١٩\۴\٢٠١٠

هەڵمەتى گۆڕانکاریی و نوێبوونەوە لە حیزبى شیوعیدا، چۆن و بە کێ ده‌کرێ؟

هیوا رەش   

ئەگەر خوێندنەوەیەکى واقعى بۆ سەرەتاى سەرهەڵدان و دامەزراندنى حیزبى شیوعى بکرێت مێژوو ئەوە دەرئەخات کە پێکهاتەیەکى چینایەتى لەسەر بنەماى تیئۆرى مارکسیزم - لینینیزم بۆتە هەوێنى دروست بوونى، لە مێژووى دروست بوونیشیەوە وێڕاى دڕندەیى دوژمنانى دەرەکى بۆ وەستاندن و دواخستنى ڕەوڕەوەى تێکۆشانى ، ڕۆژ لەدواى ڕۆژ ئەندامان و کادیران و سەرکردایەتى حیزبەکە بە وورەیەکى پۆڵایینەوە نەک بەرەو ڕووى پلان و پیلانى دژ بە حیزبەکە بوونەتەوە بگرە بەوپەڕى قارەمانێتییەوە زیندانەکانیان بە ماڵى یەکەمى خۆیان هەڵبژاردووە و تەنانەت بێباکانە پەتى قەنارەشیان ناوەتە گەردن لە پێناوى داکۆکیى لە بەرژەوەندى چینى زەحمەتکێشان کە جگە لە دوو سکرتێر ، دەیان ئەندامى کۆمیتەى ناوەندى و مەکتەبى سیاسى و هەزاران کادیر و ئەندام و هەواداریشى کردۆتە قوربانیى ئەو ڕێبازەى هەڵى بژاردبوو هەر بۆیەشە حیزبى شەهیدان کراوەتە ناسنامەى ، ئەمە ڕاستییەکى حاشا هەڵنەگرە و هەتا دوژمنە سەرسەختەکانیشى ناتوانن نکوڵى لەو مێژووە پرشنگدارە بکەن و هەڵوێستى هاوڕێ (( فەهد )) ى دامەزرێنەر و یەکەم سکرتێرى حیزب باشترین بەڵگەى زیندووە کە بە ووتە بەناوبانگەکەى (( شیوعیەت لە مردن بەهێز ترە و لە دارى سێدارە بڵند ترە )) گیانى خۆى خستە ئۆغرى مافە ڕەواکانى چینى ڕەنجدەرانى بیر و بازووەوە .

حیزبى شیوعى لە 30 ساڵى سەرەتاى تەمەنى تێکۆشانى دا 1934 - 1963 بۆ چرکەیەک لە تێکۆشان و قوربانیدان دوا نەکەوتووە و بەردەوام بێ سڵ کردنەوە لەهەر چەشنە قوربانییەک ، خەباتى چینایەتى و نیشتمانى پێکەوە گرێ داوە و سەرقافڵەى ڕووداوە خوێناوییەکانى گۆڕەپانى سیاسى و پیشەیى و کۆمەڵایەتى بووە بۆ بەدى هێنانى مافە زەوتکراوەکانى سەرجەم چین و توێژە بەشمەینەتەکانى گەل ، ئەمە واى لێکردووە ببێتە جێى چاووڕاوى دوژمنان ، و بە تایبەتى لە کودەتا شوومەکەى 8 ى شوباتى بەعسییەکان بەدواوە زەبرى گورچک بڕى بەرکەوتووە و هاوڕێ سەلام عادلى سکرتێر و چەندین ئەندامى سەرکردایەتى و هەزاران لە هەوادارانى ترینجێنرانە کونجى زیندانە وەحشیگەرانەکانى بەعسەوە و شەهید و بەند کران .

