هەڵبژاردنێک لە ئارادا نییه‌..!

بەشدار عه‌لی 

خەڵکى کوردستان بەگشتى چاوەڕوانى میکانیزمێکى گونجاو بوون بۆ گۆڕان و گۆڕانکارى لە کایەیى سیستەمەکانى بەرێوەبردن و دەرکێشانى کۆمەڵگا لە کۆمەڵێک نەخۆشى کە خەریکە بەرەو ئاقارێکى مەترسیدار ئاراستەى دەکات و دەرچونیان لەم ژینگە داخراوە کە خەریکە جێگاى هەناسەدانى تیا نامێنێت،چونکە سیستەمى تقلیدى و کۆنى ئیستاى حوکمڕانى لە کوردستان ناخى تاکەکانى وێران کردوە و مرۆڤى هۆشیارى ئەم سەدەى بیست و یەکە چیتر بەرگەى ناگرێت،وورد بڵێم، نارەزایەتیەکانى خەڵک لە شوێنى خۆیەتى و بەهانەکانى شان خاڵى کردنەوە باوى نەما و پێویستە دەسەڵاتى سیاسى جواب بە خواست و وویستەکانى خەڵک بداتەوە، دەبوایە ئەحزابى حاکم خۆى بەدوایى میکانیزم بگەڕێت بۆ وەڵامدانەوە بەم نارەزایەتیانە و خالى کردنەوەى ئەو برکانەى کە لەناخى هەر تاکێکدا خۆى حەشارداوە و ئەم هەڵبژاردنە بە دەرفەتێک بزانێک بۆ دەستپێکى گۆڕانکارى بە شێوازێکى سەردەمیانە لە بەرێوەبردنى وڵاتدا، بەداخەوە دەسەڵات مێشَیک میوانى نیە و هەموو ئاماژەکانى پێش هەڵبژاردن و بانگەشە و بەرنامە و پرۆگرام و ستراتیژیان و تەنانەت کاندیدەکان و قسەکەرەکانیان بۆ ئەم هەڵبژاردنە و ژینگەیەک بۆ خەڵک و هێز و لایەنەکان دورستیان کردووە، نیشانى دەدات کە دەیانەوێت لەسەر هە مان ریتم و بەرنامەى پێشتر بەردەوام بن و درێژە بە وەزعیەتێک بدەن کە قەتڵ و عامى شێنەیى خەڵکى لەگەڵدایە و بێگومان ئەمەش وەکو ئاگرى ژێر خۆڵەمێش دەمێنێتەوە و دوور نیە لەکاتێکى تردا کڵپە بسێنێت !

بەهەرحاڵ ، ئەو میکانیزمەى کە خەڵک بەدواییدا دەگەڕا تا رادەیەک دەتوانم بڵێَم لە هەڵبژاردنەکانى پەرلەمانى کوردستان گیرى کرد و خەڵک وویستیان ئەمجارەیان لە رێگاى هەڵبژاردنەوە کۆتاى بە سیستەمى ئیفلیج و دواکەوتوویى بەرێوەبردن و دەسەڵاتى رەهاى ئەحزاب و ئەشخاس بهێنن،بەڵام بەداخەوە وەکو نەریتێکى چەقبەستوى زۆرێک لە دەسەڵاتە داسەپاوەکانى ترى ناوچەکە و جیهان ئەحزابى ناسیونالیستى کوردى کە سەرمایەى ئەو وڵاتەیان بۆ خۆیان قۆرخ کردووە و هەموو جومگەکانى دەسەڵاتیان مۆنۆپۆل کردووە، دەرفەت نادەن و دەست بۆ هەموو شێوازێکى پێشێلکارى دەبەن و سامانى و داهاتى ئەو خەڵکەش دەخەنە خزمەتى درێژەدان بە مانەوەى کار و کاسبیەک کە وێنەى کەمە لە دنیادا! بۆیە ئومێدێک لە هەڵبژاردنەکان بەدیناکرێت بۆ گۆڕان و هاتنە پێشەوەى عەقلیەتێکى تازە بۆ بەرێوەبردنى ئەو کۆمەڵگا خاپورە و دڵخۆشکردن بە هەڵبژاردنێک کە بۆنى ساکارترین پرەنسیپەکانى دیموکراسى و ئازادى لێوە نایەت خۆشخەیاڵیە و فێڵ کردنە لە خۆمان.

