کاک تەها دەستت
خۆش و هەڵبژێردراوانیش سەفەر بەرەکەت!
بەشدار عهلی
دەرخستن و بەرزرکردنەوەى نوخبەیەک بۆ ئاستێکى باڵا لەسەر حیسابى
زۆرینەى خەڵک ، بەرهەمى عەقڵیەتێکى تۆلیتارى و دۆگماى چەق بەستوى
داخراوە،لەرێگاى ئەو سیاسەتە پەیامێک بە گوێى هەموو کەس دەدات ئەویش
ئەوەیە( ئەوەى لەگەڵم بێت لە چینێکى بەرزە و ژیانێکى خۆشى دەبێت،ئەوەشى
لەبەرامبەرم بێت لە خوارەوەیە) لەم بارەیەوە حکومەتى گۆڕ بەگۆڕى بەعس
هەنگاوى زۆرى بڕى تا لە هەموو ناوەندەکاندا کاراکتەر و دڵسۆزەکانى بکات
بە کاریزما،دەسەڵاتى کوردیش رێک ئەو عەقڵیەتەکەى درێژە پێداوە و هەمیشە
لە هەوڵدایە کەسەکانى خۆى لە سەرووى هەموو هێز و بیرکردنەوەیەک دابنێت
و قسە کردن لەسەریان بڤە بێت و وەکو کەسى ئاسایى سەیر نەکرێن و
جیایانکاتەوە لە خەڵک.
لە کۆتایى ساڵى رابردوو وەزارەتى وەرزش و لاوانى حکومەتى هەرێم کۆمەڵێک
گەنج و پیر و مناڵى بەناوى (گەنجى ساڵ ) هەڵبژارد و خەڵاتى کردن،
خۆشبەختانە لەم هەفتەیەش هەڵبژێردراوان لەگەڵ ستافێکى تر سەفەرێکیان بۆ
دەرەوەى وڵات بۆ رێکخراو و بەم هۆیەشەوە هەزارەها ملیون دۆلارى ترى
گەنجان و لاوانى کوردستان لە پرۆژە و بەرنامەیەک
خهرج کرا کە تەنها چەند بەچکە کادیرێکى حیزب سوودى لێوەردەگرن
و عەقڵیەتێکى تاکڕەوى و دیکتاتۆرى لە کۆمەڵگادا برەو پێدەدات.
بە جیا لەوەى ئەم هەڵبژاردن و خەڵات کردنە هەڵبژاردن و خەڵاتکردنى
باشترین و دڵسۆزترین کاراکتەرەکانى حیزب بوو لە ناوەندە جیا جیاکاندا،
بۆ ئەوەى لە هەوڵى بەردەوامدا بن بۆ زیاتر بە حیزبى کردنى
ناوەندەکانیان( کە ئەم ئامانجە لە هەموو پرۆژە و کارەکانى وەزارەتى
بەناو لاوان هەستى پێدەکرێت)، بە جیا لەوەى
هەوڵێکى ترى دەسەڵاتى کوردى بوو بۆ دەرخستن و بەرزکردنەوەى
کاراکتەرەکانى خۆى و وون کردنى دەنگە جیاوازەکانى تر و ساردکردنەوەیان
لە بەرنامە چاکسازى و گۆڕانکارییەکاندا، تا پێمان بڵێت سەیرکەن کوڕان و
دڵسۆزانى حیزب چۆن خەڵات دەکرێن و بە وڵاتاندا دەگەڕێن و لە ناز و
نیعمەتدا دەژین،وەرن ئێوەش وەکو ئەوان قسە مەکەن و بێدەنگى قبوڵ بکەن و
لەم ژیانەدا بژین،لەیەک دێردا ئەم هەڵبژاردنە و سەفەرکردنە و بسەرف
کردنى هەزارەها دۆلار، تەنها رازیکردنى دڵسۆزانى حیزب بوو و هیچى تر.
