په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٥\٧\٢٠١٠

کامیان ترسناکترن ؟

کورسییە بێهۆشکەرەکان یان مادە بێهۆشکەرەکان!


هیوا رەش   


لەم ماوەیەدا برادەرێکم بۆ کارێکى خۆى ڕێى دەکەوتە فەرماندەیى گشتیى لە سلێمانى ، پیى خۆش بوو منیش بۆ هاودەنگى لەگەڵیدا بچم ، کە لە زاڵگەى دەرگا گەورەکەیەوە وەژوور کەوتین ئاپۆڕایەکى زۆر لە دەورى تەکسییە وەستاوەکانى ئەولاى زاڵگەکەوە هەبوو ، دیار بوو ئۆتۆمبیلەکان بە گواستنەوەى سەرنشینان ڕا نەدەگەییشتن، لە دواییدا بۆم دەرکەوت ئەو قەرەباڵغییە کەسوکارى زیندانییانى مەعەسکەر سەلامن و لە ڕۆژى مواجەهەدا بۆ سەردانى خوشک و دایک و برا و باوکیان هەڵپەیانە ، کەسەکان ڕوخساریان غەمناک و ماندوو ، هەڵسوکەوتیشیان نائاسایى دیار بوون و شەتەکیى بە سەر جەستە و جووڵەشیانەوە جێپەنجەى خۆى جێهێشتبوو ، کەمێک لەولا ترەوە پیرەژنێکى پشت چەماوەى ژێر بارى نەهامەتى ژیان لە سەروو 70 ساڵى و مێرمناڵێکى نزیکەى 14 15 بەهارى بە گوێرەى دوورکەوتنەوەیان لە ئۆتۆمبیلەکان لەوە ئەچوو بیانەوێ ئەو ڕێگە دوور و درێژە بخەنە بن پێڵاوەکانیانەوە و نەفرەت لە نەدارى و ناعەدالەتى و وەیشوومەى ڕۆژگار بکەن ، ملى ڕێگایان نابووە بەر .

گوتم: ئا توخوا کامەران بۆیان بوەستە با سەریان بخەین .
گوتی: با بۆیان نەوەستین چونکە شوفێرى تەکسییەکان پێیان ناخۆشە .
گوتم: ڕووى بابى ئەوە ڕەش بێت کە پێى ناخۆشە ، خۆ ئێمە بە پارە هەڵیان ناگرین.

خوا هەڵناگرێ کامەران بەڕوودامانەوە بۆیان وەستا.
گوتم: دایە گیان فەرموون سەرکەون .
گوتی: ماڵتان ئاوا بێت ڕۆڵە ، قەیناکە وا هێواش هێواش بۆ خۆمان ئەڕۆین .
گوتم: بۆ مواجەهە ئەچن ؟
گوتی: بەڵى کوڕە شیرینەکەم .
گوتم: دە سەرکەون ئێمە خۆمان هەرواوە ئەڕۆین.

بەم قسەیەم تێگەییشت کە مەبەستمان پارە نیە بۆیە بە خۆشنوودییەوە سەرکەوتن.

 

لە قسەکانیان دیار بوو کوڕەکەیان لە ئاکامى ئەوەى پەناى وەبەر کێشانى مادە بێهۆشکەرەکان بردووە و بە دەستیەوە گیراوە ، ئەوەى لە خەیاڵم بێت دایکى گوتی : 20 ساڵى ڕەبەق حوکم دراوە .

دواى قسەوباسى بەدەم ڕێوە ، پیرەژنە بەسزمانەکە زوخاوى لە دەروون ئەتکایەوە ، لە کاتى دابەزینیشیاندا دەستم بۆ بەڕکم برد و شتێک پارەم بۆ پیرەژنەکە ڕاگرت ، دیار بوو بە چاوە کزۆڵەکەیەوە دیقەتى دەستمى نەدابوو ، دامە دەستى کوڕەکە ، ئەویش هێندە شەرمن و نەفس بەرز بوو وەرى نەئەگرت ، دواى تکاى زۆرم لە پیرەژنەکە ئینجا لە دەستیان وەرگرتم و هەتا قەدەرێک دوعاى پیرەژنەکە پەردەى گوێچکەکانمى ئەلەراندەوە .

