هەڵبژاردن وەک هەلێکى زێڕین بۆ وازهێنان لە موژدە وەهمیەکان،
حیزبەکان پڕبون لەشەیتان ، هەمو ساتێکیش خەونى شەیتانى دەبینن.

پێشڕِەو حەمید 

گەلێک خاوەنى کەسانى دڵسۆزو سەرکردەى خاون ئەقڵى دیبلۆماسیى و سیاسیانەى باڵابێت و گەلێکى هۆشیاربێت و ئاگادارى ڕەوتەکانى گۆڕانبێـت لەهەموو بوارەکانى سیاسى و ئابورى و کولتور و هتد،ئەوا مەحاڵە بەئاسانى ( هەلى زێڕین ) ى وەدەست بکەوێت بۆدەربازبون لە قەیرانەکان ئەگەر ڕوبەڕوى قەیرانەکان بنەوە ، بەڵام هەرگەلێکی هوشیاریش ئەگەر بۆدەربازبونیان لەقەیرانەکان و دروستکردنى کیانیکى تایبەت بەخۆیان ( هەل ) یان بۆڕەخسابێت ئەوا وەک ئێمەى کورد لەدەستیان نەداوەوە و سەرکردەکانیان گەمەزانێکى باشى ناوگۆڕەپانى کێشە سیاسیە ئاڵۆزەکان بوەو بەبەکارهێنانى ( ئەقڵ ) و تەکتیکى دیبلۆماسیانەى خۆیان کەم تازۆر توانیى ویانە بە سود وەرگرتن لە ڕەوتەکانى گۆڕانى سەردەمە جیاجیاکانى خۆیان سود وەربگرن و تەواوى قەیرانەکانیان تێپەڕێنن و ببنە خاوەن کیانێکى سەربەخۆو وڵات گەلێکى بەهێز ،وەک وڵاتانى ئەوروپا کە بەشێوەیەکى بنەڕەتى لەدواى جەنگى دووهەمى جیهان سودیان لە ئەزمونى تاڵى شەڕ وەرگرت و هەلێکەیان قۆزتەوە بۆ بونیات نانەوەى وڵاتەکانیان .

لە دەست دانى هەلى زێرین بۆدەربازبون لەقەیرانە سیاسەکانیان ، یان گرتنە دەستى دەسەڵات لەسەر دەستى حیزب و گروپە جیاوازەکان لەپانتاى عێراق وکوردستاندا لەماوەى ( 80 ) ساڵى ڕابردودا ، لەئەژمارکردن نایەت بەتایبەتى ئەو هەلانەى کە بۆ ( کورد ) ئامادەییان هەبوەو لەدەستیان داوە ، هەوەها لەدواى ڕوخانى ڕژێمى پاشایەتى لە عێراق لە ( 14/7/1958 ) هەلێکى زێرین بۆ ( شیوعیەکانى عێراق ) هاتەپێشەوە کە حوکمى عێراق بکەن و زیاتر پێگەى جەماوەرى خۆى بەهێزتر بکات کە لەوکاتەدا خاوەنى گەورەترین پێگەى جەماوەرى بو ، لەدواى لەدەست دانى ئەو هەلە بەبیانوى کۆمەڵێک بەهانەى بێماناى ئەوسەردامانەى ژیانى حیزبى شیوعى و ڕەوشى سیاسى و کۆمەڵاتى و ئابورى لەعێراقدا ، ئەوا جارێکى تر مەحاڵە ( شیوعیەکانى کوردستان و عێراق ) هەلێکى وەهایا بۆبڕەخسێت بۆحوکمکردنى وڵاتێکى پڕلەکێشەى سایسى و ئیدارى وەک کوردستان و عێراق ، بەڵکوئەو حیزبە تواناى ڕێکخستنەوەى شەقامى سیاسى و فیکرى خۆیشى نابێت کە لەو سەردەمانەدا بە تەنها بانگەوازێکى بچوک بتوانێت ( 3 ) ملێون مرۆڤ بخاتە سەرشەقامەکان و پێگەى جەماوەر خۆى بەهێز بکات ئەویش لەبەر ئەو گۆڕانکاریانەى کەئەمڕۆ ڕوئەدەن و حیزبى شیوعیش بەفیکرێکى دۆگماوە مامەڵەى لەتەکدا دەکات ، بۆمیللەتى کوردیش چەندین ( هەل ) چونەتە پێش بۆئەوەى بەخەونى لەمێژینەى خۆى شادبێت و ببێتە خاوەنى کیانێکى سەربەخۆ بەڵام سایەتى دوفاقیەت و ترس لەبڕیاردانى چارەنوس ساز ، تائێستاش بە پاشکۆى خۆیى حکومەتى ناوەند بەستووەتەوەو توانایى خۆدەربازکردنى نییە لەمۆتەکەى بێبڕوابون بە سەروەت و و مێژوو قوربانییەکاى خۆى بۆ جاردانى بون بەدەوڵەت و ناشتوانێت واز لەو دەوڵەتانەبهێنێت کە دەزانێت هەرکات بەرژەوەندینان لەگەڵ کوردا یەکى نەگرتوە پشتى تێدەکەن .

