په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١٥\٨\٢٠١١

هێرشی هه‌مه‌لایه‌نه‌ بۆ سه‌ر پژاک.

- وه‌ڵامێک بۆ کاک عه‌زیز شێخانی -

جه‌لال محه‌مه‌د    

- به‌شی چواره‌م: بۆ ئه‌وه‌ی بڕوات پێ بکرێ، ده‌سته‌ چه‌وره‌که‌ی خۆت به‌سه‌ر به‌رامبه‌ره‌که‌تدا بسوو -

 

 

هێنده‌ی درۆ و ده‌له‌سه‌ی لایه‌نه‌ کلاسیکه‌کان دژ به‌ پ‌ک‌ک و پژاک سه‌رکه‌وتوو بووه‌، نیوهێنده‌ درۆ و ده‌له‌سه‌ی داگیرکه‌ران دژ به‌و دوو لایه‌نه‌ سه‌رکه‌وتوو نه‌بووه‌، چونکه‌ دیرۆکی ژیانی لایه‌نه‌ کلاسیکه‌کان به‌شێک بووه‌ له‌و جۆره‌ بوختانانه‌ی که‌ ئیمڕۆکه‌ ئاڕاسته‌ی پ‌ک‌ک و پژاکی ده‌که‌ن له‌ ڕێگه‌ی که‌سانی گرێدراو به‌ خۆیانه‌وه‌، بۆ نموونه‌ له‌ به‌شێکی دیکه‌دا کاک عه‌زیز شێخانی ده‌ڵێت :-


{ ئه‌و حیزبه‌ی که‌ پارتی کرێکارانی کوردستان بۆ رۆژهه‌ڵاتیان دروست کرد، هێشتا له‌ ژێر ته‌م و مژی جۆراوجۆردایه‌ و زۆربه‌ی بڕیاره‌ گرینگ و هێڵه‌ فه‌رمیه‌کانیان له‌ نێو پارتی کرێکارانی کوردستاندا بڕیاری له‌ سه‌ر ده‌درێ. به‌ڵام بۆ له‌ خشته‌بردنی خه‌ڵک و راکێشانی سرنجی ئه‌وانه‌ی دڵیان بۆ کوردایه‌تی لێده‌دا ژماره‌یه‌ک خه‌ڵکی رۆژهه‌ڵاتیان وه‌ک سه‌رۆک و وته‌بێژ و ئه‌ندامی کۆنسه‌ی سه‌رۆکایه‌تی داناوه‌. له‌ ده‌ره‌وه‌ی وڵاتیش ژماره‌یه‌ک کوردی رۆژهه‌ڵات، که‌ له‌ حیزبه‌کانی دیکه‌ دابڕاون و له‌ کۆمه‌ڵگای ده‌ره‌وه‌دا جێگا و رێگایه‌کیان نییه‌ له‌و پارته‌ نیزیک بوونه‌وه‌.} .


کورد ده‌ڵێت " خوی شیری تا پیری " . کاک عه‌زیزیش چونکه‌ گیرۆده‌ی ده‌ستی لایه‌نێک بووه‌ که‌ هیچ بڕوایه‌کی به‌ کێشه‌ی کورد و داگیرکراوی کوردستان نه‌بووه‌ ، ته‌نها بۆ له‌ خشته‌بردنی کوردان پاشکۆی "کوردستان"یان کردووه‌ به‌ خۆیانه‌وه‌ و هه‌میشه‌ کوردیان کردووه‌ به‌ په‌یژه‌یه‌ک بۆ سه‌رکه‌وتنی پانئێرانیست و دژه‌ کورده‌کان ، ئه‌وا ده‌یه‌وێت له‌ ڕێگه‌ی هێرشکردنه‌ سه‌ر پژاکیش لایه‌نێکی شۆڕشگێڕی وه‌کو پ‌ک‌ک به‌ بێگانه‌ بناسێنێت وهه‌موو ڕابردووی هێزه‌ کلاسیکه‌کانی پێ بشارێته‌وه‌ !


