هێرشی توركیا ونەبوونی كاردانەوەیەكی بەهێزی سیاسەتمەدارانی كورد.

خەبات لاوباخ      

لە دوای وونبونی سەرۆكی هەرێمی كوردستان و پاشەكشێی هێزی پێشمەرگە لەسەر سنور ی  توركیاو چۆڵكردنی بارەگاكانیان ،نیشاندانی بەزاندنی سنوری كوردستان لە لایەن سوپای داگیركاری تورك لە كەناڵەكانی توركیاوە   ، بێ دەنگی میدیای كوردستان لەو هێرشە و شاردنەوەیان لە كۆمەڵگا ، ڕێگەنەدان بە ڕۆژنامەنوسان و میدیاكان بۆ گواستنەوەی هەواڵەكان بۆ جیهانی دەرەوە ،ئابلوقەدانی بناری قەندیل لەلایەن دەسەڵاتدارانی كوردەوە ، پێدانی زانیاری ووردو درشت و هاوكاری ئاشكرای ئەمەریكیەكان بۆ سوپای تورك، دەست پێكردنی هێرشی ئاسمانی بۆ سەر باشوری كوردستان بە چڕی ، زیان پێكەوتنی خەڵكی سڤیلی بێتاوان،وێرانكردنی دێهات.. خەستەخانە ..قوتابخانە..ئاوارەبونی هەزاران هاوڵاتی كورد، بەڕەوا زانینی و پشتگیریكردنی ئەم ڕافتارانەی تورك لە لایەن وەزیری دەرەوەی ئێڕاق ( بەناو كورد)، پێشنیاركردنی هێرشی هاوبەش لە دژی جەنگاوەرانی كورد و وێرانكردنی كوردستان، بێ دەنگی سیاسەتمەدارانی كورد و ئێڕاق ، جگە لە دەربڕینی چەند ناڕەزاییەكی سەرپێی لە میدیاكاندا، نیشانەی كارەسات و نەهامەتی كوردە و چاوەڕێی پاشەڕۆژێكی ڕەشە .

كە ئەمانە دژی هەموو یاسا و ڕێكەوتنە جیهانی و نێودەوڵەتیەكانە ، بەتایبەتی ڕێكەوتنی ئەمەریكا لەگەڵ هاووڵاتیان و  دەسەڵاتدارانی ئێراق بۆ پارێزگاری خاك و سنور و سەروەری ووڵاتەكەیان لە هەر دەستدرێژییەكی دەرەكی و ناوەكی ، واتە  ئەم ڕەفتارەی ئەمەریكا تەواو    پێچەوانەی هەموو ڕێكەوتنەكانە ، بەشدارە لە پێشلكاری سەروەری خاكی كوردستان و ئێراق و تەنها بیر كردنەوەیە لە بەرژەوەندی خودی خۆیان  .

شانبەشانی هێرشە دڕندە بێزەوەرەكەی توركیاش ، سەردانی وەزیری دەرەوەی ئەمەریكا بۆ كەركوك بۆ دڵنیا كردنەوەی سونەی ئێراق و ووڵاتانی دراوسێ بەتایبەتی توركیا ، لە دواخستن و جێ بەجێ نەكردنی مادەی 140 ی دەستور ، دەست تێوەردانێكی ئاشكرای دەستوری نوێی ئێڕاق لە لایەن ئەمەریكا و توركیاوە.

سەرەڕای ئەم هەموو پێشێلكاری و پشتگوێ خستنەی داواكارییەكانی كورد و دروستكردنی گیروگرفت  بۆ پەكخستنی دەستوری ئێڕاق بەرامبەر  بە كورد ، كەچی هێشتا سیاسەتمەدارانی   كورد دڵسافی و دڵسۆزی خۆیان بۆ ئەمەریكا ، ئێڕاق ، توركیا و ئێران  نیشان ئەدەن و سورن لەسەر یەكگرتوویی و بەهێزكردنی  ئێڕاقی عەرەبی و برابچوكی ووڵاتانی دراوسێ ، بێ گوێدانە هەستی نەتەوایەتی و بەرژەوەندی كوردستان .

نابێت سەرمان بسوڕمێ وبەلامانەوە سەیر بێت ، بۆ تائێستا نەتەوەیەكی 40 ملێونی وەك  ئێمە نەبۆتە  خاوەنی دەوڵەتێكی سەربەخۆی كوردستان ، هەر بەژێردەستی ماوینەتەوە .

بێگومان بەدوبارە كردنەوەی هەڵەكانی سەدان ساڵی مێژووی خۆخۆری و بێگانەپەرستی ، شەیدا سامان و دەسەڵات ، دڵسافی وساویلكەیی  ، بونە داردەستی داگیركاران ، نەبونی هەستی نەتەوایەتی ، خۆفڕۆشی و ناپاكی لە دژی میللەت ، شەڕی براكوژی لەسەر دەسەڵات و سامان ،گەندەڵییەكی لە ڕادە بەدەر ، بیری تەسكی خێڵەكی و پارتایەتی  و نەبەخشینی یەكتری و بەخشندەیی بەرامبەر دوژمن  ، نەبونی سەركردەیەكی خاوەن ئەزموون و هەستی نەتەوایەتی  ، خۆ نەپەرست  و دڵسۆزی میللەت و دوور لە حەزی دەسەڵات و سامانی كاتی  وەك گاندی هیندستان و ماندێلای ئەفەریقای باشوور و قازی مەحەمەدێكی تر ،كە كەمترین دەرفەتی بەكارهێنا بۆ دروستكردنی كۆمارێكی كوردستان  ، بەهرز و بیر و خەوی چەند گەنجێكی كوردی نەزانی و هەوڵی چاكسازی و خزمەتكردنی كۆمەڵگای دا، دواتریش  بۆ پاراستنی نەتەوەكەی ئامادەی لەسێدارەدان بوو، نە هەڵهات بۆ سۆڤییەت ، ئەمەریكا ، ئەوروپا ، سوریا ، ئێران یان توركیا ، بەڵكو گیانی خۆی بەخشی و بەسەربەرزی  بووە قوربانی هەڵوێست و هەستی نەتەوایەتی ، مێژوو بەشانازییەوە باسی لێ ئەكات......هتد

