٢٥\١٠\٢٠١٠

حکومەتی هەرێم مۆڵەت بە فیدراسیۆنی پەنابەرانی عێراق نادا.

شوان سدیق   

سکرتێری فیدراسیۆنی پەنابەران:

ئامانجی حکومەتی هەرێم لەوەدایە هەر کەسێک راستی و حەقیقەتی ئەوان ئاشکرا بکا، کە پەیوەندی بە خواست و مافەکانی خەڵکیەوە هەبێت، ئەوان ئەو رێکخراوانە بە ئعتیبار وەرناگرن.
 

سەرۆکی دیوان لە وەزارەتی ناوخۆى هه‌رێم:

ئێمە لە وەزارەت نەک داواکاریمان لێوەرنەگرتوون، رەنگە لێیشیان وەرنەگرین، لەبەر ئەوەی بە یاسای کۆمەڵە و رێکخراوەکان کار دەکەین

سکرتێری فیدراسیۆنی سەرانسەری پەنابەرانی عێراق رایگەیاند کە ماوەی ساڵ و نیوێکە داوای مۆڵەتیان لە وەزارەتی ناوخۆ کردووە، بەڵام داواکەیان رەتکراوەتەوە.

دەشتی جەمال سکرتێری رێکخراوی فیدراسیۆنی سەرانسەری پەنابەرانی عێراقی، بە (سڤیل)ی راگەیاند "ماوەی ساڵ و نیوێکە بەپێی هەموو پێوەرەکان، لە سلێمانی داوای مۆڵەتی کارکردنمان لە وەزارەتی ناوخۆ کردووە، ئەوانیش نوسراوەکەیان رەوانەی هەولێر کرد، بەڵام تا ئیستاکە تەنیا وەڵامیان بۆ ئێمە ئەوە بووە، وەزیری ناوخۆ بڕیارێکی دەرکردووە، کە دەبێت مۆڵەتی رێکخراوەکان تاکۆتایی ساڵی 2010 رابگیرێت".

لەو بارەوە فازڵ عومەر راوێژکاری سەرۆکی حکومەتی هەرێمی کوردستان بۆ کاروباری گەنجان و رێکخراوەکانی کۆمەڵگەی مەدەنی، بەدووری زانی هیچ بڕیارێکی وا هەبێت، کە سکرتێری رێکخراوی فیدراسیۆنی پەنابەران باسی دەکات و گوتی "لە ئێستادا مۆڵەتدان بە کردنەوەی رێکخراو یان سەنتەر و ناوەند و کۆمەڵگە مەدەنییەکان، هیچ رێگرییەک نییە، بەڵام دەبێت سەرەتا لە لێکۆڵینەوە و بەدواداچوونەکانی وەزارەتی ناوخۆ تێپەڕببێت، چونکە ئەرکی وەزارەتی ناوخۆ ئەوەیە کە تایبەتمەندی ئامانجەکانی ئەو رێکخراو و سەنتەرانە بزانرێت. بێگومان ئەوەش، هۆکاری تایبەتی خۆی هەیە. ئەگینا لە ئێستادا مۆڵەتدان بە رێکخراو و سەنتەرەکان رانەگیراوە".

هەرچەندە، 2 پڕۆژە یاسای تایبەت بەرێکخراوەکان ئامادەکراون و بڕیار وایە لە داهاتوویەکی نزیکدا، پڕۆژە یاسایەکی تایبەت بە رێکخراوەکان پەسەند بکرێت، بەڵام تائێستا حکومەتی هەرێم کار بە یاسای کۆنی ژمارە (15)ی بواری رێکخراوەکانی کۆمەڵگەی مەدەنی دەکات، بەگوتەی راوێژکاری سەرۆکی حکومەت، تائێستاش 1134 کۆمەڵە و رێکخراوی کۆمەڵگەی مەدەنی لە کوردستاندا هەن و نزیکەی 389 کۆمەڵە و رێکخراو و سەنتەری رۆشنبیریش لەمانە مۆڵەتی رەسمیان لەلایەن حکومەتەوە پێدراوە.

