|
هۆکارەکانى
چرچبوونى پێست و چۆنیەتى چارەسەرکردنى..
و: کەژاڵ عەلا
چرچبوون بریتیە: لە دروست بوونى خەتى نێوان برۆکان و سەر ناوچەوان و
دەور وبەرى دەم و چاو و گۆناکان . ئەم نیشانانەش لەو کەسانەى کە جگەرە
خۆرن زووتر بەدى دەکرێت کەپێى دەوترآ چرچبوونى پێشوەخت، چونکە جگەرە
خواردن ئەبێتە هۆى کەم بوونەوەى ڕێژەى چەورى لە ژێر پێستدا و
کەمبوونەوەى ئارەزووى خواردن و سەرئەنجام ئەبێتە هۆى خراپى بارى
تەندرووستى و وشکبوونەوە و چرچبوونى پێست بەهۆى لەدەست دانى دروست
بوونى پڕۆتینى "کۆلاجین". جگە لەمانەش پێستى وشک زووتر لە پێستى چەور
ڕووبەڕووى ئەم کێشەیە ئەبێتەوە.
وەک ئاشکرایە پڕۆتینى کۆلاجین گرنگترین پڕۆتینە بۆکارى ڕێکخستن و
پاراستنى پێست لە ئەندامەکانى لەش و ئێسک و کڕکڕاگەدا. ئەگەر بێتوو
گەشەى کۆلاجین لەلەشدا ڕووبەڕووى نەخۆشى ببێتەوە ئەوا پێست دووچارى تێک
چوون و چرچ بوونەوە دەبێت.
هەروەها ئاو و هەوا، نەخۆشى بۆماوەیى، تیشکى خۆر ، سەرکەوتنى تەمەن
هۆکارێکە بۆ کەم بوونەوەى پڕۆتینى کۆلاجین لە لەشدا. هەربۆیە کەسانى
بەساڵاچوو پێستیان شل دەبێتەوە و شێوە لاستیکیەکەى لەدەست دەدات. قەڵەو
کاتێک لاواز ئەبێت بەهۆى لە دەست دانى چەورى ژێر پێست دووچارى
شلبوونەوەى پێست دەبێت. جگە لە دوورستبوونى کۆلاجین کەسانى تووڕە و
مڕومۆچ بەهۆى کرژبوونى ماسولکەکانیانەوە زووتر تووشى چرچبوونى پێست
دەبن.
چەند خاڵێکى گرنگ بۆ چارەسەرکردنى چرچبوونى پێستى دەم و چاو:
1_ بەکارهێنانى کرێمى ڕێک خستنى پێست تا ڕادەیەک ئەتوانێت بۆ ماوەیەک
چرچى نەهێڵێت لەسەر دەم و چاو.
2_ خۆ پاراستن لە تیشکى خۆر.
3_خۆپاراستن لە جگەرە کێشان: چونکە جگەرە کێشان ئەبێتە هۆى خەتى قوڵ
لەم لاو لاى لێوەکان و دەور و بەرى چاوەکان.
4_ خۆپاراستن لە گرژکردنى ماسولکەکانى پێست لەکاتى ئاخاوتندا چونکە
کەسانێکى زۆر هەن لەکاتى گفتو گۆکردندا زیاتر بەهۆى سۆزداریەوە خەت
دروست دەبێت لە سیمایاندا، ئەوجۆرە کەسانە لەوانەیە وابزانن کەئەم
خەتانە گرنگ نین و کاتین بەڵام زۆر بەى کات ئەبنە هۆى دروست بوونى خەتى
هەمیشەیی و ئەمێنێتەوە.
5_ لەزۆربەى لێکۆڵینەوەکاندا دەرکەوتوە بەکارهێنانى ڤیتامینات ئەتوانێت
تا ڕادەیەک پێست بپارێزێت لە چرچ بوون لەنموونەى: ڤیتامینەکانى C و A و
E بەڵام لەهەمان کاتیشدا زۆر بەکارهێنانیان زیانى لێدەکەوێتەوە.
6_لەبەر ئەوەى هۆڕمۆنى (ئیسترۆجین) هۆڕمۆنى سەرەکى ژنانەیە و
ڕۆڵى سەرەکى ئەبینێت لە پاراستنى جوانى پێست و لاوێتیدا، ئە و ژنانەى
سووڕى مانگانەیان ڕاوەستاوە واتا( لێچوونەتەوە) لەم ژنانەدا ئاستى ئەم
هۆڕمۆنە کەم دەبێتەوە و دەبێتە هۆى چِرچ بوونى پێست. بەڵام بەهۆى
پزیشکى تایبەتیەوە ئەتوانن چارەسەر بکرێت و تا ڕادەیەک ئەم کێشانە کەم
بکرێنەوە.
7_ خۆ ڕاهێنان لەگەڵ ژیانێکى سادە و تەندروست، خۆبەدوورگرتن لە
دڵەڕاوکێ و سۆزدارى، بۆ پاراستنى پێست گرنگە.
8_ ماساژ کرنى پێست کاریگەرى باشى هەیە بەڕێگەى بەکارهێنانى کرێمى
تایبەتیەوە لەلایەن پزیشکەوە.
9_ ئەنجام دانى لەیزەر بۆ چارەسەرکردنى چرچبوونى پێست کاریگەرە.
10_ تازەترین ڕێگە بۆ چارەسەرکردنى چرچبوونى پێست کە لەم دوایەدا
دۆزراوەتەوە دەرزیلێدانە بەبەکارهێنانى مادەیەکى تایبەتى بۆ ژێرپێست
لەلایەن کەسانى پسپۆر لەم بوارەدا. بەڵام ئەم ڕێگەیەش کاتیە و
لەڕاستیدا چرچ بوونەکە بۆ هەمیشە لەناو نابات، بەڵکو بۆ ماوەیەکە و
ئەوەش پەیوەندى هەیە بە جۆرى پێستەکەوە، لە هەندێک کەسدا لە 3 تا 9
مانگ دەخاێنێت. دواتر ئەوکەسە دەتوانێت ئەم دەرزیە دووبارە بکاتەوە.
سەرچاوە: (سایتى زنان امروز)
|
