هەوڵوێست،بە نرخى رۆژ!

بەشدار عه‌لی      

هیچ داوە دەزوویەک نیە من و عەلى باپیرى ئەمیرى کۆمەڵى ئیسلامى کوردستان بەیەکەوە ببەستێتەوە و لە هیچ هاوکێشەیەکیشە ئەنجامەکانمان ناگەنەوە یەکتر،ئەمە ناوەرۆکى باسەکەمان نیەئەمەم تەنها بۆ ئەوە بوو تاکو بەیانى منیش بە( جاش و خائین و خۆفرۆش و تیرۆرست )ناونەبەن! ئەوەى من دەمەوێت لەم پەرەگرافە باسى بکەم سەنگەر گرتن و هێرش و هەڵوێستى ئەم دواییانەى پارتییە لە عەلى باپیر،لەم هەفتەیەدا راگەیاندنى پارتى راستەوخۆ و ناراستەوخۆ کەوتونەتە سەنگەر لە عەلى باپیر و بە هەموو شێوەیەک دەیانەوێت هەر تۆمەت و کارێک بەسەریدا ساغ بکەنەوە،ئەوەى من لە نوسینەکان و زمانى قسە کردنەکان تێگەیشتبم ئەوەیە گوایە ناوبراو قسەى بە دەزگاکانى ئەمنى و حکومى گووتوە و تۆمەتى خستونەتە پاڵ، بە ئەنجام دانى کارى نایاسایى،ئەوەى جێگاى پرسیارى ئایا ئەو هەڵوێست و سەنگەر گرتنەى پارتى لە کوێوە سەرچاوەى گرتووە؟

بە بڕواى من هەڵوێست و هێرشى ئەم جارە،هەڵوێستە بەرامبەر دۆستێکى (بێ وەفا)ى پارتى کە عەلى باپیرە.چونکە ئەوان ساڵەهاى ساڵە هاوکارى و یارمەتى ئەو و حیزبەکەى دەدەن و بەرگرییان لێ کردووە و بە لێشاو سامانى خەڵکیان خستۆتە بەردەستى بۆ ئەوەى مناڵان و ژنان و لاوان لە چادر هەڵکێشێ و تۆى رقو تۆڵە سەندنەوە و ترس و دڵەراوکێ لە نێو هزرى تاکەکان چێ بکات،بۆ نێو حکومەت و پەرلەمانەکانیان پەلکێشیان کرد( بەبێ ئەوەى بڕواى بە پرۆژەکانیان و پیرۆزییەکانیان هەبێت)،دەیان یاسا و دەستورى ئیفلیجیان لەبەر چاوى کاڵى عەلیەکان بەسەر سەرى هەزارەها ئینسانى ئازادیخواز سەپاندووە و بە پەیڕەوى ئەو یاسا و دەستوورانە هەر ساتە و هیوا و خۆزگەى دەیان کچ و کوڕى گەنج و مناڵ دەخرێتە ژێر گڵ،بەبەرچاوى دەزگا ئەمنیەکانى پارتى و یەکێتى مێشکى هەزارەها گەنجیان بە بیرو باوەڕى دواکەوتوانە ئاخنى و و خۆشى و سەیران و رەفاهیەت و ژیانیان لەبەرچاو خستن و بۆ نێو باوەشى مەرگ راپێچیان کردن،مزگەوتەکانیان کردە شوێنى کۆبوونەوە بۆ لە گۆرنانى خەون و هیواکانى خەڵکى کوردستان،بە ئاشکرا دژى هەر نوزەیەکى ئازادیخوازى و یەکسانیخوازى وەستانەوە و بە دەیان ئینسانى شەریفیان لە شارەکانى هەولێر و سلێمانى دهۆک تیرۆر کرد،چەندان ساڵۆنى ئارایشى ژنان و یانەى سەر گەرم کردنى لاوانیان تەقاندەوە،....،بەڵام بەیەک دێریش هەڵوێستى بەرامبەر وەرنەگیرا، بەڵکو بە پێچەوانەوە دەستى لە پشت درا!،ئەى خێرا ئیستا پارتى و یەکێتى دەیانەوێت بە (خائین و خۆ فرۆش و تیرۆرست)ناوى بەرن و بە ئێمەى بناسێنن و وەکو هەڵوێستیکى نیشتیمانیش پێمانى بفرۆشنەوە و خەڵکیشى لە دژ هەلخرێنن؟!

ئەوەى راستى باسەکەیە ئیستا پارتى و یەکێتى کۆنترۆڵەکەیان لەدەست دەرچووە و مەترسى و کاریگەریەکەى لە گەردنى خۆیان نزیک بۆتەوە و هەستیان بە هەڵەکانى خۆیان کردووە و بەرووى خۆیان هەڵگەرایەوە،بۆیە ئیستا دەیانەوێت جڵەوەکە بۆ خۆیان راکێشنەوە و مەترسیەکانى لەسەر خۆیان لاببەرن، ئەوە تەنها نان خواردنە بە نرخى رۆژ و بەس،ئەگەر بەیانى عەلى باپیر و کۆمەڵى ئیسلامى تەنها ئاراستەىمەترسیەکانیان لەسەر پارتى و یەکێتى لابەرن و وەکو پێشتر رووى زیاتر لە خەڵک بکەن،هەمان دۆستەکەى پێشتر و هیچ کێشەیەکیان لەگەڵ بۆچوونەکانى نیە.
 

Bashdar_net@yahoo.com