|
٩\۴\٢٠١٠
ژیان
لای مردنە.
فەرهاد کەریم
بەیانیان کە
رۆژ ئاوادەبێ
قاوەیەک لە دۆزەخی شیرین دەخۆمەوە
ئێوارانیش کە رۆژ هەڵدێ
پیاسەیەک لە بە هەشتی تاڵ دەکەم
بەیانیان لە ژێر چەتری تاریکییدا
دەمامک دەچنم
لە ناو گەرووی تاریکییه جوانەکان
کۆلارە دەدەمە ئەو پیرە منداڵانە و
گۆپاڵه‌کانیشیان دەنێرمەوە ئەو دۆزەخەی لە دڵی سروشت رۆناکتره
ئەو پیرە منداڵانەش رادێنم
لە رۆناکییه تاریکەکاندا بە رێدا بڕۆن
لە شەوی رۆناکدا
نامە بۆ خودا بنووسن
بەخودا بڵێن ئیمێلێک بۆ ژیان بنێرێ
بە ژیان بڵێ مردن جوان کا
بە مردن بڵێ دوورکەوە لە ژیان
لەگەڵ ژیان یاری مەکە
-
جەنجالی تەنیاترە لە تەنیایی مردن
تەنیایی پڕ رەنگە، پڕ دەنگە ژیان -
عەیامێکە مەرگ
لە ترسی ژیان پیاسە ناکا
ژیان گۆرانیەکی پێ نییه بۆ مردن
ژیان لە تەک مردنە
مردن لە ژیان
تێرترە
ژیان مردنی وێران
کرد
مردن ژیانی جوان
کرد
رۆژ باش مردن
شەو شاد ژیان.
زەنگی سێو.
ووشەیەک رەشمان
دەکاتەوە
دەنگێک پێش خنکان
بانگمان دەکا
گەڵایەکی
پەککه‌وتە
ئیرەیی بە
پەپوولەیەکی مەست دەبا
تەنافی ماڵه
هەژارەکان
شوێنی حەسانەوەی
باڵنده بێزارەکانن
تاوان لێی رژا
بە منداڵیی
داچوونەوە
خوا بە هەوەس
بووە جلوبەرگ
سزا لە روانینی
مرۆڤ رووا
لەگەڵ دەرکەوتنی
سێودا
لە سێبەری مەستی
ژیا و
دوو باڵی پایزیی و
گیاندانی هیوا
رەنگ ژیا
باجی ژیربوونەوە
جلوبەرگ و
مەراقی چیا
هەڵدانی ئاوی ترێ
و مژینی گیا
گومانیش لە خود
و وجود و خوا.
Farhad4Hamad@yahoo.com
|
