|
٢٤\٨\٢٠١٢
کێ (جەلالەدین
ئەلسەغیر)ی راسپاردووە؟!
جەلال دەباغ
کابرایەکی کۆنەپەرستی گیرۆدەی ئەوهامی دینی و شۆڤینی لە چەند دەزگایەکی
راگەیاندندا دەستی کردووە بە وڕێنە و ناماقوڵ و قسەی بێ سەروبن گوایە
ئەو مەهدیەی بە خەیاڵی خاوی خۆیان چاوەڕوانی دەکەن، هەرکە هات
یەکەوڕاست جەنگ لەدژی کورد رادەگەیەنێت!! گوایە لەبەر ئەوەی قەمی کورد
لە "جنۆکەو شەیتانن" و تەنانەت ژن لێهێنان و شووپێکردنیشیان "حەرامە"!!
ئەمانەو کۆمەڵێک ورێنەیتر کەهەر هەموو بۆچوونەکانی بەرهەمی خەیاڵی
بۆگەنی خۆی و دواکەوتووەکانی کۆمەڵەکەیەتی.
لەم سەردەمی پێشکەوتنی بێ وێنەی زانست و تەکنەلۆژیدا کێ بڕوا بەم
خەرافیاتە پڕوپوچانە دەکات؟ مەگەر هەر ئەوانەی دواکەوتوترین بیرو
ئەوهامی دینیی مێشکی نەخۆشیانی پڕکردبێ.
ئەم (جەلالەدین سەغیر)ە، لەکاتێکدا هەرچی
دواکەوتوان و مێشک نەخۆشانە لە دژی نەتەوەی ستەمدیدەو زۆر لێکراوی کورد
هاندەدات بۆ شەڕو کوشتار لە دژی گەلەکەمان و بۆ زەوتکردنی ماف و سامان
و نیشتیمانەکەی.
ئەم کابرایە کەبەناوی شیعەیەتیەوە قسان دەکات بە هەموو مانایەک لە دژی
دەستوری عیراقەو لەدژی بەرژەوەندیی گەلەکەی خۆشیەتی. لەکاتێکدا هانی
قەلاچۆکردنی گەلەکەمان دەدات کە نەتەوەکەمان لەهەر چوارپارچە
دابەشکراوەکەی نیشتیمانەکەماندا، رووبەرووی شەڕێکی ناڕەوابۆتەوە،
ئەوەتا لە باکوری کوردستان حوکمە "ئیسلامیەکەی" تورکیا شەڕی لە دژی
گەلەکەمان راگەیاندووەو بە بیانوی لێدانی " پەکەکەی گوایە"تێرۆریست!"
بزاڤی رزگاریخوازیی خستٶتە بەر ئاگری شەڕێکی ناڕەوا، بەوەشەوە
نەوەستاوە هەر بەو بیانووە، چیاو پێدەشتەکانی باشووری کوردستانیش
بۆردومان دەکات و رۆژانە باخ و بێستان و گوندی دانیشتوانی سڤیل کاول
دەکات.
لە خۆرهەڵاتی کوردستانیش رژێم کەوتۆتە گیانی خەڵکی کوردو شەڕو بۆردومان
و ئەشکەنجەو ئیعدام و بێبەشکردنی گەلەکەمان لە سادەترین مافی نەتەوەیی
و مرۆیی.
لە خۆرئاواش رژێمی تورکیا لەسەر مانۆرەکانی دژی کوردستان بەردەوامەو،
رژێمی دیکتاتۆری سوریەش نزیک بە دوو ملیۆن کوردی لە مافە
نەتەوەییەکانیان بێبەش کردووەو، گەکەکەمان کەوتۆتە بەر ئاگری ئەو شەڕە
ناڕەوا تێکۆپێکدەرەی کە رۆژانە زیانێکی زۆر بە خەڵکی بێتاوان دەگەیەنی
و نە رژێمی دیکتاتۆرو نە ئۆپۆزیسیۆن تا ئێستا مافە رەواکانی گەلی کورد
بڕیار نادەن.
لە باشووری کوردستانیش رژێمەکەی سەرۆکوەزیران(نوری مالیکی) دەیەوێ شەڕ
بە گەلەکەمان بفرۆشێ و لەشکرکێشی دەکات و ناوچە دابڕاوەکان ناخاتەوە
سەر هەرێم و، چەندان کێشەی لەگەڵ هەرێمی کوردستان بێ چارەسەر هێشتۆتەوە.!