ئه‌وه‌ حیزبی دیموکرات بوو هه‌موو بڕیارێکی له‌ ده‌ره‌وه‌ بۆ ده‌هات . تا فیرقه‌ی دیموکراتی ئازه‌ربێجان بره‌وی هه‌بوو هه‌موو بڕیارێکی حیزبی دیموکرات له‌ " باکۆ "وه‌ بوو ، کاتێکیش فاتیحه‌ له‌سه‌ر فیرقه‌ی دیموکرات خوێندرا حیزبی توده‌ بابه‌ گه‌وره‌ بوو ، به‌ په‌رته‌وازه‌بوونی حیزبی توده‌ش موجاهدینی خه‌لق هه‌مه‌کاره‌ بوو ، پاش موجاهدینیش نیوه‌ی ڕێگه‌یان شاری به‌غدا بوو ، پاش له‌ گۆڕنانی حیزبی به‌عسیش خۆ ناکرێت له‌قه‌ له‌ به‌ختی که‌چی خۆیان بده‌ن و واز له‌و بڕه‌ موچه‌یه‌ی مامه‌ و کاکه‌ بهێنن ، ئه‌مه‌ جگه‌ له‌ ڕازاندنه‌وه‌ی شه‌وانی سه‌رخۆشی بۆ مارینزه‌کانی ئه‌مریکی به‌ سازدانی کۆڕی سوڕ و بادان ، ئه‌و مارینزانه‌ی که‌ له‌ ڕابردوودا به‌ ئیمپریالیزمی دژه‌ به‌شه‌ری ناویان ده‌بردن . له‌ چاوی کاک عه‌زیزه‌وه‌ هه‌موو ئه‌م کرده‌وانه‌ی لایه‌نه‌ کلاسیکه‌کان شۆڕشگێڕێتی و ڕه‌وایه‌ ، لێ به‌ڵێ ؛ ئه‌گه‌ر پ‌ک‌ک ده‌ستی هاوکاری بۆ کوردی پارچه‌کانی دیکه‌ درێژ بکات و ببێته‌ پشتوپه‌نای هێزێکی شۆڕشگێڕی وه‌کو پژاک ئه‌وه‌ تاوانه‌ و ئه‌م تاوانه‌ش پاکبوونه‌وه‌ی نی‌یه‌ .


کاک عه‌زیز باس له‌وه‌ ده‌کات له‌ ده‌ره‌وه‌ی وڵاتیش ژماره‌یه‌ک ڕۆژهه‌ڵاتی له‌ پژاک نزیک بوونه‌ته‌وه‌ ، به‌هۆی دابڕاویان له‌ حیزبه‌کانی دیکه‌ و نه‌بوونی جێگه‌ و ڕێگه‌یان له‌ کۆمه‌ڵگادا !!!


بۆ بیرهێنانه‌وه‌ی کاک عه‌زیز و ئاگاداری خوێنه‌رانیش ، ئه‌وانه‌ی که‌ کاک عه‌زیز به‌م جۆره‌ باسیان ده‌کات ، چه‌ندین که‌سی زۆر نزیکی کاک عه‌زیزیان تێدا بوو ، یه‌کێک له‌وانه‌ که‌سی یه‌که‌می کاک عه‌زیز بوو که‌ ئه‌و کات به‌رپرسی یه‌کێتی لاوانی دیموکرات بوو له‌ فنلاند و زۆر هه‌وڵی‌دا له‌ " نه‌ورۆز-تیڤی " کار بکات ، به‌ڵام به‌هۆی ئه‌وه‌ی ئه‌و به‌ڕێزه‌ زۆر له‌ حیزبی دیموکرات داخ له‌ دڵ بوو ئه‌و بواره‌ی پێ نه‌درا که‌ له‌ ڕاگه‌یاندن کار بکات ، چونکه‌ ئامانجی "نه‌ورۆز-تیڤی" نزیککردنه‌وه‌ی لایه‌نه‌کانه‌ نه‌ک ته‌وهینکردن به‌لایه‌نێکی دیکه ، ته‌نانه‌ت خودی کاک عه‌زیزیش یه‌کێک بوو له‌و که‌سانه‌ی که‌ ده‌یخواست له‌ ڕێگه‌ی "نه‌ورۆز-تیڤی"یه‌وه‌ له‌ پژاک نزیک بێته‌وه‌ ، به‌ڵام نه‌ک بۆ مه‌به‌ستی یه‌کێتی نه‌ته‌وه‌یی و سه‌نگه‌رگرتن له‌ داگیرکه‌ران به‌ڵکو بۆ دژایه‌تیکردنی یه‌کێک له‌ دیموکراته‌کان .

