|
٢٧\۴\٢٠١٠
کێ دیمانەی لەگەڵ
کێ سازداوە؟!
سەلام عەبدوڵا
رۆژنامەی ئاسۆ لە 20/4، لا8لەژێر ناوی(عەلی
زەنگەنە لە دیدارێکی ڕۆژنامەی ئاسۆ) بڵاوکردووە. دەبێ بڵێین دیدار واتە،
رۆژنامەنووس پرسیاری کورت و پوخت لەبارەی مەسەلەیەک دەوروژێنێ و
کەسایەتییەک وەڵامیاندەداتەوە. بەداخەوە گەرچی بەرپرسانی لاپەڕەی8ی
رۆژنامەی ئاسۆ و کاک خالید سلیمان کە خۆیان بە کەسانی کەمتر لە پسپۆڕی
بواری رۆژنامەگەری قبووڵ ناکەن، بەڵام ئەوەی لەو بەناو دیدارە لە گەل
هاوڕێ عەلی، زیاتر بە پێچەوانەوە دێتە بەرچاوو دەتوانین بڵێن عەلی
زەنگە دیداری لەگەل کاک خالید کردووە، چونکە ئەوەی زیاتر قسە دەکات
خودی کاک خالیدە نەک هاوڕێ عەلی. سەرەتا پێشەکییەکی دوورودرێژ، خالید
رەمڵێک لێدەدا و لەبری هاوڕێ عەلی دەنووسێ(لەوانەیە ئەو رۆمانە
پێشبینییەکی راستی نووسەرێکی...). پاش نزیکەی لاپەڕەو نیوێک، بۆچوونێکی
سەقەتی هاوڕێ عەلی بەرچاودەکەوێت.
بۆچوونێکی سەقەت.
سەرباری ئەوەی هاوڕێ عەلی دەڵێ(...ئەوەمان لەبیر چووبووەوە کە
باکگراوەندە سیاسی و ئایدلۆژییەکەمان داڕووخاوە و لە پاشەکشێدایە)،
خالید سەردێڕێک لەژێر ناوی(سێبەری دارەکەی حزب)دەنووسێ و دووبارە خۆی
لەو بۆچوونە تێهەڵدەقورتێنێ و بەشێوەیەکی تر دایدەڕێژێتەوەو تێشدا
ناماقووڵییەک لەگەل کادرانی حزب دەکات و بە"دەروێشیان"دەشوبهێنێ و
دەنووسێ(...بەڵام بەشێکی تریش وەک دەروێش دەمێننەوەو لەناو کار و
رۆتینی حزبیدا مەسەلەی پێداچوونەوە و نوێکردنەوەی حزبەکە و پڕۆژە
سیاسییەکەی لەبیر دەکات). ئەمە وێرای ئەوەی بۆچوونێکی سەقەتە، لە ئاستی
دیداری رۆژنامەوانیش، کورتی هێناوە.
ئەسپەکەی خالید!
کاک خالید بە زۆرەملی هاوڕێ عەلی کردووە بە میراتگەری ئەسپەکەی
ئیتماتۆف و بەشێوەیەکی"تۆتالیتار"-بۆچوونی خۆی دەنووسێت و تەنها زۆر بە
کورتی رێ بە عەلی دەدا. بۆ ئاگاداری خالید: تۆتالیتاریزم زاراوەو
تیۆرییەکی جەواشەکارەو لەلایەن هێزە کۆنەپەرست و سۆسیالدیموکراتە
دەستلەخوێنەکان بەکاری دەهێنرێت بۆ شوبهاندنی دەسەڵاتی سۆڤێت و
دەسەڵاتی فاشییەت بەیەکتر-، بەڵام پێدەچێت کاک خالید بەمە نەزانێ).