لە مێژووى حیزبى شیوعى دا هەمیشە باڵێکى ترسنۆک و هەلپەرست و خۆبەدەستەوەدەر و پاکانەچى بوونى هەبووە و پاشینەیەکى فیکرى نامۆ بە پرەنسیپەکانى شیوعیەت دزەى کردۆتە ڕیزەکانیەوە و دیوارەکانى ڕێکخستنەکانیان بڕیوە و خۆیان گەیاندۆتە لووتکەى بڕیار و نێو کۆمیتەى سەرکردایەتى حیزب ، بەڵام نەیانتوانیوە گەراى خۆیان دانێن ، لە دواى شەهید بوونى زۆربەى هاوڕێیانى کارا و خاوەن گیانى شۆڕشگێڕیى لە سەرکردایەتى حیزب دا زەمینەیەکى لەبار ڕەخسا بۆ ئەوانەى بەدواى هەلێک دا ئەگەڕان ئاراستەى سیاسەتى حیزب بگۆڕن و مەرامى خۆیانى تێدا وێنا بکەن ، ئەوە بوو وەکو دیارترین ڕێبازى هەلپەرستانە و خۆبەدەستەوەدەرانە لە ساڵى 1964 بە ناوى - هێڵى ئاب - بێپەردە هاتنە پێش و لەژێر ناوى - بنیات نانى سۆشیالیزم - ەوە نەهجى یەکگرتن و خۆهەڵوەشاندنەوەى حیزب و خۆتواندنەوە لە ناو بزاوتى شۆفینیستى عارفییەکان دەرکەوت ، بێگومان ئەمە لە چاوى سۆڤیەتییەکان و فشارى ئەوان بەدوور نەبوو کە دەمێک بوو هەوڵیان بۆ ئەدا و بۆ ئەو مەبەستەش کەسانى نموونەى لایەنگرانى ئەو هێڵە دزێوەیان لە ڕیزەکانى حیزب دا پەروەردە کردبوو بۆ ئەوەى دەسەڵاتى حیزبەکە بەڕێوە ببەن و بە ئارەزووى ویستى ئەوان و پاراستنى بەرژەوەندییە ئابورى و سەربازییەکانیان حیزب بکەنە ڕۆبۆتێک و سیاسەتى ئاییندەى بەلەبەرچاو گرتنى سیاسەتى سۆڤیەتى پێ داڕێژن ، هەرچەندە ئەبێت ئەو ڕاستییەشمان لا ڕوون بێت کە هەلپەرستیى ڕەگێکى لە مێژینەى هەیە و ئەتوانین بڵێین هاوتەریبە لە گەڵ تەمەنى حیزبى شیوعى دا ، نووسینەکانى هاوڕێ - فەهد - یش باشترین گەواهیى بەرجەستەن کە چۆن هەوڵى داوە بەر بە شەپۆڵى هەلپەرستى بگرێت و تا ڕادەیەکى زۆر باشیش سەرکەوتنى لە بەڕەنگار بوونەوەیان دا بەدەست هێناوە و نەیهێشتووە چەکەرە بکەن .

لە هاتنە پێشەوەى کاک - عەزیز محەمەد - و دەست بەکار بوونى وەکو سکرتێرى حیزب بەدواوە و درێژە پێدانەوەى هێڵى ئابى سازشکارانە بەختى هەلپەرستان ڕوو لە هەڵکشان چوو ، لە بەرامبەر دا لە پێگەى حیزبییش دا بەهەمان شێوە دەنگى ناڕەزایەتى بەرەو هەڵکشان ئەچوو وەکو پەرچە کردارێک بەرامبەر دوور کەوتنەوەى سەرکردایەتى لە ئەرک و ڕێبازى شۆڕشگێڕیى خۆى ، پەنا وەبەر بردن و کەوتنە دواى پێگەى حیزبى بە دواى - عەزیزلحاج - و ڕوودانى لەتبوون لە ڕیزى حیزب دا پەیامێکى ڕوون و زەنگێکى ئاگادار کردنەوە بوو بۆ سەرکردایەتى حیزب تا دەستبەردارى سیاسەتى ملکەچیى ببن ، لێرەش دا سۆڤیەتییەکان ڕۆڵى سلبى خۆیان گێڕا لە پشتیوانى کردنى ڕێبازى سازشکارانەى دەست ڕۆییشتووى ناو حیزب و سەرکەوتنى کرد بە یاوەریان ، ئەمەو جگە لە مەرامى کەسیى خودى - عەزیزلحاج - ى خۆسەپێن بەسەر ڕەوتە جیابووەوەکەدا ، ئەم لەت بوونە مۆرکى ململانێى کەسیى بەخۆیەوە پێچا بوو پتر لە کێشەى ڕێکخستن و ململانێى فیکریى و لەو نێوەندەدا حیزبى شیوعى ماندوو کرا و زەمینەیەکى زۆر گونجاو تر ڕەخسا بۆ ئەوەى ژەهرى لادان و ڕیڤیژنیزم بخرێتە جەستەیەوە و گیان و مێژووى دەیان قارەمانى ڕۆژانى تەنگانە بووە خۆراک و بەردەبازى خۆپەرستى و هەلپەرستى سەرانى حیزبەکە .