 

 کاک عه‌زیز ده‌خوازێت وه‌ها له‌ خوێنه‌ر بگه‌یه‌نێت که‌ ئه‌وانه‌ی ڕوو له‌ پژاک ده‌که‌ن له‌ حیزبه‌کان دابڕاون و هیچ جێگه‌و ڕێگه‌یه‌کیان نه‌ماوه‌ له‌ نێو کۆمه‌ڵگادا .
پاشان درێژه‌ به‌ گوته‌کانی ده‌دات و ده‌ڵێت :-‌


{ جێگای ئاماژه‌ بۆ کردنه‌ که‌ زۆربه‌ی ئه‌و لاوانه‌ی له‌ رۆژهه‌ڵاتی کوردستان و له‌ ده‌ره‌وه‌ بێ بوونی ئه‌زموونی خه‌بات و پێشمه‌رگایه‌تی روو له‌و پارته‌ ده‌که‌ن، مه‌به‌ستیان کوردایه‌تییه‌، به‌ڵام تاکه‌کان له‌ حیزبه‌ سه‌ره‌ڕۆکاندا ده‌بنه‌ ئامێرێک و وه‌ک ئامرازێک سوودیان لێوه‌رده‌گیرێ .} .


یه‌کێک له‌ گرفته‌کانی کاک عه‌زیز ئه‌وه‌یه‌ کاتێک شتێک ده‌ڵێت ، دوو دێڕ دواتر پێچه‌وانه‌که‌ی ده‌ڵێت . بۆ نموونه‌ له‌ بڕگه‌ی پێشوتردا ده‌ڵێت ئه‌و که‌سانه‌ی ڕوو له‌ پژاک ده‌که‌ن له‌ حیزبه‌کانی دیکه‌ دابڕاون و هیچ جێگه‌ و ڕێگه‌یه‌کیان نییه‌ ، له‌م بڕگه‌یه‌شدا ده‌ڵێت زۆربه‌ی ئه‌وانه‌ی ڕوو له‌ پژاک ده‌که‌ن هیچ ئه‌زموونێکی خه‌بات و پێشمه‌رگایه‌تیان نییه‌ و ته‌نها مه‌به‌ستیان کوردایه‌تییه‌ !! ئه‌م لێدوانه‌ دژ به‌ یه‌کانه‌ی کاک عه‌زیز جێ ده‌هێڵم بۆ خوێنه‌ران .


به‌ڵام باوه‌ڕ ناکه‌م کاک عه‌زیز به‌و ئه‌ندازه‌یه‌ش بێئاگا بێت له‌ ڕاستی ڕووداوه‌کان ، چونکه‌ جێگه‌ و پێگه‌ی پژاک دیاره‌ که‌ له‌ مه‌یدانه‌ ، هیچ عه‌قڵیه‌تێکیش ئه‌وه‌ په‌سه‌ند ناکات که‌ تاکه‌کان ببنه‌ ئامراز له‌ نێو لایه‌نێکدا که‌ له‌ مه‌یدان‌ بێت ، به‌ڵکو ئامرازسازی له‌ ئۆردوگاکان مه‌یسه‌ر ده‌بێت که‌ تاکه‌کان ده‌بنه‌ نیگابان و ڕه‌عیه‌ت بۆ به‌رپرس و ئاغاکان . ئایا لایه‌نێک که‌ 20 ساڵی ڕه‌به‌ق له‌ ئۆردوگادا بێت و کار و خه‌باته‌که‌ی بریتی بێت له‌ خۆ مه‌ڵاسدان و باندبازی ، ئیتر چ پێویستی به‌ تاکه‌کان هه‌یه‌ ئه‌گه‌ر بۆ ئامرازسازی نه‌بێت ؟