لەم ڕۆژانەشدا دکتۆر فەرهادى برادەرم تێلى بۆ کردم و دواى گفتوگۆیەکى دوولایەنە و باسوخواسى بارودۆخى سیاسى ، لە کاتى قسە کردندا گوتی : بابە ئەمانە لەبەر کورسییەکانیان بێهۆش بوونە و ئاگایان لە خەڵک نەماوە ، لێرەوە هەوێنى ناونیشانى ئەم نووسینەم بۆ دروست بوو ، گوتم : ئەبێت کامیان ترسناکتر بن ؟ کورسییە بێهۆشکەرەکان یان مادە بێهۆشکەرەکان !

ئەگەر چاوێک بە مێژووى سەدەى ڕابردوودا بخشێنینەوە ، لە سەرەتاى دەیەى نۆیەمیدا بە بێ هیرۆیین و تلیاک و حەشیش هەموو گەلى کوردستان مەست و سەرخۆش و بێهۆش بوون ، بەڵام چ جۆرە بێهۆشییەک ؟ ! بێهۆشیى سەرکەتن و ڕزگاریى لە دەستى بەعس ، بۆیە لە کەرنەڤالًَێکى بێهاوتاى مێژووییدا سەرجەم گەلى کورد لە باشورى کوردستان ، بە باش و جاشەوە بەرەو پیرى سندوقەکانى دەنگدان چوون و پێشوازییان لە هەڵبژاردن کرد و دەنگیان بۆ نوێنەرەکان دا ، وەلێ لەوێ دەمەوە کورسى پەرستى و ملکەچیى پۆست ، زوو خەونەکانمانى بان و بن کرد و بە هیمەتى تکا و دەست ماچ کردنى پیاوچاکان و دڵسۆزان و غەمخۆرانى گەل و نیشتمان ، پارتى و یەکێتى لە سەر کەلەوە هاتنە قەدپاڵى کەلى شەیتان کە تا ئێستاشى لەگەڵدا بێت نایەنە خوار و کەى بەرژەوەندى بنەماڵە و سەرۆک و سکرتێر بخوازێت هێزى پێشمەرگەى حزب دنە ئەدەن و ئەیانبەنەوە سەرکەل و لەسەر قازێک و ڕیزەدوکانێک چارەنووسى میللەتێک ئەخەنە لێوارى مەرگەوە ! وا پێ ئەنێینە ناو دەیەى دووەمى سەدەى نوێوە هەمان بەزم و بالۆرە هەر باوى ماوە ، سیاسەتى 50 بە 50 و دوولەت کردنى خاک ، بە پێدەشت و تەپۆڵکەو چیاوە ، گەل ، بە بادینى و سۆرانى و هەولێرى و سلێمانییەوە ، بوونى دوو ئاساییش و دوو پەروەردە و دوو شۆراو و دوو دەزگایى لە کەرکوکدا هەر لە سەرووى بەرژەوەندییە باڵا نەتەوەییەکانەوەیە ، ئاساییشى نەتەوەییمان بەندە بە دەست تێکەڵ کردنى سوپا داگیرکارییەکانى دەرودراوسێوە ، یەکڕیزیمان وابەستەیە بە یەکڕیزى لە چۆنێتى دابەشکردنى پۆستەکان بە سەر ئەرباب و ئەحباب و خزم و نەوە و نزیک و ئەتباعەکانى خێڵ و بنەماڵەوە .

کەپکى حەمەداغا و کڵاوقاسم و کەپک و لوتکەکانى تر کە ئێستاش ڕەنگیان ئاڵ و سوورە ، بە خوێنى ناهەق ڕژاوى ڕۆڵەکانى گەلەکەمان بۆ زامن کردنى هەیمەنەى کورسى و دەسەڵات و دزینى داهات کەچى مێشێک میوانى سەرکردەکان نیە و ئەڵێى بە کورسییەکانیانەوە بزمار ڕێژکراون و تا ئێستا نەمانبیست و نەمانبینى یەکێکیان لەسەر خیانەتى کورد بە کورد بە کوشتدان بدرێنە دادگا ، سەروەت و سامانى سەرزەوى و ژێرزەوى و ئاسمانى ئەم کوردستانە حەپەلوش ئەکەن و دزێک لێى نەپرسرایەوە ( من این لک هدا ؟ ) ، ئەگەر باوکێکیش لەبەر بێپارەیى دەست بۆ تەنها قوتووە شیرێک بۆ ساواى دایک مەمک ووشک هەڵاتوو بەرێت ، دادگا حزبییە ناسەربەخۆکان بە یاساى هەزار و یەک ڕەنگ ئاڵا و واڵا کراوەوە ، بە بێ بەدواداچوون بۆ فاکتەرەکانى سەرهەڵدانى دزى ، تاوانبارى ئەکەن و ساڵانێک لە زیندانەکان قایمى ئەکەن و ساواکەش لە بێشیرى و بێباوکى و بێنازیى لە برسا ئەکوژن و کۆستى خێزانێک کوێر ئەکەنەوە .

