|
١٨\٦\٢٠٢١
ژینۆسایدی هونەری
پەیکەرسازیی لە لایەن ئیسلامگەرایەکانەوە!
ئاڤان کەریم
شارستانیەتی هەر وڵاتێک پەیوەستە بە هونەر و داهێنانی ئەو میللەتانەی
کە لە نێویدا دەژین، هونەری پەیکەسازییش بەشێکی گەورەی داهێنان و
نوێگەرییە کە هەم لە رووی هونەرییەوە چێژ و جوانییگەلێک دەبەخشێ هەم
دەتوانێ لە نێو پانتایی داهێناندا لە سەرجەم کایە وێژەیی و
هونەرییەکاندا بەشداریی لە بەرهەمهێنانەوەی هەست و سۆزە جوانەکان و بیر
و رامانە تازەکان بکا.. سەرەڕای ئەوەش جێپەنجەی خۆی لە تۆمارکردن و
پاراستنی دەستکەوتە فەرهەنگییەکانی کەونارای هەر شارستانیەتێکدا
دەنەخشێنێ تەنانەت هزر و فەلسەفەش لە رێڕەوی کار و نەخشەی خەمڵینی
خۆیان لێیەوە سوودمەند دەبن.
ئێستا بایەخ و گرنگییەکانی ئەو هونەرە بە جۆرێک هەژموونی پەیداکردوە کە
ئەگەر هەر وڵاتێک بتوانێ لایەنی کەمی ماف و ئازادییەکان جێبەجێ بکا و
خەڵکەکەی گەیشتبنە ئاستێک لە کراوەیی ئەوە زۆر راشکاوانە پارێزگاریی لە
پەیکەر و سەرجەم کارە فەرهەنگییەکانی ئێستا و هەموو قۆناغە
مێژووییەکانی گەلانی نێو سنوورەکەی خۆی دەکا و هاوکاتیش لە رێی یاسا و
رێساگەلێکەوە سزای زۆر توند لە بەرانبەر ئەو کەس و لایەنانە جێبەجێدەکا
کە بازرگانییان پێوە دەکەن یان دەیانشێوێنن.. تەنانەت دەسەڵاتێکی وەک
هەرێمی کوردستانیش هەر لە ژێر ئەو هەژموونەدا ناچار بووە (یاسای
بەڕێوەبردن و پاراستنی شوێنەوار و کەلەپوور) دەربکا!
ئەوەی مەبەستمە بە دیارکراویی تیشکی بخەمەسەر ئەوەیە لەو دواییانەدا
چەندین ئاخوندی کۆنەپەرست و تاریکبین لە نێو میللەتەکەماندا پەیدابوونە
کە فەرهەنگی دواکەوتووانەی سەدەکانی نێوەڕاستیش لە ئاستیاندا شەرمەزارە..
ناوەناوەش هەر لەخۆیانەوە هەندێک فەتوای زۆر نابەجێ و دژ بە فەرهەنگ و
پێشکەوتنە کۆمەڵایەتییەکان و مافەکانی ژنان و سەرجەم ماف و
ئازادییەکانی دیکە دەردەکەن و خەڵکانێکی نەزان و کاڵفامی پێ لەخشتە
دەبەن و وەک کۆیلەگەلێک وەکاریاندەبەن.. تەنانەت زۆر بە ئاشکرایی و بێ
هیچ سڵەمینەوەیەک دەست بۆ شێواندن و لەنێوبردنی شوێنەوار و پەیکەرە
مێژووییەکانیش دەبن!
لێرەدا جێی خۆیەتی بپرسین.. ئایە دەسەڵاتدارانی هەرێم کە هەر خودی
خۆیان لە چوارچێوەی سیستەمە گەندەڵکارییەکەیان بە دەیان مەلای جانەوەری
لەو بابەتەیان دژ بە ماف و ئازادییەکانی خەڵک دروستکردوە و تا ئێستاش
ساڵانە بە پێی گۆڕانی باردۆخەکان هەر مۆدێلی تازەیان لێ دروستدەکەن..
ئیدی دەرکردن و هەبوونی یاسای بەڕێوەبردن و پاراستنی شوێنەوار و
کەلەپوور بێجگە لە خۆڵکردنە چاوی خەڵک چ واتایەکی دیکە دەگەیەنێ!؟ ئەوە
سەرەڕای ئەوەی ئێستا ئەو جانەوەرانە بە هۆی پشتگیرییکردنیان لە لایەن
دەزگە سیخوڕییەکانی داگیرکەرانی کوردستان و کۆمپانیایە زەبەڵاحەکانی
وڵاتە ناوچەیی و رۆژاواییەکان بە ئاشکرایی و بە بێ ترس پەتکان دەپسێنن
و دەبێژن ''شێواندن و تێکدانی پەیکەرە مێژووییەکان کارێکی دروستە و خێر
و سەدەقەی خۆی هەیە''!
لەولاشەوە وەزارەتی ناڕۆشنبیریی و دەزگە
پەیوەنددارەکان بە بیانووی پاراستنی باوەڕ و پیرۆزییەکانی زۆرینەی
موسلمانان و دڵڕاگرتنی هێز و بزووتنەوە نێوخۆییە داعش ئاسایەکانی سەر
بە تورکیا و سعودیە و ئێران ئەو قسە ژەهراوییانە بە هەنگوین دەرخواردی
موسلمانە کەللەپووتەکان و دەنگدەرە کۆیلەکانی (یەکێتی و پارتی و گۆڕان)
دەدەن!
جا ئەوەی ئێستا پێویستە زۆر بە رۆشنیی جەختی لەسەربکرێتەوە؛ ئیدی
هەرگیز ئەو تاکتیکە بێزەوەرە و بێزراوەی دروستکردنی ئەو دەعبایە
ئیسلامگەرایانە لە لایەن ئەو دەسەڵاتە گەندەڵکار و مافیاییە بەسەر
خەڵکە هۆشیار و ئازادییخوازەکەی کوردستان تێناپەڕێ و تا دێ بەو کار و
بەرخوردانەیان سیستەمە ستەمگەرەکەیان لە مەرگ نزیک و نزیکتر دەبێتەوە و
هاکا وەک دیکتاتۆرەکانی دیکە تەختوتاراجیان بەسەر خۆیان دابڕووخی.
avan.karim1979@gmail.com
|