18 ساڵە ئەو مەملەکەتە بەناو ئازادە و حکومەت و پەرلەمانى هەیە،زۆرترین بودجە و ئیمکانیات و دەرفەت لەبەردەستا بووە،بەڵام جگە لە چەند هوتێل و مۆتێلێک و بۆ بەسەربردنى شەوانەى خۆیان و چاککردنەوەى دوو شەقام دەستیان نەچویە کارێکى مەزنتر، بە داهاتى خەڵک بۆخۆیان بوون بە بازرگان و سەرمایەدارى دونیا و جارێکیشیان مناڵان و لاوانى باداوە و کانى سپیکەیان بەسەرنەکردەوە،ئەوەندەى بیریان لەوەکردەوە، چۆن زۆرترین نەخوێندەوارى حیزب بەرنە ناو زانکۆکان،نێو هێندە بیریان لە هێنانەکایەیى سیستەمێکى پەروەردەیى پێشکەوتوو نەکردەوە، هێندە بۆ لاى سەرکوتکردنى ماف و ئازادییەکانى خەڵک گوزەریان کرد تا نەوەیەکى نامۆ و دڵشکاو و بێزار و بێ جوڵە و داهێنانیان دورست کرد،نیو هێندە بەلاى یاسا و دەستورە ژەنگاویەکان نەرۆیشتن کە رۆژانە خەون و خولیایى سەدان گەنج و مناڵ بە خاک ئەسپێرێ ، هێندە بیریان لە دەست تێکەڵ کردن لەگەڵ وڵاتانى ناوچەکە و جیهان کردەوە،نیو هێندە بیریان لە دورست کردنى کیان و قەوارەیەکى سەربەخۆ بۆ خەڵکى کوردستان نەکردۆتەوە،کاریان کرد بۆ ئەوەى خەڵک هەمیشە وەکو سواڵکەرێک بژیت و بەردەوام لەبەردەرگاکانیان کرنۆش بەرێ،سیستەمى تەندورستیان هێندە بە وێرانى هێشتەوە بۆ ئەوەى ئەگەر لەکاتى ساغى و سەلامەتی بەلایاندا نەچن لەکاتى نەخۆشى و مردندا هانایان بۆ بەرن و ئەوانیش مەرهەمەتى خۆیان نیشان بدەن و دوو پول لە حیسابەکەى خەڵک خۆیان بۆیان بگێڕنەوە و لە مردن رزگاریان بێت، ... .

هەڵبژاردن کاتێک مانایەک پەیدا دەکات کە ئازادى بێ قەید و شەرت بۆ هەموو لیست و کیانە سیاسیەکان دابین بکرێت،ئیمکانیات و بودجەى پێویست بە یەکسانى لەبەردەستى هەمواندا بێت،هەموو هێز و لایەنە جیاوازەکان دەستیان بە دەزگاکانى راگەیاندندا رابگات بۆ پروپاگەندە و ئاشکراکردنى بەرنامە و ستراتیژیان ، هێز و دەسەڵاتى چەکدارى و میلیشیایى حیزبى بوونى نەبێت،دواجاریش گرەنتیەک هەبێت بۆ قبوڵ کردنى ئەنجامەکەى،بەڵام بەداخەوە لە کوردستان ئەمانە هەموو پێچەوانەن،بۆیە هەڵبژاردنێک بە ماناى ووشە بوونى نیە و ئەوەى هەیە مانۆڕێکى ئەحزابى حاکمە لەژێر فشارى حکومەتى مەرکەزى و هێز و لایەنى دەرەکیدا بەرێیانخستوە بۆ شەرعیەتدانەوە بەدەسەڵاتى تولیتارى و تاکڕەوى خۆیان.