١٢\٦\٢٠٢٠

هاودەم و کاتی دوای کۆرۆنا،

کوردستان لە ئاستانەی ئاڵگۆڕ و راپەڕین و شۆڕشدا.

جەمال کۆشش      

قۆناغێکی نوێ لە کێشمەکێشی چینایەتی لە کوردستان لە شێوەیەکی توندوتیژ و تێهەڵچووندا خەریکە خۆی دەنوێنێتەوە. بنچینەی ئەم پێداهەڵشاخانانە لە ئاکامی بنبەستی بۆرژوازی کوردییە بۆ بەڕێوەبردنی لانی کەمی مانەوەی فیزیکیی تاکەکانی کۆمەڵگای کوردستان. پەتای کۆرۆنا ئەم قەیرانەی پێشخست و قووڵتری کردەوە و بێدەربەستیی دەسەڵات و حوکمڕانانی کوردستان لە ژیان و گوزەرانی خەڵکی کوردستان روونتر لە هەموو کات بەدەرخست. ئەم هەلومەرجە، جەماوەری بە شێوەیەکی فراوان راکێشاوەتە نێو نارەزایەتی و خۆپیشاندان و راپەڕین و شۆڕش و نێو کاری راستەخۆی سیاسییەوە. کێشەی قوتاربوون لە هەژاریی و نەداریی بۆ جەماوەرێکی بەرین رێک بە واتای کۆتاییهێنانە بە دەسەڵاتی حکومەتی هەرێم.

حیزب و لایەنە بۆرژواییەکانی کوردستان لە ماوەی ٢٩ ساڵەی رابردووی تاقیکردنەوەی خۆیاندا، حکومەتی هەرێمی کوردستان، حکومەتی دەوڵەمەند و سەرمایەدارەکانی کوردستانە و دامەزراوە سەربازیی و دەزگە سەرکوتگەرە هەواڵگریی و چەتەییەکانیان پارێزگاری لەو چینە سیاسییە دەکەن کە سوودمەندی سامانی ملیاردەکان بوون.

داهاتووی کار و ژیانی کرێکاران و زەحمەتکێشان و کارمەندان و خێزانەکانیان بە تەواویی لە مەترسییەکی راشکاوانە دایە. دابینکردنی گوزەرانی رۆژانە، لەوپەڕی دڵفراوانییان و بەند و بەست و پاڕانەوەیان لەبەردەم حکومەتی عێراقدا، لە دابینکردنی مووچەی ناچیزەی یەک مانگیی دایە.

قەیرانێکی سیاسی قووڵ کە ئێستا حکومەتی هەرێم دەرگیریەتی، بەرهەمی ئەو پرۆسەیە کە ئەم حکومەتە وەک دامەزراوەیەکی چینایەتیی بۆرژوازی بۆ چارەسەری کێشەکانی کۆمەڵگای کوردستان پەیڕەوی لێکردوە، ئیدی پێوەستە بوەستێنرێ.

خەڵکی کوردستان، کرێکاران و زەحمەتکێشان، ناتوانن و نابێ چارەنووسی خۆیان لە کاتی دوای کۆرۆنادا بەدەست دەسەڵاتدارانی ئێستای کوردستانەوە بهێڵنەوە.

جێگرەوەی جۆراجۆر بۆ تێپەڕاندنی ئەم قەیرانە ئابووریی و حکومەتییە دەخرێتەڕوو. دەسەڵاتدارانی هەولێر تا ئێستا هەر خەریکی توندکردنی دەزگاکانی سەرکوتن، ئەوەی هەیە کە هەموو وەڵامەکان وەک سەرکوتی خۆپیشاندانەکەی دهۆک و هستریای بەخشینەوەی تۆمەت بە لایەنەکان ئاماژەن بۆ رەوشی دەسەڵات لە بەرامبەر قورسترین قۆناغی مێژووییدا.

ئەو جێگرەوانەی کە دەخرێنەڕوو، یان دروستر ئەو نەخشە رێگایانەی کە دەخرێنەڕوو بۆ چارەسەری قەیرانە کوشندەکەی سەرجەم تێکڕایی سیستەمی دەسەڵاتداریی لە کوردستان، چ ئەوانەی کە دەڵێن سازانی حکومەتی هەرێم لەگەڵ حکومەتی ناوەند، چ ئەوانەی داوای دەستکێشانەوەی حکومەتی ئێستا و دامەزراندنی حکومەتی بچکۆڵەی کاتی دەکەن، یان ئەوانەی چاوەڕێی گەڕێکی تری دانوستانەکانی نووسینگەی سیاسیی لایەنە سیاسیە بۆژوا و ناسیۆنالیستی و ئیسلامییەکان دەکەن، دەیانەوی پێش بە ئاڵوگۆڕێکی گرنگی سیاسی و کۆمەڵایەتیی راپەڕین بگرن کە جەماوەری کرێکاران و هەژاران لە چەوسانەوە رزگاردەکا و شێوەیەکی تر لە دەسەڵات و لە ژیان دەخەنەڕوو.

هەڵسوڕاوانی کرێکاران و چین و توێژە هەژارەکان، کۆمۆنیستەکان و ئازادیخوازان و سوشیالیست و بەرەی چەپ بە گشتیی لە بەرامبەر ئەرکێکی چارەنووسسازی مێژوویدان. تێکەهەڵچوونێکی فراوانی کۆمەڵایەتی ئاڵۆز لەبەردەمماندا روودەدا، بۆرژوازی بە هەموو باڵ و حیزب و لایەنەکانیەوە، بە هەموو مانۆڕەکانیانەوە، چ بە سازانیان بێ لەگەڵ یەکتر، یان بە پرۆژەی (لامەرکەزیی) و دابەشکردنی پارە و پۆستەکانیان بێ، چ بە شەڕی میدیا و راگەیاندنە داڕزاوە بێ کلتووریەکانیان، یان بە تاوانبارکردنی یەکتر بێ، دەیانەوێ پرۆلیتاریای کوردستان وەک چینێکی وشیاری سەربەخۆی چینایەتی نەیەتە نێو هاوکێشە سیاسییەکانەوە. پێویستە خەڵک لە کاتی ناڕەزایەتی و خۆپیشاندان و ڕاپەڕینەکاندا بە تەواویی ئەگەری بەکارهێنانی زەبروزەنگ و گرتن و راوەدونان و تیرۆر لەبەرچاو بگرێ. ئەم دەسەڵاتە لە هیچ کاتێکدا باکی بە گیانی رۆڵەکانی نییە، ئێستا کە جەماوەر لێی ڕاپەڕیوە، هەموو پەرچەکردارێک گریمانکراوە و لەو بارەوە نموونەمان زۆرە.

هەموو ئەو لەبەرگرتنەوە و دەستگرتنەوە و بێکارکردنانەی داهاتوو لە ستراتیژیەتی بۆرژوازیدا، هاوشاندەبێ بە سەرکوتی هەمەلایەنەی هەڵسانە جەماوەرییەکان وەک پەرجەکرداری ئاسایی چین و توێژە هەژارەکانی کۆمەڵگا بۆ بەرگریکردن لە خۆیان، پێویستی بە پلانێکی رۆشن و راشکاو و رێکخراوێکی جەربەزەی کۆمەڵایەتی و چینایەتی دەبێ بۆ سەرخستنی خەباتی پرۆلیتاریای کوردستان. هومێدەوارم لە هەستەوەریی مێژوویی قۆناغەکە ئاگادار بن.

سەرەتای حوزەیرانی ٢٠٢٠
ماڵپه‌ڕی جه‌‌مال کۆشش