پاشان کاک عه‌زیز چه‌ند پرسیارێک ده‌کات و ده‌ڵێت :-


{ پارتی کرێکاران و پارته‌ داتاشکراوه‌که‌یان (په‌ژاک) چۆن ده‌توانن خزمه‌ت به‌ خه‌ڵکی رۆژهه‌ڵاتی کوردستان و دوارۆژی پرسی کورد بکه‌ن؟! پارتێک که‌ گۆڕه‌پانی سه‌ره‌کی خه‌باتی جێهێشتوه‌ و له‌ جیاتی ئه‌وه‌ی له‌ ئانکارا و ئه‌سته‌مبوڵ و له‌ قوڵایی خاکی باکووری کوردستاندا خه‌باتی خۆیان درێژه‌ پێبده‌ن، سوود و قازانجیان بۆ رۆژهه‌ڵات و باشووری چی بووه‌ و چ ده‌بێ؟} .


ئه‌گه‌ر کاک عه‌زیز ده‌خوازێت وه‌ڵامی ته‌واوه‌تی ئه‌م پرسیارانه‌ی وه‌ربگرێت ، با په‌ڕتووکی " دادگای مێژوو ، ل103 ل109 " به‌ وردی بخوێنێته‌وه‌ له‌م لینکه‌ی خواره‌وه‌دا :
http://www.kurdistanpost.biz/kitebxane/dadgay_meju.pdf


ئه‌م گوتانه‌ی کاک عه‌زیز له‌سه‌ر پژاک هاوشێوه‌ی گوته‌ی ئه‌و که‌سانه‌یه‌ که‌ له‌ ڕابردوودا په‌که‌که‌یان به‌ داتاشراو ده‌ناساند ، بۆ نموونه‌ که‌مال بورقای ده‌یگوت { پ‌ک‌ک داتاشراوی ده‌وڵه‌تی تورک و که‌مالیسته‌} ، فه‌تحوڵا گوله‌ن ده‌یگوت { پ‌ک‌ک داتاشراوی ئه‌مریکا و ئیسرائیله‌ } ،ئیسلامیه‌کانیش په‌که‌که‌یان به‌ پاشکۆی کۆمۆنیستی ده‌زانی ، کۆمۆنیسته‌کانیش ده‌یانگوت پ‌ک‌ک نه‌ته‌وه‌په‌رستی به‌رچاو ته‌نگه‌ ، تورکه‌ فاشسته‌کانیش ده‌یانگوت پ‌ک‌ک دژ به‌ برایه‌تی گه‌لانه‌ ، خۆرئاواییه‌کانیش ده‌یانگوت پ‌ک‌ک داتاشراوی ئیسلامیه‌ توندڕه‌وه‌کانه‌ و زۆر گوته‌ی هه‌مه‌ڕه‌نگی دیکه‌ش . واته‌ هه‌ر لایه‌نه‌ و کرده‌وه‌کانی خودی خۆی ده‌هاویشته‌ سه‌ر پ‌ک‌ک تاوه‌کو بتوانن خه‌ڵکی له‌ خشته‌ ببه‌ن ، چونکه‌ ئه‌و که‌سانه‌ی ئه‌و گوتانه‌یان ساز ده‌کرد ئێستا ناوه‌ڕۆکی خودی خۆیان بریتییه‌ له‌و گوتانه‌ ، ئه‌مه‌ش هه‌مان ئه‌و په‌نده‌ عه‌ره‌بیه‌یه‌ که‌ ده‌ڵێت " السحر ینقلب علی الساحر " .