لەراستیدا من بە پەرۆشەوە حەزم دەکرد بیروبۆچوونی عەلی بخوێنم، بەڵام
خالید رێگریم لێدەکات ووەک خوێنەرێک ئەو حەزەم لێ زەوتدەکات. لە
سەردێڕەکەی(میراتی سۆڤێت) عەلی دێتە گۆ و بۆچوونێکی بێناوەڕۆک و لاواز
کە هیچ ناگەیەنێت دەردەبڕێ(راستە مێژوو ناوەستێت، بەڵام بەنیسبەت
حزبێکی سیاسی کە لەم بارە خراپەدا بژی، دەبێت بیر لەوە بکرێتەوە کۆتایی
مێژوو چۆنە، خۆ نابێت داکشان بە بەردەوامی مێژووی بناسرێت)
ئایا هیچ کەسێک لە ناو حزب و دۆست و لایەنگرەکانی و ناوەندە چەپەکان
داکشانیان بە بەردەوامی مێژووی ناسیوە؟!
بەڵام خالید پرسیارێک دەکات و هەر خۆیشی وەڵامی دەداتەوە، پێدەچێت لەم
کاتە هاوڕێ عەلی بۆ جگەرەکێشان رۆیشتووە. زەنگەنە دەڵێ(کەموکوڕییەکانی
حزب لە نەخوێندنەوەی واقیع و ناشارەزایی بوو لەناو کۆمەڵانی خەڵک).
ئەمەش دیسان دەربڕینێکی هەڵەیەو دەبوایە بڵێ(کەموکوڕییەکانی حزب لە
خوێندنەوەی بەهەڵە بوو بۆ واقیع!
ئەوەی بۆ خالید دەرکەوت!
هەموو ئەوەی لەژێر سەردێڕی(بەرپرسیارێتی لە شکست)نووسراوە بۆچوونی خودی
خالیدو هیچ بەڵگەیەکم بەدەستەوە نییە کە بۆچوونی هاوڕێ زەنگەنە بێت.
خالید نووسیویەتی(لەدانشتنێک زیاتردا و لە چەند گفتوگۆیەکی کراوەدا
لەگەل زەنگەنەدا ئەوەی بۆم دەرکەوت). ئیدی وەک بڵێ خالید توشی
نەخۆشی(دا)بووە زیاتر رۆڵی حیکایەتخوانێک دەگێڕێ و ئەوەی لەبیرچووە کە
دیدار سازدەداو دەبێ پرەنسیپەکانی دیداری رۆژنامەوانی بپارێزێ.
وەهم، بەڕاستی وەهم!
ئەوەی بەڕێز خالید لەژێر لەم سەردێڕشدا نووسیویەتی، هەر دیدی خۆی
نووسیوەو دەڵێ(لێرەدا قسەکەی پێدەبڕم و دەیبەمەوە ناو بابەتێک لەوانەیە
زۆربەی شیوعییەکان پێیان ناخۆش بێت و بەکارێکی ئەنتی چەپی ناوبەرن،
ئەویش پابەستبوونە بە بنەماکانی مارکسیزمەوە وەک ئەوەی لەدوای ئەوە
کۆمەڵگای مرۆڤایەتی هیچ داهێنانێکی لە فکر و گۆڕانکاریدا نەکردبێت).
خۆزگا خالید بەرچاومان بە داهێنانە نوێکانی مرۆڤایەتی لە بواری فکر
رۆشن بکات نەک ناوی بهێنرێت وبە هیچ شێوەیەک باسی داهێنانێ نەکرێ.
دوایی ئاشکرایە هەموو حزب و گروپەکانی سەرزەمین فکرێکی دیاریکراو
کۆیانی کردووە و پابەندی دەبن. من وا خەریکە بەزەییم بە عەلی زەنگەنە و
خوێنەرانی تری ئەو"دیدارە بلیمەتە"دێتەوە!
لەم بەشە ئاماژە بە(لابردنی وشەی لینینیزم لە بەرنامە گشتییەکەی حزب)و
لاوازی دەکرێت.
ئۆپۆزیتسیونێکی عەقلانی!
عەلی زەنگە ئەندامی مەکتەبی سیاسی حزب بووەو مرۆڤ چاوەڕوانی ئەوەی
لێدەکات لەئاستێکی بەرزتر بیروبۆچوونەکانی دەرببڕێت. ناهەقی ناکەم
ئەگەر بڵێم بەڕێزی بەشێوەیەکی لاوازو سادە و بێناوەڕۆک قسەی کردووە. بۆ
نموونە دەڵێ: ....بەڵام من دەتوانم بڵێم هۆشم بەبەردا هاتووەتەوەو چی
تر ناتوانم باری خراپی حزب لە خەڵک بشارمەوە).