ئایا ئەم هەلەى تر ، ئەم هەڵبژاردنەى کەبڕیارە لەماوەى دومانگى تردا سازبکرێت تاچەند حیزبەکان فێردەکات واز لە بەخشینەوەى موژەوەهمیەکانیان بهێنێت و بەچى پرۆژەیەکەوە دەچنە نێو ململانییەکانەوە لەکاتێکدا ئیدى گێرانەوەى مێژوى سەروەرى شاخ و و وتارى حەماسیى و پەخشانى شۆڕشگیرشانە هیچ لە هاوکێشەکان ناگۆڕێت ؟

ئەگەر حیزبى کوردیى بەم فیکرە نەخۆشەى خۆیەوە درێژە بە فریودان و بەخشینەوەى موژدە وەهەمیەکانى خۆى بدات و بیەویێت لەڕێگەى هەڵوەشاندنەوەى چەند ڕێکخراو و ناوەندێکى کارتۆنى و گۆڕینى چەند ڕوخسارێک بێتەوپێشەوە ، بۆکرانەوەو قبوڵکردنى ئەقڵێتى تازەو خوێنى زیندوى نەوەیەکیترو ململانى کردن لەسەر وەدەستخستنى دەنگى زۆرترین دەنگدەرانى پرۆسە چاوڕوانکراوەکەى هەڵبژاردن، ئەوا گۆمانێکى زۆرلەسەر ئایندەى حیزب دروست دەکات و وێنە تەماوییەکەى خۆى بەو ئەقڵێتەوە ڕۆشن ناکاتەوە و بەردەوام لەبازنەیەکى باتاڵدا خولدەخوات و ناتوانێت خۆى لە سیاسەتى ئیزدیواجییەت ڕزگار بکات ؟ چونکە ئەوەى ئەمڕۆبەناوى چاکسازییەوە کارى بۆدەکات و چەند هەنگاوێکى بچویکشیى بۆ هەڵنا جگەلە دوفاقیەت هێشتا هیچ نییە ؟

ئەوەى نەیتوانى لەتەنیشت حیزبەوە بەردەوام بێت لەسەر کورسى بەرپرسیارێتى و بەرژەوەندیەکانى کەو تنەمەترسیەوەو ئێستا لەشوێنێکى ترەوە دەیەوەێت بەناوى چاکسازییوە سەربکەوێت تاچەند ڕاستگۆیانە بۆ چاکسازیى و بەدامەزراوەکرندى دزگاحکومییەکان کاردەکات ، تاچەند ئامادەیە بەرژەوەندى گشتى بخاتە پێشبەرژەوەندى خۆیەوە، لەکاتێکدا بەرلە تۆران و یاخى بونى لەحیزبەکەى پێشتر بەرژەوەندى بەحیزبى دایکیەوە دەیبستەوە؟.