بەداخەوە تا ئێستا كاردانەوەیەكی بەهێزمان لە سەركردایەتی كورد لە كوردستان و ئێڕاقدا نەبینی و كوێرانە بەردەوامین لەسەر یارمەتیدانی ئەمەریكا و دەسەڵاتدارانی ئێڕاق ، بە بێ هیچ ئامانجێكی سیاسی و بەرژەوەندی كوردستان ، ڕۆژانەش پێشێلكاری ئەبینین،وەك كوشتن ودەربەدەركردنی كوردان لە موسڵ و بەغا و شارەكانی تر ، دواخستنی مادەی 140 و یاسای نەوت  و دژایەتی كردنی  گرێبەستیە نەوتیەكانی كوردستان و داوای كەمكردنەوەی پێشمەرگە ،كەچی هەر بێ دەنگین و خۆمان بەشەڕی پلە و پایە و دەسەڵاتەوە خەریك كردوە لە كەركوك.

ئەی بۆ لەدژی ڕەفتاری ئەمەریكا و عەرەبەكان !!! كاربەدەستانی كورد  لە حوكمەتی بەغا بۆ ماوەیەك دەست لەكار ناكێشنەوە؟ بۆ دەستبەرداری كابینەكەی مالكی نابنەوە ؟ بگەڕێنەوە كوردستان و كاری ئەمەریكا گرانتر بكەن ، تا پەیمانێكی ستڕاتیژی لەگەڵ كوردا نەكەن و ڕێگا لە توركیا و ووڵاتانی تر نەگرن ،كە دەست لەكاروباری كوردستانەوە نەدەن، نەگەڕێنەوە  بەغا ، دواتر بەمەرج بگەڕێنەوە ،یان ڕێگا لە ناردنی نەوت بگرن بۆ توركیا و كۆمپانیاكانیان بنێرنەوە . تەنها كاردانەوەیەك كە كرابێت لە لایەن سەرۆكی هەرێمی كوردستانەوە ( كە كارێكی زۆر باش بوو ، دەستخۆشی لێ ئەكەم) بەشداری نەكردنی بوو لە كۆبوونەوەكەی وەزیری دەرەوەی ئەمەریكا ڕایس لە بەغا ، بەڵام ئەوە بەس نیە بۆ سیاسەتێكی دووڕوانە و هەلپەرستانەی ئەمەریكا ، بەڵكو ڕاگرتنی هەموو جۆرە پشتگیرییەك لە لایەن حوكمەتی هەرێمەوە و   گەڕانەوەی وەزیرە كوردەكان بۆ كوردستان .هەوڵدان بۆ كڕینی چەكی گران بۆ پارێزگاری لە دەستدرێژییەكانی دوژمن ، پەیدا كردنی دۆست و لایەنگیران و كەسایەتی  نوی بۆ بزاڤە ڕەواكەمان ،پابەند نەبوون بە ئەمەریكاوە ،خۆ ئامادەكردن بۆ ڕزگاركردن و گەڕانەوەی ناوچە داگیركراوەكانی كوردستان .

پێویستیەكی مێژووییە ،كە بیر لە ڕێگا و ستڕاتیژییەكی نوێ بكرێتەوە ، هەر بەو شێوە كلاسییكیەی جاران لە خشتە نەبرێین بە بوونی سەرۆك كۆمارێكی كورد و چەند وەزیرێكی كورد لە بەغا  دڵخۆش بین ، كە هیچ بڕیارێكیان لە دەستدا نیە ، تەنها پاكانە كردن نەبێت بۆ سوڵتان هاشم و هاوڕێكانی  .

 بە پێی بڕگە ی  دەستوری هەمیشەیی ئێڕاقیش ، مافی ڕەوای گەلی كوردە بۆ جیابوونەوەی لە ئێڕاق ، ئەگەر هاتوو مادەكانی دەستور جێ بەجێ نەكران  ، كە بەویستی خۆی و ئارەزوومەندانە  لە گەڵ ئێڕ‌اق ماوەتەوە ، بەڵام نەك هەر بەبرا بچوكی و نەبونی دەسەڵات بۆ هێنانە دی  ئامانجەكانیان.

پێویستە لە سەر سەركردایەتی كورد و هەموو بەرپرسێكی حوكمەتی هەرێم ، ئەم گرفتانە بە هەند وەربگرن و كاردانەوەیەكی بەهێز و بڕیاردەریان هەبێت و چیتر مل كەچی هیچ داواكارییەكی ناڕەوای دژ بە بزاڤی كورد نەبن لە هیچ پارچەیەكی كوردستان دا ،با تۆزێك بیر لە بەرژەوەندییەكانی نەتەوەی كورد بكرێتەوە ، یەكگرتن، برایەتی و تەبایی بێتە ئامانجیان.