بەگەشتیاریەوە سەرقاڵن و سوودی لێ وەردەگرن.
ساڵانە نزیکەی دوو ملیۆن گەشتیار سەردان و هاتووچۆی ناوچەی پۆسیتانۆ وئەمالفی دەکەن.
زۆربەی خانووەکانی پۆسیتانۆ لەسەر یەک دروستکراون و بەڕووی دەریادا دەڕوانن.
خانووەکان هی هاوڵاتیانن، نەک هی کۆمپانیایەکی تاکەکەسی و سەرمایەدارێک.
هەموو کەسێکش دەتوانێ خانوو یان دووکان و هۆتێل لەم ناوچەیە بکڕێ و ئازادە چۆن گۆڕانکاری بکات.
بەڵام بەپێی ڕێنمایی شارەوانی چونکە خانوو لەم شوێنانە زیاتر بەشی دەرەوەی پەیوەستە بەڕووی گشتیەوە نابێ خاوەن مووڵک بەویستی خۆی دەستکاری بکات.

ئێسته تێگەیشتن جیاوازی پۆسیتانۆی ئیتاڵیا و پرۆژەکەی سنووری گۆیژە چەند جیاوازیان زۆرە!!
جیاوازیە بنەڕەتی و گشتیەکان ئەوەیە لە کوردستان ڕۆح و ئیرادەی موڵکی گشتی و کەرتی گشتی نەما هەمووی فرۆشراوە حیزب دەستی بەسەرداگرت و کردیان بەناوی نزیکەکانی خۆیان!!
 

ماڵپه‌ڕی شوان سدیق