٩\٥\٢٠٢١

هاوسەریەتیی ستەمکار و گاڵتەجاڕیی.

ئەرسەلان مەحمود    

مێژوو، پڕیەتی لە دەسەڵاتداری گرگن و دەسەڵاتی ستەمکار، بەڵام بە دەگمەن نەبێ دەسەڵاتدار و دەسەڵاتێک نادۆزیتەوە لە یەک کاتدا ستەمکار و هەم گاڵتەجاڕ بێ!!

لە هەرێم، هەمووان، هەمووانی غەیرە کوردو نیشتمانی، ڕەهاو ئازادن، کوردو تاکی کورد خۆی نەبێ، ئەم هەرێمە حەیاتە هەر سنورەکانی نـا، ئاشکرایە لەناوکدا بووە بەمەیدانی تەراتێنی هێزە بیانیەکان و مۆڵگەی سەربازی هەرێمایەتی!!

کەچی دەسەڵاتە زاڵە تاکڕەهەندگەراکەی نەک هەر بەوشەو فشەو بەلاغ و لێدوانێک چییە ڕۆژێ لەڕۆژان ئەم داگیرکارییەی ڕەتنەکردەوە، لەجێیدا هاوڵاتیەکانی خۆی بەبیانوی بەزاندنی هێڵە نیشتمانیەکان و تێکدانی ئاسایشی نیشتمانی، تۆمەتبارو دادگایی دەکا و حیزبیانەش بەناوی حکومەت و دامەزراوەی دادوەرییەوە سزایان ئەدات، ئەمە جگە لەستەمکاری، لەڕاستیدا گاڵتەجاڕیشە!!

ستەمکارە لەبەر ئەوەی ڕاو سەرنج و جوڵەو هەر شتێکی هاوڵاتی و هاونیشتمانییەکانی، جا بەهەر هۆکارێک بێ، بکەوێتە دەرەوەی ویست و دنیا بینی و بەرژەوەندییگەرایی خۆییەوە، یاساغ دەکاو بکارانی هەر لەڕاوەدونانەوە بگرە تا بەڕفاندن و زیندانی کردن و ئەشکەنجەو حوکمدان و تیرۆر کردنیان دەگات، سزا ئەدات، ئەمە بەجۆرێکە پێویست بەنمونەو خستنە ڕوی بەڵگە ناکات!!

گاڵتەجاڕە لەبەر ئەوەی خۆی لەخۆدا، ئامرازی دامەزراوە هەواڵگرییەکان و جێبەجێکاری ئەجێندا شاراوەکانی دەرودراوسێیە، کەچی پڕ ئەداتە ئەمریکاو ئەڵمانیاو تۆمەتباریان دەکا بەوەی لەپشت تێکدانی هەرێمەکەوەن، لەکاتێکدا ئەگەر هێزو وەنەوزێکی هەبووبێ و مابێ ئەم هەرێمە ئەوە ئەمریکاو خۆرئاوایە چۆن دایانمەزراندوە ئاواش هێشتا پشتیوانی مانەوەی دەکەن.

هەموو دەسەڵاتێکی ستەمکار، دژەکانی لەگەڵ خۆی و هاوتای خۆی گەورەو بەهێز دەکات، دەسەڵاتدارێتی هەرێم ئەگەر هەرچی زووە فریا خۆیان نەکەون و بەخۆیاندا نەچنەوە تایبەت لەهەمبەر سزادراوانی بادینان، ئەوا ئەم جۆرە هاوسەریەتییە نوێیەی نێوان ستەمکارو گاڵتەجاری، پێناچێ پەتەکەی درێژ بێت.

ماڵپه‌ڕی ئه‌رسه‌لان مه‌حمود