هه‌ڵوه‌شاندنه‌وه‌ی لیستی خزمه‌تگوزاری و چاکسازی له‌ پێناو به‌رژه‌وه‌ندی حیزبی.

  
هه‌ورامان عه‌لی تۆفیق

به‌پێی ئه‌و هه‌واڵانه‌ی که‌ ڕاگه‌یاندنه‌ کوردیه‌کان و له‌ هه‌ندێک له‌ ڕاگه‌یاندنه‌ عه‌ره‌بیه‌کان بڵاوده‌کرێته‌وه‌ سه‌باره‌ت به‌ به‌شداربوونی زه‌حمه‌ت کێشان و سۆسیالست له‌ پێکهاته‌ی کابینه‌ی شه‌شه‌م دا ، له‌گه‌ڵ هه‌ڕه‌شه‌ی هه‌ڵوه‌شاندنه‌وه‌ی لیستی خزمه‌تگوزاری و چاکسازی ئه‌گه‌ر لایه‌نه‌ ئیسلامیه‌کان به‌شداری له‌ حکومه‌تدا نه‌که‌ن ..

ئه‌م هه‌واڵانه‌ ئه‌و ڕۆژانه‌مان دێننه‌وه‌ یاد که‌ ئه‌م لایه‌نانه‌ له‌ هه‌ڵمه‌تی هه‌ڵبژاردنه‌کاندا و به‌تایبه‌ت له‌ زاری سه‌رکرده‌کانیانه‌وه‌ بۆ پڕوپاگه‌نده‌ی هه‌ڵبژاردنه‌کان له‌ ژێر په‌رده‌ی چ دروشمێکدا له‌گه‌ڵ جه‌ماوه‌ر ده‌دوان ... ؟‌ و چ به‌رنامه‌و کارو هه‌نگاوێکی ئاینده‌ییان وه‌ک به‌ڵێن به‌ لایه‌نگرو ئه‌ندامه‌کانیان ده‌ داوه‌ و وه‌ک ئۆپۆزسیۆن خۆیان ده‌ناساندوو چه‌ندین ڕه‌خنه‌و گازنده‌یان له‌ ده‌سه‌ڵات و به‌تایبه‌ت هه‌ردوو پارتی خاوه‌ن ده‌سه‌ڵات ده‌گرت ..

ئاستی سیاسی و ڕۆشنبیریه‌تی سیاسی کوردی له‌ ڕێچکه‌یه‌کی داخراوی ته‌قلیدی دا ده‌سوڕێته‌وه‌ و ته‌نها له‌ چوارچێوه‌ی به‌رژه‌وه‌ندیه‌ حیزبی و تاکه‌ که‌سیه‌کان به‌ولاوه‌ تێپه‌ڕناکات و ئه‌گه‌ر به‌وردی باس له‌وه‌بکه‌ین له‌ گۆڕه‌پانی سیاسی کورد له نزیکه‌ی‌ نۆزده‌ساڵی ڕابردوودا هیچ پێوه‌رێکی دیموکراتی ڕاسته‌قینه‌ی به‌خۆوه‌ نه‌دیووه‌ و ته‌نها کارکردن بووه‌ له‌ پێناوی ژیان و کات به‌سه‌ربردن و وه‌رگرتنی ده‌سه‌ڵات و وه‌رگرتنی به‌شێک به‌ داهات و بوجه‌ی هه‌رێم و دابه‌شکردنی به‌سه‌ر یه‌کدا وه‌ک براو و ماوه‌یه‌کیش شه‌رکردن له‌سه‌ری ..

له‌ هه‌ڵبژاردنه‌کانی 25.07 دا شێوازه‌کان گۆڕان و ده‌رگایی به‌ربه‌ره‌کانی و به‌ ئۆپۆزسیۆن بوون واڵابوو ئه‌مه‌ مانایی ئه‌وه‌ ناگه‌یه‌نێت که‌ پێشتر ڕێگا نه‌دراوه‌ به‌ڵکو پێشتر ئه‌و لیستانه‌ درووست نه‌بوون و ئه‌و لایه‌نانه‌ی که‌ بوونیان هه‌بوه‌ له‌و ئاسته‌ دانه‌بوون که‌ ببنه‌ ئۆپۆزسیۆن و هه‌میشه‌ چاو له‌وه‌بووه‌ که‌ چۆن بژین و چون په‌رته‌کانیان به‌و بڕه‌ پاره‌ی که‌ وه‌ریان ده‌گرت به‌ڕێوه‌ به‌رن ..