چوونە قوڵایى مێژووى پاش و پێش بەناو - بەرەى نیشتمانى و نەتەوەیى پێشکەوتووخواز - لەگەڵ بەعسییە شیوعی کوژ و کودەتاچییەکانى شوبات پانتاییەکى زیاترى گەرەکە بۆ لێدوان وەلێ هێندەى ئەمەوێت ، مەبەستم وێستە کردنە لەسەر هەندێک دیاردەی پێکەنیناوى کە لەم دواییەدا خۆى ئەنوێنێ ، لاى هەمووان ئاشکرایە کە هەموو جارێک لە ژێر پەردەى ((( مەترسى ))) یەوە و هەر جارەى جۆرێک ((( مەترسى ))) کراوەتە بیانوو بۆ سڕینەوە و نەهێڵانى ڕۆڵى شایستەى شیوعییەکان لە مەیدانى سیاسى خەبات دا بۆ ئاراستە کردنى حیزبەکە بەرەو پاشکۆیەتى و کلکایەتى و خۆبەدەستەوەدان ، گەورەترین و دیارترین بزووتنەوەى بەڕەنگاریى سیاسەتى چەواشەکارانەى سەرکردایەتى حیزبى شیوعى لە دواى بەکەلاوە کردنى حیزب لە لایەن باڵەکەى کاک - عەزیز محەمەد - و ڕادەست کردنى حیزبەکە بەوان بۆ تەواو کردنى پەیامى بە ئاکام نەگەییشتوویان و لاواز کردنى حیزب و لە ئۆغر دانانى سیاسەتەکەى لە دەربارى دەسەڵات و پشت کردنە خواستەکانى جەماوەر و دابڕِان لێیان تا ڕووخانى ڕژێمى سەدامى فاشى ، کە لەوە بەدواوە ئیتر هیچ پاساوێک بە ناوى ((( مەترسى ))) یەوە بە دەستى سەرکردایەتی سازشکارەوە نەما تا بڕوبیانوو بهێننەوە لە وەلاخستنى ڕۆڵى شیوعییەکان ، و گەندەڵییە فیکرى و ڕێکخراوەیى و سیاسى و ڕۆشنبیرى و داراییەکان تا ئەهات ئاووستر ئەبوون و حیزبیان هێنابووە پەلەقاژەى مەرگ ، ئەوە بوو زۆرێک لە کادیرە ناوەندەکانى حیزب بە تایبەتى لە شارى سلێمانى بەو ئاقارەدا بیریان کردەوە یاداشتێک بکەنە هەوڵێکى دڵسۆزانە و بە ڕێگەیەکى شەرعى ئاراستەى سەرکردایەتى بکەن بە مەبەستى سنوور دانان بۆ ئەو نەهامەتییە بەردەوامانەى سات لە دواى سات دووچارى حیزبەکە ئەهاتن ، مخابن دەست ڕۆییشتووانى حیزبەکە لە جیاتى ئەوەى بە پیر ئەو هەوڵە دڵسۆزانەیەوە بێن پەنایان وەبەر سەرکوتى تەنزیمى و نانبڕین و چاو سوور کردنەوە هەتا بە هەڕەشەى سەربازیش ئەگات برد ، ( کۆڕى تێکۆشان لە پێناوى چاکسازى حیزبى شیوعى کوردستان ) هاتە بوون و بە گیانێکى پڕ هەست کردن بە بەرپرسیارێتیى مێژوویى بەرامبەر بە چینى زەحمەتکێشان و دواڕۆژى حیزب وەخۆ کەوتن و بەدوور لە گیانى لەتخوازى مکوڕ بوون لەسەر ئەوەى پێداچوونەوە بە هەڕەمى تەنزیمى و سیاسەتى حیزب بکرێت بۆ ئەوەى سیاسەتێکى سەربەخۆ دابڕێژن و بەناو سەرکردایەتیى حیزب نەکەن بەدەسکەلا بۆ خۆیان و خۆشیان نەبن بە دەسکەلاى ئەملاولا و کار بۆ ئاشتەوایى نێوان شیوعییەکان و سەرجەم چەپەکان بکرێت تا بە ڕۆڵى ڕاستەقینەى خۆیان هەستن و ئەرکى مێژوویى خۆیان ڕاپەڕێنن ، بێگومان ئەمە سەرانى حیزبەکەى تووشى هەناسە تەنگى کرد و هەموو شێوازێکیان بەکار هێنا بۆ دوور خستنەوە و ناشرین کردنى ئەو ڕەوتە شۆڕشگێڕە .

