ژەهرخواردمان دەکەن!

 بەشدار عه‌لی   

لە شەوى 2 لەسەر 3ى 2/2008،لە ناحیەى قوشتەپەى نزیک پارێزگارى هەولێر لە کەمپى کاوە خێزانێکى هەشت کەسى بەهۆى خراپى جۆرى سۆباو نەوتەکەیانەوە ژەهراوى بوون و هەر ئەو شەوە حەوت کەسیان گیانیان لە دەست دا و هەشتەمیشیان لەسەرەمەرگدایە،هەر دوایى چەند رۆژێکى تر لە شەوى 5 لەسەر 6 ،خێزانێکى ترى سێ کەسى لە ناحیەى بنەسڵاوە بەهۆى خراپى جۆرى سۆبا و نەوتەکەیانەوە بەداخەوە هەموو ئەندامانى خێزانەکەیان ژەهراوى بوون و گیانیان لەدەىستدا.

لەهەموو شوێنێکى ئەو دوونیایە مردن و ماڵئاواى کردن هەیە،بەڵام لە هیچ شوێنێکى ترى وەکو ئەو کوردستانە مەرگى ئینسانەکان ئەوەندە ئاسان نەکراوە،رۆژنیە سەدان کەس بەهۆى خراپى رێگاوبان و شۆستە و نەبوونى یاسایەکى هاتووچۆ لە شار و شارۆچکەکانى کوردستان گیان لەدەست نەدەن، ،رۆژ نیە سەدان کەس بەهۆى نەبوونى دەرمان و پێداویستى تەندورستى و دکتۆرى شارەزا لە شار و گوندەکانى کوردستان کۆتاى بە ژیانیان نەیەت،رۆژ نیە سەدان خێزان بەهۆى نەبوونى پێداویستیەکانى ژیان و خزمەتگوزارییە سەرەتاییەکان و ئامێرەکانى خۆپارێزى و بەرگرى ،رێگاى مەرگیان لێ نزیک نەبێتەوە و کۆتاییان پێ نەیەت... .

هەرکارەسات و رووداوێک ئەگەر بەدەر لە ئیرادەى مرۆڤ و کاربەدەستان بێت و هەوڵەکانیان لەم پێناوەدا دیار بێت، رەنگ بێت هەرچەندە رووداوو و کارەساتێکى گەورە و جەرگ بریش بێت،ئەوەندە نیگەرانمان نەکات و ویژدانمان ئازار نەدات،بەڵام کارەساتەکە لەوەدایە دەسەڵاتداران و کاربەدەستان خۆیان رێگاى کورتکردنەوەى ژیان بە خەڵک نیشان دەدەن و خۆیان هۆکارێکى سەرەکى ماڵوێرانیەکانن، ئەو خێزانانە دوایى چەندین ململانى بەحاڵ کەلاوەیەکیان دەست کەوت و تیایدا نیشتەجێ بوون،لە ساکارترین پێداویستیەکانى ئەو زستانە بێ بەش بوون سەرماى و سەختى زستان تەنگى پێ هەڵچنیون وبەتانیەکى باش و سەرینێکى گەرم و دۆشەکێکى باشیان لە ماڵەکەیان شک نەبرد و ناچار لە سەرمانا سۆباکانیان(کە یەکێک بوو لە خراپترین جۆرى سۆبا لە هەموو دونیا کە نرخەکەى تەنها 5دۆلارە،)نەکوژاندەوە و ئەو چەند لترە نەوتەشى کە دەستیان کەوتبوو لە جۆرە خراپەکەیەتى کە بەرپرسانى کوردستان ئیستا بازرگانى پێوە دەکەن نەسوتابوو ، لە شیرینى خودا کە هەر دوو دوو،سێ سیانیان لەژێر پەرۆیەکدا خەو بردبوویانەوە،گیانیان لەدەستدا و بۆ هەتایە چاویان هەڵنەهێنایەوە. ئەگەر بەرپرسانى کوردستان ئۆزقاڵێک ویژدانیان هەبوایە دەبوایە دواى روودانى ئەو کارەساتانە روویان نەهاتبایەوە بێنەوە ناو خەڵک.

ئەگەر ئەو خێزانانە و سەدان خێزانى تر کە رووداو و کارەساتى تر چاوەروانیان دەکات شەوانە 5 سەعات کارەبایان هەبوایە ناچار نەدەبوون ئەو جۆرە سۆبا و نەوتە خراپانە بەکاربهێنن،ئەگەر ئەو خێزانانە جل و بەرگ و رایەخ و کەل وپەلێکى باشیان لە ماڵەکەیاندا هەبوایە بۆ خۆگەرمکردنەوە و خەوتن، ناچار نەدەبوون بەدیار سۆبایەکى لە ژەهر و غاز خەوبیانباتەوە و کۆتایى بە ژیانیان بێت،... .

ئاخر بە چ معیار و مقیاسێک ئەو جۆرە ژیان کردنە رەوایە؟ دەسەڵاتدارانى کوردستان بە سامانى ئەو خەڵکە نوقم بوونە لە سەرمایە و ئەوەى بە خەیاڵى مرۆڤەکاندا نایەت لە خۆشگوزەرانى لە نێو کۆشکەکانى ئەواندا بوونى هەیە،هەزاران کەسیش لە نێو کەلاوەکانیانیاندا هەر سااتێک نا ساتێک چاوەروانى مردن و گەورەترین کارەساتن!

رێگاى هەناسەدان ،رێگاى رزگاربوون لە موسیبەت و ماڵوێرانیەکان،رێگاى کۆتاى هێنان بەم جۆرە کارەساتە جەرگ بڕانە،رێگاى دەست راگەیشتن بە پێداویستیەکانى ژیان، تەنها و تەنها لە گرەوى نەمان و ئاوابوونى دەسەڵاتى ئەو بەرپرسە دز و گەندەڵانەیە کە رۆژاەنە بە هەزار و یەک شێوە لە هەوڵى کوشتن و کۆتایى هێنان و ژەهراوى کردن و خنکان و لەبرسان مردنمانن بۆ ئەوەى خۆیان خۆشتر بژین و سەرمایەکانیان زۆرتر بکەن،رێگاى تر و شێوازى ترى زۆر گیرایە بەر ،بەڵام هیچیان ئەنجامێکى نەبوو بۆیە ئەوە رێگاى رزگاربوونە، هەموو خەڵکى کوردستانیش ئەو راستیە باش دەزانن و ئەو رۆژانەش نزیکن.

Bashdar_net@yahoo.com