کاک عه‌زیزیش ده‌قاوده‌ق کرده‌وه‌کانی خودی خۆی ده‌هاوێته‌ سه‌ر پ‌ک‌ک و پژاک ، چونکه‌ هه‌موو خزمه‌ته‌که‌ی کاک عه‌زیزه‌کان له‌ پاش 66 ساڵ بریتییه‌ له‌ ئۆردوگانشینی و توره‌که‌ی سواڵ هه‌ڵبه‌ستن بۆ سه‌رانی باشوور . له‌ ئه‌قڵێ کێدایه‌ ئه‌م جۆره‌ که‌سانه‌ بتوانن سود و قازانجیان بۆ ڕۆژهه‌لاتیه‌کان هه‌بێت که‌ به‌ درێژایی ته‌مه‌نیان گۆڕه‌پانه‌ سه‌ره‌کیه‌که‌یان جێهێشتووه‌ و له‌ جیاتی ئه‌وه‌ی له‌ کرماشان و سنه‌ درێژه‌ به‌ خه‌بات بده‌ن که‌چی له‌ کۆیه‌ و زڕگوێز که‌وتوونه‌ته‌ سه‌روگوێلاک شکاندنی یه‌کتری و شه‌ڕه‌ تێڵا ؟


کاک عه‌زیز درێژه‌ به‌ باسه‌که‌ی ده‌دات و ده‌ڵێت :-


{ هه‌تا ئه‌و کاته‌ی عه‌بدوڵڵا ئوجالان له‌ ژێر وێنه‌ی حافیز ئه‌سه‌دا له‌ سووریه‌ بوو، چه‌نده‌ و چۆن رۆژئاوایی کوردستان و نه‌ته‌وه‌ی کوردیان له‌و پارچه‌یه‌ی کوردستان به‌ قازانجی خۆیان ته‌نانه‌ت له‌ سه‌ر نه‌خشه‌ و له‌ دروشمه‌کانی خۆیاندا سڕیه‌وه‌.} .


له‌ جێگه‌یه‌کی دیکه‌شدا ده‌ڵێت :-


{ له‌ رۆژئاوای کوردستاندا به‌ هه‌زاران لاوی هه‌ژاریان له‌ خشته‌ برد و به‌ره‌وه‌ گۆڕه‌پانی به‌ ناو خه‌بات و به‌رخۆدانیان بردن، که‌ هێشتا روون نییه‌ ئه‌و خه‌بات و تێکۆشانه‌ له‌ پێناوی چی دایه‌! } .


به‌ تێگه‌یشتنی کاک عه‌زیز ، ڕۆژئاوای کوردستان و خه‌ڵکه‌که‌ی له‌سه‌ر نه‌خشه‌ سڕدراوه‌ته‌وه‌ له‌ پێناوی مانه‌وه‌ی به‌ڕێز ئۆجه‌لاندا له‌ژێر وێنه‌ی حافز ئه‌سه‌ددا !!!
له‌ ڕوانگه‌ی په‌که‌که‌شه‌وه‌ کوردستان وڵاتێکی داگیرکراوه و به‌شێک نییه‌ له‌ وڵاته‌کانی تورکیا و ئێران و عێراق و سوریا ، هه‌رچی ئه‌و کوردانه‌ی که‌ په‌رته‌وازه‌ی مه‌ترۆپۆڵه‌کانی ئه‌و وڵاتانه‌ بوون به‌شێکن له‌ خه‌ڵکی کوردستان . بۆ نموونه‌ کوردێکی زۆر له‌ تاران و به‌غدا و دێمه‌شق و ئه‌سته‌مبووڵ ده‌ژین که‌ له‌ ئه‌سڵدا له‌ کوردستانه‌وه‌ کۆچبه‌ر بوون ، ئایا تاوانه‌ ئه‌گه‌ر باس له‌ کوردستانیبوونی ئه‌و کوردانه‌ بکرێت ؟‌


به‌ڕێز عه‌بدوڵا ئۆجه‌لان له‌ کتێبی " الغفله‌ والخیانه‌ "دا زۆر به‌ باشی پێناسه‌ی ئه‌و که‌سانه‌ ده‌کات که‌ خۆیان له‌ ڕاستیه‌کان گێل ده‌که‌ن ، جێگه‌ی داخه‌ که‌ کاک عه‌زیزیش یه‌کێکه‌ له‌و که‌سانه‌ . له‌به‌رئه‌وه‌ی ئه‌گه‌ر کاک عه‌زیز ئاگاداری هیچ ڕه‌وشێکی ڕۆژئاوای کوردستان نه‌بێت ئه‌وا ئاگاداری ڕووداوه‌کانی ئه‌م دواییانه‌ و هه‌ڵوێستی په‌که‌که‌یه‌ له‌و ڕووداوانه‌دا .