تواناکانى ( کۆڕى تێکۆشان ) لە ڕوانگەى هەست کردن بە بەرپرسیارێتى بەرامبەر ئاییندەى حیزب هەڵقوڵا بوو لە پێناوى چاوخشاندنەوە بە سیاسەتى حیزب و هەستان بە ڕۆڵى مێژوویى حیزب و ئەنجام دانى ئەرکە ڕاستەقینەکانى خۆى بۆ داکۆکى کردن لە بەرژەوەندییەکانى چینى کرێکاران و جوتیاران و تەواوى ڕەنجدەران و گێڕانەوەى متمانە ى جەماوەر بە حیزب ، لەو گەرمەى ململانێیەى ئێمە و دەستە و تاقمەکانى سەرکردایەتى دا زۆرێک پڕوپاگەندەچى و زوڕناژەن هەبوون نەفس نزمانە بە دوور لە هەموو بەهایەک شووڵیان لێ هەڵکێشا بۆ دژایەتى کردنمان و نانبڕینمان و دەرکردنمان و درۆ و بوختان هەڵبەستن بۆمان ، لە پێناوى جێپێ تۆکمە کردنى کەسایەتى نزم و داڕووخاویان هەرچییان پێ کرا بە زیادەوە کردیان ، نمونەى زیندووش بۆ ئەو ووشترمرخ - نعامە - انە کۆمەڵەى پێشمەرگە دێرینەکان بوون کە جڵەوەکەى بەدەستى هەندێک شوناس ناسراوى قێزەوونەوە بوو ، کەچى لەم ماوەیەى ڕابردوودا دەنگى نەشازى خۆیان بۆ چاوبەستەکى هاوڕێ دڵسۆزەکانى ڕیزەکانى حیزب بەرز کردۆتەوە و باس لە گۆڕانکارى و چاکسازى ئەکەن ، دیار ئەمەش جۆرێکە لە ئاخر شەڕى کە - ڕەجەب ئەیەوێت ببێتە سەرپاڵە - ! ! ! ئەم ڕەجەبۆکانە ئەو هەڵوێستانەیان لە هەست کردن بە لەرزینى کورسییە لەقەکەى سەرکردایەتییەکەیان سەرچاوەى گرتووە بۆیە هاتوونەتە قسە ، باوەڕ ناکەم کەس بە تەپڵى ئەوان هەڵپەڕێ چونکە لە شاخ و لە شاخیش ئەمانە خۆیان هۆکارى بەرەو دواوە بردنى حیزبەکە بوونە و ئەبن بۆ لەمەودوا .