ئەوەى جێگاى تێڕامانە، سەرەڕایى لەبەردەستا بوونى زۆرترین ئیمکانیات و
فەراهەمبوونى دەسەڵات و یاسا و دەستورە لاستیکیەکانیان و کۆنترۆڵ کردنى
ناوەند و دامو دەزگاکان و خستنە ڕووى پرۆژە و بەرنامەى جۆراو جۆر بۆ
پیرۆزکردن و بە کاریزماکردنى کاراکتەرەکانیان، بەڵام خۆشبەختانە
هەوڵەکانیان شکست دەخوات و مرۆڤى هۆشیارى ئەو سەردەمە شتەکان ئاوا
بەئاسانى قبوڵ ناکات.
دەبێت وەزارەتى وەرزش و لاوان و خودى تەها بەروارى ئەوە باش بزانێ
خهرجکردنی هەزارەها دۆلار لە سەروەت و
سامانى گەنجانى کوردستان تاوانێکە و بۆیان نیە بەم شێوەیە مامەڵە بە
سەروەت و سامانى خەڵک بکەن و هەست و نەستى هەزارەها گەنج و لاویش
بریندار بکەن، ئەگەر وەزارەتى بەناو لاوان متمانەى بە هەڵبژاردنى ئەو
لاوانە و پشت ئەستورە بەتوانا و قابیلیەتیان،با کۆى مەسروفات و خەڵاتى
ئەو (هەڵبژێردراوانەى) لە پرۆژەیەکدا بۆ ئەو گەنجانە لە بوارێک لە
بوارەکاندا بخستبایە گەڕ ، تاکو ئەو (داهێنەرانە )بەرهەم و کارى
باشتریان بەرهەم بهێنایە.
لە مەمەلەکەتێک کە هەموو ئاراستەکانى دەسەڵاتى سیاسى بەرەو تاکڕەوى و
دیکتاتۆرى هەنگاو ببڕێ ،کار لەسەر و وورد و خاشکردنى توانا و هێز و
ئیرادەى تاکەکان بکرێت، لە پشتەوەى هەر پرۆژە و حەز و هیواو خۆزگەیەک
دەیان کۆسپ و رێگرى خۆى حەشار دابێت، دەسەڵاتى حیزب لە سەرووى هەموو
دەسەڵاتێکدا بێت، جێبەجێکردنى یاسا و دەستور و سزادان تەنها لە ماڵى
هەژاران جێگاى ببێتەوە، سەراپاى سیستەمەکانى بەرێوەبردنى کۆمەڵگا لەبەر
یەکەوە هەڵوەشابێت،چاوەڕوانى ئەو جۆرە کارانە و بەرنامەى لەم شێوەیە لە
وەزارەت و دامەدەزگاکان و بەرپرسانى ئەو وڵاتەش دەکرێت.
ئەم مەملەکەتە پێویستى بە گۆڕانێکى ریشەیى هەیە لە هەموو
بوارەکاندا،گەنج و لاو و مناڵ و پیر و پەککەوتە و ژن و فەرمانبەر و
مامۆستا و قوتابى و کاسبکار لە حاڵەتێکى دەروونى خراپدا دەیگوزەرێنن،بە
سەدان گەنج لە هەولێر و سلێمانى تواناى کڕینى جوتێک پێلاویان نیە،بەڵام
دڵسۆزانى حیزب سەفەرى ئەوروپا و ئەمەریکایان بۆ رێک دەخرێ لە سەروەت و
سامانى خەڵک، دوایى ژیانێکى کوڵەمەرگى خوێندن تەواو دەکەین و رەوانەى
شەقامەکانمان دەکەن، بە دەیان خێزان نانى
بەیانى مسۆگەر نیە و بەرپرسانیش لە نێو کۆشک و تەلار شەو بەرێدەکەن،
ئەو وەزعیەتە تا سەر ئاوا بەردەوام نابێت،هەموو شتێک لە باریکییدا
دەپچڕێت ،بەڵام زوڵم ز زۆرداریی و نایەکسانیی
لە ئەستوریی!
Bashdar_net@yahoo.com
|