رێکخراوی فیدراسیۆنی سەرانسەری پەنابەرانی عێراقی لە ساڵی 1993 دامەزراوە و بە گوتەی سکرتێرەکەی لە سەرتاسەری هەموو وڵاتاندا، زیاتر لە 10 هەزار ئەندامیان هەیە و هەموو ئەندامێکی رێکخراوەکەیشیان بەخۆبەخشی کار دەکەن "هەوڵی رێکخراوەکەمان لەپێناو بەرگریکردن، لە خواست و دەستەبەرکردنی ئازادیەکانی پەنابەرانە، لەو وڵاتانەی کەسی پەنابەری عێراقی لێ نیشتەجێیە و ئەندامانی رێکخراوەکەیشمان هەموویان سەربەخۆیانە کار دەکەن".

سەبارەت بەو هۆکارانەی کە لەلایەن وەزارەتی ناوخۆوە مۆڵەتیان پێنەداون، دەشتی جەمال گوتی "نازانین هۆکاری مۆڵەتنەدانی رێکخراوەکەمان لەلایەن وەزارەتی ناوخۆ بۆچی دەگەڕێتەوە، لەکاتێکدا حکومەتی وڵاتانی ئەوروپا مۆڵەتی کارکردنیان پێداوین، کە چالاکیمان هەبێت، بەڵام حکومەتی هەرێم ئەو مۆڵەتەی پێ رەوا نەبینیوین".

ئەو سکرتێرەی رێکخراوی فیدراسیۆنی سەرانسەی پەنابەرانی عێراقی، زیاتر گوتیشی "پێموایە ئامانجی حکومەتی هەرێم لێرەدا لەوەدایە کە هەر کەسێک راستی و حەقیقەتی ئەوان ئاشکرا بکا، کە پەیوەندی بە خواست و مافەکانی خەڵکیەوە هەبێت، ئەوان ئەو رێکخراوانە بە موعتەبەر وەرناگرن، چونکە رێکخراوی فیدراسیۆنی سەرتاسەریش یەکێکە لەو ناوەندانەی کە پشتگیری لە ئازادی نیشتەجێبوون و گەشتی ژیان دەکا، بەڵام بەرپرس و دەسەڵاتدارانی هەرێم پێیان خۆش نییە خەڵک لەکوێ ئارەزووی گەشت و ژیان بکات، با لەوێ ئارەزوومەند بێت".

لەلای خۆیەوە حاکم تاریق سەرۆکی دیوان لە وەزارەتی ناوخۆی حکومەتی هەرێم، بە(سڤیل)ی راگەیاند "ئەو فیدراسیۆنە ناچنە ناو خانەی رێکخراو و کۆمەڵەکان، کە یاسای ژمارە 15 بیانگرێتەوە، ئێمە لە وەزارەت نەک داواکاریمان لێوەرنەگرتوون، رەنگە لێیشیان وەرنەگرین، لەبەر ئەوەی ئێمە بە یاسای کۆمەڵە و رێکخراوەکان کار دەکەین، ئەمانەش لە چوارچێوەی یاسای ژمارە 15 دایە، بۆیە هیچ کات ئەو فیدراسیۆنە ناچێتە خانەی رێکخراوە و کۆمەڵەکان، چونکە فیدراسیۆن خۆی لەچەند رێکخراوێک پێکدێت".

لە بەرامەر قسەکانی سەرۆکی دیوانی وەزارەتی ناوخۆ، سکرتێری فیدراسیۆنی پەنابەرانی عێراق، گوتی "ئێمەش وەکو رێکخراو داوای مۆڵەتمان کردووە، چونکە چەندین بنکەی ترمان لە وڵاتانی ئەوروپی هەن، بەڵام وەزارەتی ناوخۆ مۆڵەتیان پێ نەداوین".

ماڵپه‌ڕی شوان سدیق