ڕەوتى ناڕەزایەتى شیوعییەکان لە ئەداى سەرکردایەتییە خۆسەپێنەکەیان تا دێت لە برەو سەندن دایە ، و ململانێیەکى ناشەریفانەى توندیش لە نێو خودى سەرانى حیزبەکەش بە هەمان شێوە ، ئەم دوو ڕەوتە هاوکات و دژە یەکانگیر بوونە ، باڵى لاوازى هەڵپەکەر بە دواى کورسى دەسەڵات و پۆست و پلە و پارە و پایە و ئیمتیازات بێشەرمانە ئەیانەوێت سوارى پشتى گەمیى - بلم - ى ئەو ناڕەزایەتى و هەوڵە دڵسۆزانەیەى شیوعیەکان ببن و لەو ڕێگەیەوە ئەیانەوێت زۆرانبازییەکەى نێوان خۆیان یەکلایى بکەنەوە و دەنگە ناڕازییەکان بۆ خۆیان بکەن بە مقاش و بەسەر پشتى شیوعیەکانەوە بپەڕنەوە بۆ مەرامە پەنهانەکانیان ، بۆیە ئەمڕۆ لە هەموو کاتێک زیاتر لە شیوعییە ڕاستەقینەکان ئەخوازێت کە لە سەر هەوڵى ماندوو نەناسانەى خۆیان بەردەوام بن و بە ووریاییەوە ڕەفتار بکەن و ڕێگر بن لە دەستوەردان و دزە کردنى ئەوانەى تا دوێنێ بوو وەکو سەربازێک دەست لەسەر سنگ وەستابوون لە حزورى - هاوبیر و هاوبەرژەوەندى - یەکانى سەرکردایەتى و دژایەتى خۆیان بۆ هەر ڕەوتێک و ڕەخنەیەک ناشاردەوە کە داواى چاکسازى ئەکرد ، کە بەو ساختەکارییانەیان ئەیانەوێت تواناکانی نوێبوونەوە و گۆڕانکاریى بخەنە خزمەتى مەرامە تایبەت و گڵاوەکانی خۆیانەوە و ئیفلیجى بکەن ، چونکە هەر ئەوانە خودى خۆیان پارێزەر و برەو پێدەر و درێژە پێدەرى سیاسەتى خۆبەدەستەوەدان و بوونە دەسکەلاى دەسەڵات بوون و شانازیشیان پێوە کردووە ، کێ هەیە لەوە ئاگادار نەبێت کە ئەوانە حیزبەکەیان کردبوو بە کۆمیتە و ناوچە و دڵڕازى کردنى بەرپرسى لق و مەڵبەندەکانیان گەلێک لە سەرووى دڵنەوایى دایکە شەهیدێکەوە دائەنا ؟ کێ ئەوەى لەبیر ئەچێتەوە کە خانەوادەى شەهیدانیان بە سواڵکەر ئەشوبهاند و پێشمەرگە دێرینەکانیشیان بە گێل و نەفام ناو ئەبرد ؟ ئەدى هەر ئەوانە نەبوون بە دارایى گشتى حیزب ویژدانى هاوڕێکانى خۆیان ئەکڕى و ئەیاندایەوە بە گژى هاوسەنگەرەکانى دوێنێکەیان ! هەر ئەوانە بوون پارەى مۆڵ و زەوى دووبارە و خانەنشینى باشیان بۆ خۆیان بە ڕەوا ئەبینى و جێگۆڕکێیان بە هەق و ناهەق ئەکرد ، ڕەش و سپى ، پێشمەرگە و جاش ، کۆڵنەدەر و بەزیویان لە تەرازووەکانیان دا لاسەنگ ئەکرد ، ئەمڕۆ لە هەموو کاتێک پێویستترە دەنگى چاکسازى و گۆڕانکارى و خۆنوێکردنەوە و بەخۆداچوونەوە لە نێو بۆتەى ووریایی شۆڕشگێڕانە دا بتوێنرێتەوە و ڕێگە نەدرێت مساوەمەچییەکان هەوڵى شیوعییە دڵسۆزەکان لەبار بەرن .