برا: خەڵک و ئەندامانی و بەرپرسانی حزبیش دەمێکە دەزانن باری حزب خراپە
و ئەمە شتێکی شاراوە نییەو ئەنجامەکانی هەردوو هەڵبژاردنەکە ئەمەی
زیاتر و زیاتر بۆ هەموو لایەک رۆشنترکردەوە و خەڵکیش بۆ زانینی ئەو بار
خراپییە تۆسقاڵێک پێویستیان بە(هۆش بەبەرهاتنی جەنابتان)ناکات! ئەوەی
لەلای بەڕێزیان شاراوەیە، لە لای خەڵک و چاودێران و پەرۆشانی
بەهێزکردنی شوعییەت لە کوردستان، رابردووە!
کاک عەلی لە درەگای(توانای هەڵوەشانەوەو بنیاتنانەوە)دەدات و داوای
گۆڕانکاری جیدی دەکات و بە پێچەوانەوە حزب دەبێتە بابەتێکی مێژوویی بۆ
باسکردن و هیچی تر.
ئاخر پرسیار دەکەم: ئایا دەکرێ کەسایەتییەکی حزبی لە رۆژنامەی حزبێکی
ترەوە داوای(گۆڕانکاری) لەناو حزبەکەی بکات؟ ئەی حزب کۆنگرە نابەستێت؟
رۆژنامەو گۆڤاری نییە؟
کاک عەلی دەڵێ(حزب دەرگا لەبەردەم عەقڵ و بۆچوونە نوێکاندا بکاتەوە و
چی تر لەسەر نەهجە سیاسییە کۆنە بەردەوام نەبێت.)
هیچ حزب و لایەنێک نییە لە دنیا لەسەر نەهجی خۆی بەردەوام نەبێت، بەڵام
کۆنگرە بە کۆنگرە چاو بە نەهجەکەیان دەگێڕێن و ئەندامانی حزبەکە
بەخۆیان بڕیار لەسەر تاکتیک و ستراتیژییەکەیان دەدەن.
گۆرانکاری بووتە بنێشتە خۆشەی ژێر زمان و کاک عەلیش داوای گۆڕانکاری
جیدی دەکات بەبێ ئەوەی مەبەستەکەی لە گۆڕان روون بکاتە. بەبەرچاومانەوە
ئۆباما، عەلاوی، بەشیر، بزووتنەوەی ریفۆرم، گۆڕان داوای گۆڕان دەکەن،
بەڵام هەر هەموویان لە ئۆباماوە تا گۆڕانەکەی سەر گردەکە نەک هەر زۆر
کورتیان هێناوەو بوون بە رێگر لەبەردەم گۆڕانی شۆڕشگێڕانەی جەماوەری
خەڵکی ئێران، سودان، ئەمریکاو کوردستان و شوێنەکانی تری دنیاو بە
کردەوە بۆمان دەرکەوتووە کە لەراستیدا هەموو هەوڵی
ئەو"گۆڕانخوازانە"ئەوەیە سیستێمی باڵا بپارێزن و گیانی بەبەردا بکەن و
چەوسانەوەو تاوان درێژەی هەبێت و هەموو هاواری عەدالەتی کۆمەڵایەتی ئەو
دەستانەوە بۆ لەخشتەبردنی هەژارەکانەو بەڵگەم لەسەری ئەم بۆچوونە
ئەوەیە کە ئەو زۆر بەڕێزانە هیچ لەبارەی ناوەڕۆکی عەدالەتی کۆمەڵایەتی
ناڵێن!
نەفەسی دژ بە مارکسیزم لەلای ئەو برایانەو دەستبەردارییان لە
پرەنسیپەکانی ئەو فەلسەفەو فکرو بزووتنەوەیە، ناوەڕۆک و مەبەستی ئەو
بەناو"دیدارە"رۆژنامەوانییە.
