٢٧\٥\٢٠١٤

ژنکوشتن نەریتی ئێمەی هاوڵاتیان نییە.

حەمە غەفور      

پیاوسالاریی و ئابڕووپەرستیی، ئەو نەریتە چەپەڵەی تاوانکاریی ‌و دڕندەیی خۆی لە خوێنڕشتنی ژناندا بەرجەستە ئەکات، نەریت ‌و کەلتووری ئێمەی هاوڵاتییان نییە! نەریتی ئەو حیزب ‌و هێز و دەستە و دەسەڵاتدارانەیە، حکومەت ‌و یاسا و دەزگا و دامەزراوی جۆراوجۆریان دروست کردووە بەناوی بەڕێوەبردنی کۆمەڵگا و ڕێکخستنی سێکتەرەکانی ژیانەوە، کەچی تەنیا خزمەتی دەسەڵات ‌و باڵادەستیی خۆیانیان پێئەکەن ‌و بەرانبەر بە ژیان‌و ئاسایش ‌و مان ‌و نەمانی هاوڵاتیان ئەوپەڕی بێدەربەستیی پیادەئەکەن!

هەزاران تاوانباری بکوژی ژنانی کوردستان لە نێو ڕیزی ئەم حیزبانە و ئەم دەسەلاتەدا بە سمێڵی قەوی‌ و قشقەڕەییانەوە ئازادانە ئەسوڕێنەوە و مێش میوانیان نییە!
کەواتە خەڵکینە، ڕێگا مەدەن ئەم تاوانکارییە بێ کۆتاییە لەدژی ژنان بە ناوی ئێوەوە تەواو ببێت. ڕێگا مەدەن تاوانباران بە ناوی ئەوەی گوایا ئەمە "نەریت ‌و کەلتووری ئێوەیە" بەردەوام کوردستان بکەنە ئەنفالستانی ژنان ‌و ڕۆژانە ئێمە شاهیدی تاوانی قێزەونی چەشنی کوشتنی ئەم کیژە منداڵانە و دایکانمان ببین!

ئەم کەلتوورە نەگریسەو ئەم نەریتە دژەژن ‌و دژەمرۆییە تووڕهەڵدەن ‌و شەقێک لە دەمی هەموو ئەوانەش هەڵدەن کە جورئەت ئەکەن ‌و ئەڵێن لە پشتی چاوی ژنێک یان کیژێک دوو برۆ هەیە! بە دژی ئەم تاوانکارییە و ئەم کوشتارگەیەی بۆ ژنان دانراوە بە بیانووی پاراستنی شەرەفەوە، یاخود وەکو نەریتی پیاوسالارانە، ڕاوەستن ‌و کوردستان لە ژێر دەستی ئەم ژنکوژانە و ئەم نامووسپەرستە سمێڵ قەویانە دەرکێشن. با هەموومان هەناسەیەکی پاک ‌و ئازادانە هەڵکێشین ‌و چیتر حەسرەتی خوێنڕشتنی دایکانمان بە دەستی پیاوان نەکێشین.

ماڵپه‌ڕی حه‌مه‌غه‌فور

_________________________________

هەموو بابەتەکان دەربارەی ''دنیا'' لێرە ببینە:

www.emrro.com/dosiyeydunya.htm