ڕۆڵى حیزبى شیوعى هێندە بچووک بۆتەوە متمانەى هاوڕێکانى خۆشى لەدەست داوە ، ئەگینا بە چ لۆژیکێک ئەندامى مەکتەبى سیاسى حیزبێکى تەمەن سێ چارەگە سەدە نەتوانێت دەنگێکى ئەوتۆ بە دەست بهێنێت کە نەگاتە کۆى دەنگى هەوادار و دۆست و ئەندام و کادیرانى حیزبەکە لە شارێک دا بە مەرجێک لە هەر شارێک دا یەک کاندید هەبێت و پاساوى پەرش و بڵاوى دەنگەکان لە ئارادا نەبێت لە هەڵبژاردنى پەرلەمانى عێراق دا کە باس کردنى ڕووى ناو مەجلیسى نەبێت ؟ ! و بەڕێزیشیان چاو قایمانە تەشەبوس بە کورسییەکانیانەوە ئەکەن کە ئەبوایە ئەگەر دەستیش لەکار نەکێشنەوە لە سەر داواى خۆیان لە کاروبارى حیزبى سڕ بکرانایە ، نەک ئەمە نەکرا بەڵکو خەتاکەیان خستۆتە ئەستۆى پێگەى حیزب .

کۆنگرەى حیزبى شیوعى لە دواى ئەو هەموو شکستانەوە بۆتە خواستێکى هەنوکەیى و پێویستە پێداگیرى لە سەر بکرێت و لەسەر ئەم خاڵانە بنەماکانى دیارى بکرێت :

یەک - کۆنگرەیەکى فراوانى سەرجەم شیوعییەکان ببەسترێت بە دەرکراو و ڕەتێنراو و وازهێنراو و دابڕاوەکانیشەوە تێیدا بەشدار بن .
دوو - مەرجە ڕێگە لە دووبارە هەڵبژاردنەوەى دەستەو تاقمى ئێستاى سەرکردایەتى بگیرێت تا کۆنگرەیەکى تر بۆ ڕێگە گرتن لە گەییشتنەوە بە سەنتەرى بڕیار ، چونکە پشتیوانى کردنى ماددى و مەعنەوى و ڕاگەیاندنیان لە دەرەوەى حیزبەوە ئاراستەى کۆنگرە بە بەرژەوەندى ئەوان ئەشکێنێتەوە ، ئەمە وەکو سزایەکى حیزبى بەسەریان دا بسەپێنرێت و بە گشتى بەرپرس بکرێن لە نەهامەتییەکان چونکە ئەوەى بەشداریشى لەو سیاسەتە چەوتە نەکردبێت بەڵام بێدەنگیى هەڵبژاردن لە بەرامبەرى دا بەشدار بوونە لێى .
سێ - ئەرکى سەرەکیى کۆنگرە پێچەوانەى نەهجى سازشکارانەى ئێستاى سەرانى حیزبەکە دەست نیشان بکرێت بەوەى حیزب لە باوەشى دەسەڵات دەربهێنرێت و بگەڕێتەوە سەنگەرى ڕاستەقینەى خۆى کە سەنگەرى گەلە .
چوار - تواناکانى کۆنگرە تەرخان بکرێت بۆ ئاشتەواییەکى بەرفراوانى نێوان سەرجەم هێزە چەپەکان .
پێنج - لێپێچینەوە لە داهات و خەرجى و موڵک و ماڵ و سامانى سەرانى حیزب و چۆنێتى وەدەست هێنانى بکرێت .
شەش - ناو و ناسنامە و سیاسەتى گشتیى حیزب دووبارە بەڕاى کۆنگرە پەسەند بکرێت .
حەوت - ڕەخنە لە ڕابردووى نزیک بگیرێت و داهاتووى لەمەودوا هەڵبسەنگێنرێت و بە ئاشکرا ڕابگەیەنرێت .
هەشت - فاکتەرەکانى نەهامەتییەکانى حیزبەکە دەست نیشان بکرێن و کەسانى بەرپرس بە یەکجاریى لە حیزب دەربکرێن بە تایبەتى ئەوانەى لە مەکتەبى سیاسى دان و کێشەى مەلەفە جاسوسییەکان بخرێتە بەردەم هاوڕێیان و جەماوەرى حیزب و بڕیار لە چارەنوسیان بدرێت .
نۆ - خانەوادەى شەهیدان و پێشمەرگە دێرینەکان و زیندانییە سیاسییەکان و تێکۆشەرانى خەباتى ژێرزەمینى لە سەردەمى دەسەڵاتى بەعس دا بە گشتیى بێ کۆت و بەند و مەرج بانگهێشتى کۆنگرە بکرێن .
دە - لە کۆنگرەدا ووتەکەى هاوڕێ - فەهد - بە هەند وەربگیرێت (( ڕێکخستنەکانى حیزب بەهێز بکەن ، ڕێکخستنەکانى بزووتنەوەى نیشتمانى بەهێز بکەن )) نەک وەکو ئێستا بۆ مەرامى تایبەتى پێچەوانە بکرێتەوە و پایەکانى دەسەڵات بەهێز بکرێت و ڕێکخستنەکانى حیزبیش لاواز !