ئەو بەها ئەخلاقیانەچین کە حیزبى کوردى شانازیان پێوەدەکات ؟ لەکاتێکدا ئەو سیاسەتکردنەى حیزبەکوردیەکان کردویانەتە سیستەمى خۆبەڕێوەبردن لەماوەى هەژدەساڵدا جگەلە دەستەمۆکۆدن و قۆرغکردنى سەروەت و سامانى میللەت و دوبارەکردنەوەى چەندین هەڵەى سیاسى و میژویى و دروستکردنى چەندین باندى لەیاسا هەڵهاتوو بەخشینى پلەى بەرپرسیارێتى بە خەلکانى گەندەڵکار و قوڵکردنەوەى جیاوازییە چینایەتییەکان و ... تد، هیچ مانایەک بۆ ئەخلاق نایەڵێتەوە ؟! ئەگەر حیزبى کوردى لەڕابردودا قوربانى بە ئەندامانى خۆیى و نەتەوەکەى دابێت بۆپارستنى ناسنامەى نەتەوەو ڕزگارکردنى نەتەوە لە ئەتککردن ڕزگارکردنى کوردستان لەژێرچەپۆکى دوژمونانى کورد و بەهەمو شکست و دەسکەوتو سەروەریەکانیەوە وێنەیکى جوانى بەخۆى بەخشیبێت لەدڵى میللەتدا ؟ ئەوا لەئێستادا حیزبى کوردى خاوەنى کام وێنەیە لەنێوان وێنەیکى شەیتانى ، وێنەیەکى شکاو ، وێنەیکى ناڕێک و وێنەگەلێکى ترى ناشرین کە لەدواى ئەو هەمو ماڵوێرانییەى کە بەسەر ئەقڵیەتى خۆیداهێنایو خەڵکى کوردستانیان لە خۆخواردنەوەدا بەجێهشتو و لەپانتاییەکى ناتەندروستدا بەشێون چارەنوسیى خۆیەوە بێ قاچ دەیەوێت بەردەوام بێت بۆخۆدۆزینەوە ؟ ئاخۆ بەهاکانى حیزب درۆزن ، یان ڕاستییەکانى دەمامکن؟ سیاسەتەکانى چەواشەکارن، یان گوتارەکانى سۆزئامێزو لەرزوکن ؟ ئایا خەونەکانى حیزبى کوردى شەیتانین ، یان ڕێکخستنەکانی حیزب پڕبوە لەشەیتان ؟ ئەگەر تەنها بەپرسیایرێکى سادە دەستپێبکەین لەسەر ئەقڵیەتى پەروەردەکردن و پێگەیاندنى ( کادیر ) ى حیزى و بزانین ئەوانەى حیزب دروستیان دەکات بۆ خۆبەڕێوەبردن و دیارکردنى سیاسەتى ئایندەى حیزب ، ئەوادەکرێت بڵێن ،حیزبى کوردى کێ پەروەردەدەکات و ئەوانەى مەهامى پەوروەردەکردن دەگرنە ئەستۆکێن و ئەوانەى پەروەردە دەکرێن چۆن حیزب بەڕێوەدەبەن ؟ ئێستا حیزبى کوردى پڕە لەشەیتان و شەیتانانە وانەکانیان پێدەوترێتەوەو شەیتانانە گوتاروکان ئاراستەدەکەن و شەیتانانە سیاسەتى دوقاقیەت بەڕێوەدەبەن و شەیتانانە بیرلەئایندە دەکەنەوە و شەیتانانە کورسیەکانى بەرپرسیاریەتیان بەکار دەهێنن و شەیتانانە وێنەى فریشتەیەک بە شەیتانەگەورەکانى ناو حیزب دەبەخشن .

ئەوەى سیاسەت دەکات لەنێو حیزبدا و ئەوەى حیزب بەڕێوەدەبات و ئەوەى حیزب فیرى دەکات و ئەوەى لەحیزبەوە فێردەبێت ئەوانەن کە ئەم وڵاتەیان لە گەندەڵیدا نغرۆکرت ، ئەوانەبون کەشەڕى ناوخۆیان دروستکرد ، ئەوانەبون کەوەک میللەتێکى نەزانن و بێئرادە و خۆشباوەڕ بە دونیایان ناساندین ، ئەوانەن بون وڵاتیان بەسەر دوو هەرێمدا دابەشکرد، ئەوانەبون کە بەناوى پارستنى ئەمنى قەومییەوە سەروەرى نیشتمانیان خستەژێر پۆستاڵەکانى جەندرمەوە و پاسدارەوە ، ئەوانەبون کە بۆ پارستنى مافەکانى ژنان فرە ژنیان کردەبڕیار ، ئەوانەبون کەبەناوى پارستن و فراوانکردنى مەوداکانى ئازادییەوە میدیاى ئەهلى یان کردە جاسو و بەناوى دادپەروەرییەوە قەڵمى ئازادو سوربەخۆیان تیرۆرکرد ، ئەوان ئەوانەبون کەمۆدیلێکى حکوم کردنیان داهێنا هێشتا لەدونیادا وێنەى نییە لە لەنگیدا ، ئەوان ئەوانەبون کە ...تد، درکاندنى ئەم چەند هەقیقەتە تۆمەتبارکردنى ئەوانە نییە کە ئێستا خۆیان بە فریشتەدەزانێت ، ئەوەندەى بەئاگاهێنانەوەیانە لە شەیتان بونیانى خۆیان .

ئەم خوێندنەوەیە تاچەند خزمەتى ئەوڕەگەزە دەکات کەناوى واقیعیەتى حیزى کوردیە ؟ لەکاتێکدا خەیاڵ و ڕەمزەوەهمیەکانى حیزب لەناوحیزبدا باڵادەستن ؟ ئایا حیزیەکانى کوردستان لەبەرامبەر خویندنەوەو پرسیارگەڵێکى وەها دا تاچەند بەخۆیاندا دەچنەوەو هەوڵى چاککردنەوەى وێنە شکاوەکەى خۆیان دەدن ، کە پڕن لەگەمەى کۆن و فیکرى نەخۆش و ئەقڵى پیر ؟.