ئەم وڕێنەکردنانەی جلال الدین ێغیریش لەدژی گەلی کوردمان بەشێکە لە
شاڵاوی راگەیاندن و پڕۆپاگاندە لەدژی فیدراڵی و مافی بڕیاردانی
چارەنووسی گەلەکەمان.
لە چ گۆشەنیگایەکەوە ناوبراو گەلەکەمان بە "شەیتان و جندۆکە" و شتی وا
ناودەبات؟
گوتارە بەدناوەکەی جەلالەدین سەغیر تەواوی
گەلی کوردستان و دیموکراتخوازو پێشکەوتنخوازانی عیراق و ناوچەکەی توڕەو
بێزارکرد، بۆیە لە هەموو لایەکەوە لەدژی ئەو بیرە شۆڤێنیە کۆنەپەرستە
چەندان وتار بڵاوکرانەوەو، رۆشنبیران کەمپینیان سازکردو بە سەدان ئیمزا
لەدژی ئەو وتاردانە کۆکرانەوەو ناوبراو ریسواکراو، کارو چالاکیی بێزاری
و توڕەیی توندتری لێدەکەوتەوە، بۆیە ناوبراو ناچاربوو بە رواڵەت لەو
بۆچوونانەی پاشگەزبێتەوەو، ئەنجومەنی باڵای ئیسلامی کە ناوبراو یەکێکە
لە رابەرانی، ئاشکرای بکەن کە ئەوە بۆچوونی ئەوان نیەو لەگەڵ کوردا
دۆستایەتیکی بەتینیان هەیە!
ئێمە لەو باوەڕەداین کە هەر ئەوەندە بەس نیەو، باشترە ئەنجومەنی باڵای
ئیسلامیی عیراق ئەو کابرایە لە ریزەکانی خۆیان دەربکەن، بەکردەوە
پیشانی بدەن کە دژی ئەو باوەڕە بۆگەنەن و داوای لێبووردن لە
نەتەوەکەمان بکەن.
لێرەدا دەپرسین: کێ ئەم (سەغیر)ەی
راسپاردووە؟ ئەگەر ئەنجومەنی باڵا ناوبراو دەرنەکات ئەوا بۆ زۆر کەس
هەیە وا بیربکەنەوە کە ئەوان خۆیان رایانسپاردووە، یان هاوپەیمانیی
شیعەکان، یاخود لایەنە شۆڤینیستەکانی دەسەڵات و سەرۆک وەزیران کە بێ
هەڵوێستە، یان لایەنی دیکەن کە رۆژگارو رووداوەکان دەریدەخەن کێن!
گەلی کوردستان لەمێژوی خەباتی نەبەزانەی خۆیدا گەلێک هەڕەشەو بیری
چەواشەکارانەو زۆردارانەی بیستووەو رووبەڕوویان بۆتەوە، دوژمنان و
نەیاران هەرچیان توانیبێت لە دژی گەلەکەمان کردویانە، بەڵام هیچ کامیان
وەکو ئەم کابرا دەبەنگە بە پێخاوسی و بەناوی ئاینەوە تێنەکەوتووەو،
ئەوەی وڕێنەی پێوەکردووە مەگەر هەر بە خەوو خەیاڵی بێ بنەوانی بیبینێت.
بۆیە دەبێ ئەوان و هەموو ئەوانەی وەک ئەو بیردەکەنەوەو نیاز
و مەبەستیان بەرانبەر گەلەکەمان خراپە، باش بزان کە گەلی
کوردستانمان ئەمڕۆلە هەموو کاتێکی پێشوو بەهێزترەو، بەهیچ هێزێک
لەناونابرێ و، مردن و سەرشۆڕی و لەناوچوون بۆ دوژمنەکانێتی و، سەرکەوتن
و سەرفرازی و دوارۆژی گەشەدار بۆ گەلەکەمانەو، هەردەبێ بگات بە مافی
چارەنووسی خۆی لە کۆردستانێکی سەربەخۆدا.
ماڵپه‌ڕی جه‌‌لال ده‌باغ
|