بەم کارە گوڕێک بە حیزبەکە ئەدرێت و گورزێکیش لە دوژمنانى ، ئەمەش شیوعى جوامێرى ئەوێت نەک گەندەڵچییەکانى دوێنێ کە تا سەر ئێسک نغرۆى گەندەڵیین و ئێستا ئەیانەوێت چاکسازى و گۆڕانکارى بکەن بە دروشم ، ئەو حیکایەتەم دێنێتەوە یاد کە ئەگێڕنەوە : کۆمەڵە گەنجێک لە شوێنێک دا پێکەوە ئەژیان یەکێَک لەناویان دا دز و دەسپیس ئەبێت و هەر جارەى کە هاوڕێکانى بچن بەلایەک دا جەنابى زەفەر بە یەکێکیا ئەبات و دزییەکى لێ ئەکات ، بیر لە چارەسەریى بۆ ئەم کێشەیەى بەرۆکى پێ گرتوون ناچارى ڕا و تەگبیریان ئەکات ، هەموویان کۆک ئەبن لە سەر ئەوەى لە کاتى چوونە دەرەوەدا ڕەفیقە دزەکەیان لەو شتە بەنرخانە ئاگادار بکەنەوە کە لە ژوورەکەدا جێ ئەمێنێ و پێى ئەڵێن تا دێینەوە چاوت لێ بێت ، دزەى برادەریشیان ئەکەوێتە ئەمرى واقیعەوە و ناچار ئەبێت ئەبێتە پاسەوانى شتومەکى هاوڕێکانى ، ئێستاش ئەبێت شیوعییە ڕاستەقینەکان بەو ڕوحیەتە ڕەفتار لەگەڵ ئەو گەندەلچییانەدا بکەن و متمانەیان پێ نەبەخشن چونکە باوەڕ هێنان بەوان ڕیسەکە لێ ئەکاتەوە بە خورى ، بەڵام سوود لە توانا ( کەلێن ) ەکانیان وەربگیرێت بۆ زیاتر بەرچاو ڕوونى کارێکى باشە و خراپ نیە و بە عەقڵ و لۆژیک مامەڵەیان لە تەک دا بکرێت نەک بە هەست و سۆز چونکە ناوبراوان کارامەن لە ختوکەدانى سۆزى دەوروبەرەکەیان لە کاتى تەنگەتاوى دا ، ئەوان تەنها مەتڵەبیان چڕنووک گیر کردنە بە کورسى ژەنگاوى و قەپ گرتنە بە پارووى چەورى خۆیانەوە و هیچى تر ، ئەوان تەواوى تەمەنى ئەم دواییەیان بە ڕیایى و نیفاق بەسەر بردبێ بۆ لەمەودواش شەرم دایان ناگرێت گەمە بە بەڵێنەکانى خۆیانەوە بکەن و لێى پاشگەز ببنەوە بۆیە باشتر وایە ڕەواج بە هاش و هووشیان نەدرێت و بکرێن بە پاسەوانى ئەمرى واقیع نەک سەرقافڵەى چاکسازى ، چونکە چاکسازى بە ئینسانى چاک ئەکرێت نەک چاکدز ، چاکترین چاکسازیش پاکسازییە لە ناپاکان .

07701309524

Hewarash1@yahoo.com