٤\٢\٢٠٢١

ھەناو بۆگەنەکان!

ئەرسەلان مەحمود    

هەر جۆرە ڕوانگە و ئاین و ئایدیا و دنیا بینییەك لەناو خۆی و بەڕوی دەرەوەی خۆیدا بەرگەی بەپێوە وەستانی كێلێك پەیكەرێك یا تابلۆیەك نەگرێ، بیانەوێ‌ یان نەیانەوێ‌ شوێنكەوتەو هەوادارەكانی ئەم ڕوانگەو ئاین و ئایدیاو جیهانبینییە لەخۆیانداو بەرامبەر بەدەرەوەی خۆیان تەریك و تاریك و ترسناك بوونەوەرن، ئەم فەرهەنگە بەخودو دەوروبەر نامۆیە لەهەر شوێن و ژینگەیەكیشدا حوكم بكات، تابێ‌ ئەو ناوە وێرانتر دەكاو دەبێ لەڕەگەوە ڕیشەكێش بكرێت.

لە هەر كوێیەك‌ تاك و دەستە کۆنەپارێزەکانت بینی تووڕە بوون، بزانە لەو شوێن و ژینگەیەدا سەرەتای دەستپێكردنی گۆڕانكاری ڕیشەیی بەڕێگەوەیە، ئەو جۆر بیرکردنەوە و ئەو دەستە پیسانەی پێرێ كێلەكەی "شێركۆ بێكەس"یان لەسلێمانی شكاند، دوێنێش لە بداخ سوڵتان كێلەكەی "ماملێ"یان شكاند، ئەمانەی ئەمڕۆش پەیكەری"فەقێ ئەحمەدی دارەشمانە" لە قەڵادزێ و كێلی شەهیدانیان لە هەڵەبجە شكاند، هەر هەمان ئەم بیرکردنەوە و دەستانەن.

هەڵمەتی شاراوەو ترسنۆكانەی شكاندنی تابلۆو پەیكەرو كێلەكان لە كوردستان و هەر كوێی جیهاندا، شكاندنێك نییە ئاسایی، لە دەروونێکەوە دێ‌ نەخۆش و ناخۆش و نامۆو نەزۆك، ڕەفتارێكە تەواو میللیگەرایی و تەواو کۆنەپارێزانانەیە، هەوڵێكە پشتبەستوو بەجوینەوەی بانگەوازە كۆنەكان و كاوێژكار، كاردانەوەیەكە تاكڕەهەندگەرا و دژی بە زیندویی هێشتنەوەی شارستانیەتەكان، ئامانجەكەی لێدانە لەپایەو پێگەو بنەماكانی شار، چونكە لە دید و هزری کۆنەپەرستاندا ئەوەی شار و شارستانییەتەكان بینا دەكا و بە زیندویی دەیانهێڵێتەوە، خودی بەدکار و هزری بەدکارییە، ئەمە بێگومان ڕێك بە واتا و چەمکە میللیگەرایی و نەریتییەکەی!

بیركۆن و كۆنە هزر فرۆشەكان، باوەڕیان بەم جیهانە نییە تا لەپێناو هەبوون و ژیانێكی بە واتا و شایستەتردا بیانەوێ‌ هەوڵبدەن و تێبكۆشن، ئەوەی دەیكەن بۆ لەگۆڕنانی ژیانە بە هەموو واتەیەکانیەوە، هەر بۆیە هەرگیز بۆیان گرینگ نییە خەڵكی لەچ دۆخ و سەردەم و کاتێکدا ژیان دەكەن هەستیار، ئەوان دژی ستەم و ستەمكاران نین و ناشیانەوێ‌ هیچ تاك و دەستەیەک هەبێ‌ بیر بكاتەوەو بجەنگێت لەو پێناوەدا، هیچ كات و دەمێک و دەرفەت و درزێكیش لەدەست نادەن تا لە ڕێگەیەوە تێڕامانی تاك و خەڵك لاڕێ‌ بكەن تا لەبری ژیان بە شتانێكی ترەوە خەریكیان بكەن.

هەرگیز پیرۆزیی لە پێدراوە مرۆییەكاندا نییە، ئەمە بەو پێوەرەی ئەمەی لای تاك و دەستە و كۆمەڵگەیەك پیرۆزە بەدڵنیاییەوە لەلای تاك و دەستە و كۆمەڵگەیەكی تری مرۆیی هەمان ئەو بەهایەی نییە، خودا بەمانا هاوسەنگییە هزریی و فەلسەفییەكەی خۆی پیرۆزییە. هەرگیز ئابڕوو شتێك نییە كەوتبێتە ناوگەڵەوە، هەڵكەوتەو دەركەوتەی داهێنەرانەو قوربانی مرۆییە، شێركۆ ئابڕووە، ماملێ ئابڕووە، فەقێ ئابڕووە، داهێنەرەكان، شەهیدەكان، قوربانییەكان، خاك، ئاڵا، ..تاد ئابڕوون، لەبەر ئەوە ئەوەی دەبوو مرۆڤی كورد بونیادبنێتەوەو لەخۆیداو جارێكی دی ئامادەیبكاتەوە، تێگەیشتن بووایە وەها پیرۆزییەك، ئەوەی دەبوو تاكی كورد جۆش بداتەوە لەخۆیدا، وەرگرتن و پەسندکردنی وەها ئابڕوومەندییەک بووایە.

بەڵام چونكە تێگەیشتنەكە و وەرگرتنەكە لە سەرچاوەیەكی ترەوە ئاو دەخواتەوەو هەناسە ئەدا، تاك و دەستە و هێزە جڤاكی و سیاسیەكەی كوردو لەمەڕ كوردەواری، سەیركە كاتێ‌ لەلایەن یارو نەیاریانەوە بوونە دڕندەییەکەیان دەخرێنە ژێر پرسیارو ڕەخنەكارییەوە، لەبری ئەوەی وڵامدەرەوەیەكی ئەرێنییانە و گفتوگۆئامێز بن، دەكەونە بەشیننەوەی رق و بێڕێزیی پاساوهێناوەی رووت، یان دەست ئەدەنە هۆنینەوەی چیرۆك و داتاشینی سیناریۆی درۆزنانە، یان بۆ بەرگریكردن لەخۆ هەوڵئەدەن لەڕێگەی ئەوانی ترەوە مەسەلەكە وەك ئەوەی خۆیان دەیانەوێ‌ بەبیانوی دەستگرتن بەمانەوەی ئەو نا پیرۆزییانەی بەپیرۆزیان كردوە و ئەم جۆرە لە ئابڕووەی لە ناوگەڵدا حەشاریانداوە بەكۆمەڵایەتی بكەن.

لێیان تێكچووە! ئەمانە خودا نین، خودن، خودێكی نەرێنیی و بێ زمان و بێ‌ مەژیی و پەتی، تەنانەت توانای تێپەڕین لە خێوەتگەی خێڵەكەشیان نییە چجای وزە و هێز و ویست و بوێرییی وڵامدانەوەو خۆیی بوون، تێڕوانینی میللیگەرایی و دەمارگیر، بنەماكەی فشۆڵە و ئایندەی نییە، هەڵدەچێ بەڵام یەک گەرد چیە بەرگەی چجۆرە داچوونێك ناگرێ، تەنها رێگە و دەرچەیەك ئەگەر لەبەردەمیدا هەبێ، دوا جار جگە لە خۆبەدەستەوە دان هیچی تر نییە.

ماڵپه‌ڕی ئه‌رسه‌لان مه‌حمود