بە کورتییەکەی: هەموو ئەندامانی حزبی شوعی و لایەنگران و دۆستەکانی و
چاودێرە سیاسییەکان بە روونی دەبینن و دەزانن پێگەی حزب لەچاو جاران
لاوازبووەو بمانەوێ و نەمانەوێ دوور کەوتنەوە لە جەماوەرو بێدەنگی و
تەنانەت خۆدزینەوە لە ئەرکی رێکخستنی ناڕەزایەتی و داخوازییەکانیان و
سیاسەتی هاوپەیمانی لەگەل پارتی و یەکێتی هۆی سەرەکی ئەو لاوازبوونەیە.
بەڕای من گۆڕان بەمانا پێشکەوتنخوازو شۆڕشگێرەکەی تەنها کارو ناوەڕۆک و
ئەرکی شوعییەکانەو هەر بە شوعییەکانیش بەروبوومی دەبێت و هەر شێوە
گۆڕانێکی تر، واتە چەقبەستن لەناو ئەقلی سیاسەتی جیهانی و ئاینەکان
وتاوان وژێرخستنی چەوساوەکان.
ئەگەر ئەو دیدارە بە مەبەستی بەرەوپێشبردنی خەباتی شوعیانەو
بەجەماوەرکردنی حزب بوایە، پشت بە رەخنەی مارکسیانە دەبەست و
ئەڵتەرنەتیڤیان پێشکەش دەکرد، نەک بە مقۆمقۆو بۆچوونی بێ بنەماو هیچ
نەگۆ کە لە دواییدا زیانی زیاترمان بەردەکەوێت. منیش وەک کەسێک کە
پاپەندی کاری حزبایەتیم نیم، رەخنەم لە حزب هەیە و لە کۆمەڵی
بیروبۆچوون رازی نیم یان بەدروستیان نازانم و چاوەڕوانی سیاسەت و
هەڵویست و کاری رۆژانەی تر لە حزبم هەیە، بەڵام ئەوەی جێی سەرسوڕمانە
ئەوەیە، کەسانێک هەن موچەی مانگانە لە حزبێکی تر وەردەگرێت، کەچی داوای
گۆڕانی شۆڕشگێڕانە لە حزبەکەی خۆی دەکات! چۆن یەکێک بەخۆی گەندەڵکاری
کردووە، کەچی داوای نەهێشتنی گەندەڵی دەکات!
لەپێناو سەرخستنی پەیام و خەباتی چینایەتی شوعییەکانی کوردستان،
مارکسیزم هێشتا هەر تاقە پشت و پەنای چەوساوەکانە. هێشتا مانای دادوەری
کۆمەڵایەتی خۆی لە مارکسیزم دەبینێتەوە، بۆیە سۆسیالیزمی زانستی لە
ئەمریکای لاتین ئومیدی خەڵکە یان تەنانەت ئیمپریالیزمی جیهانیش
ناچاربووە بۆ سەرکەوتن بەسەر قەیرانە گشتییەکەیدا، پەنا بۆ یەکێک لە
تاڵترین سیاسەتی ئابووری ببات، واتە پەنا بۆ سیاسەتی خۆماڵیکردنی
بانقەکان دەبات!. ئێمە دەتوانین بڵێین: هێشتا ئاسۆی مارکسیزم بۆ سەدان
ملیون کرێکارو زەحمەتکێشی جیهان روون و گەشەو ئەگەر مرۆڤایەتی لەپێناو
سەرکەوتن بەسەر موڵکایەتی تایبەتی و سیستێمی کارو بازاڕو جەنگەکانی کە
سەرچاوەی چەوسانەوەی مرۆڤ بۆ مرۆڤە، داهێنانێکی گەورەتر لە مارکسیزم
بەدەستهێنا، ئەوسا ئێمەش قسەمان دەبێت و تا ئەو کاتە، لەم رۆژگارەشدا
هەر دەڵێم شەکاوە بێت ئاڵای شوعییەکان و دڵنیام لەوەی کە بەخودی خۆیان
زوو یا درەنگ دەتوانن بەسەر هەڵەو کەمتەرخەمی و سازشکاری و تەمەڵی و
بیروکراتی تا گەندەڵیش لەناو ریزەکانی سەربکەون و هیچ کەسێک ناتوانێ
درێژە بدا بە یاریکردن بە چارەنووس بزووتنەوەیەکی کۆمەڵایەتی خاوەن
ئەزموونێکی دووردرێژ وەک حزبی شوعییەکان و مێژووش رەحم بە کەس ناکات.
|