بازرگانیى مادە بێهۆشکەرەکان کارێکى سانا نیە و هەڵپە کردنێکى نامەشروعى پارەدار و سەرمایەدارانە بۆ زیاتر کەڵەکە کردنى سەرمایەکانیان و دەستى ئەوانى لە پشت نەبێت مەحاڵە بە خەڵکى هەژار ئەنجام بدرێت ، ئەو خەڵکە هەژارەش بۆ پەیدا کردنى بژێوى زۆر جاران پەنا وەبەر کردارى نابەجێ ئەبەن و ئەبن بە ماشەى دەستى ئەوان ، بێگومان سەرمایەدارانیش ئەگەر خۆیان لە ناو دەسەڵاتدا نەبن ئەوا بێ سێ و دوو پیاوى دەسەڵاتن ، و ئەوان فاکتەرى ناعەدالەتیى کۆمەڵایەتى و نایەکسانین لە کۆمەڵگادا ، بۆیە ئەبێت بەر لەوەى ( دز ) ێک بخرێتە ناو قەفەسى تاوانى مادى و مەعنەوى ، یان بخۆر و سەوداکەرێکى بچکۆلەى تلیاک 20 ساڵى ڕەبەق بخرێتە کونجى زیندانەوە ، پێویستە بیر لە گۆڕینى سیستم و ئەداى حوکم بکرێتەوە بۆ بنبڕ کردنى دیاردە نەشیاوەکانى ناو کۆمەڵگا ، مناڵێک بەیانى تا ئێوارە بە دواى جگەرە و بنێشت فرۆشتنەوە بێت و نەتوانێ لە جیاتى باوکە بێسەروشوێنەکەى شەڕى ناوخۆ بژێوى خوشک و دایکە بەخت ڕەش و نیمچە بێوەژنەکەى دابین بکات ناهەقى نیە کە گەورە بێت پەنا بباتە بەر دزى و تلیاکچێتى و پیاوکوژى ، بێگومان ئەو ڕەفتارە ئەگەر ئەنجام بن ئەوا هۆکارەکەشى دەسەڵاتدارانى ووڵاتەکەمانە و هەر ئەوانیشن دز و بێهۆش و قاتیل ، ئەگەر وا نیە ئەو هەموو داهاتەى کوردستان چى لێ دێت و بۆ کوێ ئەچێت ؟ ئەگەر وانیە دواى ئەو هەموو نەهامەتییەى بەسەر گەلەکەماندا هات و ئێستاش باس لە تەشەنەسەندنى تلیاکچێتى ئەکرێت و ئەوان نەکەوتوونەتە دواى کورسیى بێهۆشکەر بۆچى ئاگایان لە خانەوادەکانى کۆمەڵگا نیە و ئاوڕێک لەو هەموو ناعەدالەتییە نادەنەوە و تا ئێستا دواى چەندین بانگهێشتى وەزیر و گزیر کامیان سزا دران و کامیان درانە دادگا ؟ ئەگەر ئەوان قاتیل نین هیچ نەبێت با سۆراغى بێسەر و شوێن کراوەکانى سەر دەستى ئەوان چارەنووسیان ئاشکرا بکرێت ؟ ! و هیچ نەبێت چارەکى بزنە کێوییەکانى دەڤەرەکانى خۆیان ژیانیان پارێزراو بێت .

هەموو ئەم نووسینە ئەوە دەرئەخات کە تۆڕى دەستى دەسەڵاتداران عەکسى تۆِڕى ڕاوچى ماسییە ، ڕاوچى ماسى ، تۆڕەکەى ماسى گەورە ئەگرێت و بچووک بەرئەدات ، تۆڕى دەسەڵاتدارانیش تاوانبارى بچووک ئەگرێت و گەورەش مەرەخەس ئەکات .

 

ماڵپه‌ڕی هیوا ره‌ش