پڕۆسه‌ی دیموکراتی ته‌نها به‌ بوونی ئۆپۆزسیۆنه‌وه‌ شه‌رعیه‌تی هه‌یه‌ و ده‌کرێ ئه‌و کۆمه‌ڵگایه‌ له‌ زۆر لادان و هه‌ڵه‌ی مێژوویی لادات تێکڕایی ئه‌و ڕێچکه‌ سیاسیه‌ له‌سه‌ر ڕێڕیووی ئاسایی خۆیی دابنێت ، کاتی ئه‌وه‌ هاتووه‌ ئێمه‌ی کورد له‌م ڕوانگه‌یه‌وه‌ کاربکه‌ین و چی دی بیر له‌ پاره‌و ده‌سه‌لات و ژیانی حیزبه‌کان نه‌که‌ینه‌وه‌ ، چونکه‌ ئه‌مڕۆ ئه‌و خه‌ڵکه‌ی که‌ ده‌نگیان داوه‌ به‌ لائه‌نه‌کانیان و په‌ێی کاره‌کانیان بۆ ئاینده‌ ده‌بینێ له‌ ئاست به‌ڵێن و دروشمه‌کانتاندا نه‌بوون به‌ دڵنیاییه‌وه‌ له‌ هه‌ڵبژاردنه‌کانی داهاتوو دا ئه‌و ده‌نگانه‌ که‌م ده‌بنه‌وه‌ وه‌ک ئه‌وه‌ی له‌م هه‌ڵبژاردنانه‌دا دیمان چون هه‌موو لایه‌نه‌کان ڕێژه‌ی لایه‌نگران و ده‌نگه‌کانیان به‌و شێوه‌یه‌ و له‌چاو هه‌ڵبژاردنه‌کانی چه‌ند ساڵی پێشودا دابه‌زی بوون و ئه‌گه‌ر کارو کردارو و به‌رنامه‌ و پێداچونه‌وه‌ و گۆڕان و چاکسازی و به‌ره‌نگاربوونه‌وه‌ی پێویستی گه‌نده‌ڵێ نه‌بنه‌وه‌ ئه‌وه‌ لایه‌نه‌ به‌ڵاده‌سته‌کانیش له‌و ئاسته‌ی ئێستایاندا نامێننه‌وه‌ چونکه‌ ڕێژه‌ی ده‌نگه‌کانی ئه‌وانیش له‌ ئاست قورسایی جاراندا نه‌ماوه‌ و هه‌ڵبژاردن له‌ دوای هه‌ڵبژاردن به‌ره‌و که‌م بوونه‌وه‌ ده‌چێت و پێویسته‌ به‌دواداچوونیان سه‌باره‌ت به‌هۆکاره‌کان هه‌بێت و چاره‌سه‌ری پێویست بۆ چاککردنی باری ڕێکخراوه‌ی خۆیان و به‌رناو کارو ئاراسته‌کانیان به‌ره‌و باشتر به‌رن چونکه‌ ڕۆژکار له‌گۆڕان دایه‌و و ده‌بینین دونیای سیاسی دونیاو ده‌وروبه‌ر چۆن بێ ڕه‌حمانه‌ گۆڕانی به‌سه‌ردا دێت ..

له‌ ده‌ره‌نجامی هه‌ڵبژاردنه‌کاندا کۆیی ده‌نگی‌ چوار حیزبه‌که‌ و ئه‌و ده‌نگانه‌ی که‌ به‌ده‌ستیان هێنا و به‌ دڵنیاییه‌وه‌ زۆربه‌ی زۆری ده‌نگان لایه‌ن کۆمه‌ڵ و یه‌کگرتووه‌وه‌‌ به‌ده‌ست هاتوون و ئه‌و دوو لایه‌نه‌که‌ی دی ئه‌گه‌ر به‌ته‌نها یان پێکه‌وه‌ به‌لیستێک دابه‌زینایه‌ ڕه‌نگه‌ ته‌نها کورسێکیشیان له‌ په‌ڕله‌ماندا به‌ده‌ست نه‌‌هێنایه‌ و ئه‌مڕۆ نه‌یان ده‌توانی لیستی خزمه‌تگوزاری و چاکسازی له‌ پێناو ده‌سه‌لات و پاره‌و مانه‌وه‌دا هه‌ڵده‌وه‌شێننه‌وه‌ . بێ گومان لایه‌نه‌ ئیسلامیه‌کان پێش واده‌ی هه‌ڵبژاردنه‌کان و به‌پێی بۆچوونی چاودێران واچاوه‌ڕوان ده‌کرا ڕێژه‌ی ده‌نگه‌کانیان زۆر له‌و ئاسته‌ی ئێستایاندا به‌رز تر بوایه‌ ، به‌ڵام به‌پێچه‌وانه‌وه‌ ده‌نگه‌کانیان زۆر که‌م بوون ، ئه‌وه‌ش په‌یوه‌ندی به‌ کاری سیاسی و ئیداری ئه‌و چه‌ند ساڵه‌ی پێشویان له‌ ئیداره‌ی حکومه‌ت دا ، بێگومان به‌شدار بوونه‌وه‌یان له‌ده‌سه‌ڵات بۆ هه‌ڵبژاردنه‌کانی داهاتوو زیانی زیاتریان پێده‌که‌وێت .

تیکڕای گرفته‌کانی دوای هه‌ڵبژاردنه‌کان ئه‌وه‌ ده‌سه‌لمێنن که‌ به‌ره‌ی ئۆپۆزسیۆن و ئه‌رکه‌کانی و ڕۆڵی له‌ گۆڕه‌پانی سیاسی دا نه‌زانراوه‌ وتێگه‌یشتن بۆیی لاوازه‌ و له‌و ئاسته‌دا نیه‌ و به‌رده‌وام به‌ بیانوویی به‌رژه‌وه‌ندی نه‌ته‌وه‌یی و پاراستنی ئه‌م ئه‌زموونه‌ ، پڕۆسه‌ی دیموکراتی به‌ره‌و شکه‌ست ده‌به‌ن و ڕێککه‌وتن له‌ دابه‌شکردنی داهات و سه‌روه‌ت و سامانی خه‌ڵک و خورانی مافی که‌سایه‌تی کورد و نه‌بوونی دادپه‌روه‌ری سیاسی و کۆمه‌ڵایه‌تی و ڕۆشنبیری و په‌رته‌وازه‌بوونی ئه‌و شێرازه‌ی که‌ ده‌کرێ کۆمه‌ڵگا به‌ره‌و سه‌رکه‌وتن و لوتکه‌ی گه‌شانه‌وه‌ به‌رێت ..