هه‌ر له‌ سه‌ره‌تای ڕاپه‌ڕینه‌کانی سوریاوه‌ به‌ سه‌دان کادری په‌روه‌رده‌کراوی پ‌ک‌ک(کادره‌ ڕۆژئاواییه‌کان) نێردرانه‌وه‌ بۆ نێو جه‌ماوه‌ر و یه‌کێک له‌و کادرانه‌ش سه‌رۆکی پارتی یه‌کێتی دیموکراتی کوردستانه‌ . ئه‌م کادرانه‌ توانیان کۆنترۆڵی خۆپیشاندانه‌کانی کوردان بکه‌ن و زۆر به‌ ڕێک و پێکی خۆپیشاندانه‌کان به‌ڕێوه‌ به‌رن ، ئه‌نجامی ئه‌و ڕێک و پێکیانه‌ هه‌م کوردان له‌ کۆمه‌ڵکوژی پارێزران و هه‌م حکومه‌ته‌که‌ی به‌شار ئه‌سه‌دیش ناچار کرا که‌ مافی هاووڵاتی بوون بۆ هه‌موو ئه‌و کوردانه‌ بگێڕێته‌وه‌ که‌ له‌ ڕابردوودا حسابی بێگانه‌یان بۆ ده‌کرا .


کارێکی ئه‌رێنی دیکه‌ی ئه‌و کادرانه‌ ئه‌وه‌ بوو که‌ هه‌موو پارت و ڕێکخراوه‌ کوردیه‌کانی ئه‌و پارچه‌یه‌یان لێک نزیک کرده‌وه‌ و به‌ره‌یه‌کی یه‌کگرتوویان بۆ پێکهێنان ، ئه‌نجامی ئه‌و یه‌کگرتنه‌ش هه‌م کوردانی زیاتر سوور کرد له‌سه‌ر داواکاریه‌ ڕه‌واکانیان و هه‌م ڕێگریش بوون له‌ به‌ لاڕێدا بردنی سه‌رهه‌ڵدانه‌کان له‌لایه‌ن تورکه‌ فاشسته‌کان و ئیخوان الموسلمینی دژه‌ کورده‌وه‌ ، ته‌نانه‌ت یه‌کێک له‌ هۆکاره‌کانی هێرشی کۆماری ئیسلامی بۆ قه‌ندیل هه‌وڵدان بوو بۆ که‌مکردنه‌وه‌ی فشاره‌کانی پ‌ک‌ک له‌سه‌ر سوریا (تا ئێره‌ کورته‌ وه‌ڵامێکی بڕگه‌ی یه‌که‌می قسه‌کانی کاک عه‌زیزه‌) ، هه‌رچی بڕگه‌ی دووه‌مه‌ پێویست به‌ باسکردن ناکات چونکه‌ ته‌نها کاک عه‌زیز و هاوشێوه‌کانین که‌ تێکۆشانی گه‌ریلا به‌ به‌رخۆدان نازانن ، ده‌نا هه‌موو ئه‌و پێشکه‌وتنانه‌ی که‌ له‌ باکووری کوردستاندا ڕووده‌ده‌ن و ئه‌و خۆڕاگریانه‌ی که‌ له‌ به‌رامبه‌ر هێرشه‌کانی ئێران و تورکیادا ئه‌نجام ده‌درێن بریتییه‌ له‌ به‌رخۆدانی گه‌ریلا.

 

ماڵپه‌ڕی جه‌لال محه‌مه‌د

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک