په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٣٠\٨\٢٠١٠

کێ گوێ لە ڕازى ئەم کچە خوێندکارە ده‌گرێ!


هیوا رەش   


دواى لێ تێکچوونى تەواوى ڕۆژانى پشووى هاوین ، هەرچەندە لەبەر ئەوەى بۆ خۆ ئامادە کردن لەوانەیەکدا ، خوێندنى لە لاى مامۆستایەک بۆ مەیسەر نەبوو ، چونکە تواناى دابین کردنى ( 000 750 - حەوتسەد و پەنجا هەزار ) دینارى نەبوو بیکات بە قوڕگى مامۆستایەکى بازرگاندا ! بۆیە هەرچى تواناى هەبوو خستییە کار بۆ ئەوەى نمرەیەکى باش بهێنێت .


24 8 2010 بوو ، شوێن ، قوتابخانەى ( ئەکرەمى قەزاز ) ى گەڕەکى ( بەختیارى تازە ) ى شارى سلێمانى ، کاتیش نزیکەى نیو کاتژمێر زیاتر بەسەر دەست پێکردنى تاقیکردنەوەدا تێپەڕ ببوو ، لە هۆڵەکەدا خوێندکاران بە پەرۆش و دڵەڕاوکێ و ترس و لەش داهێزران و بە دەم ئایەتول کورسى خوێندنەوەوە ، خۆیان دابووەە سەر دەفتەرەکانى سەر مێزەکانى بەردەمیان ، شەڕى مان و نەمانى چارەنووسى چەند ساڵەى خوێندنیان ئەکرد ، تاقیکردنەوەى خولى دووەمى وانەى ( کیمیا ) ى شەشى زانستى تەواوى خوێندکارانى پەشۆکاندبوو ، لە ناکاوێکدا بە سەرى پەنجە لە دەرگاى پۆلەکە درا ، گشت خوێنکارەکان سەریان هەڵبڕى ، دوو ( حیمایە ) لە بەر دەرگاکە چەقیان بەست ، کچە خوێندکارێکى پۆشتە و پەرداخ و بێباک وەژوور کەوت ، کەس نەیئەزانى کچە مەسئولە یان دەنکیەتى ، ژنە مەسئولە یان نیاز وایە بکرێت بە ژنى کوڕە مەسئولێک ، کەس بۆى نەبوو لە نیگاى سەرسامیى پڕ لە پرسیارى نهێنى بەولاوە هیچ پرسیارێکى تر بکات ! هاتنە ژوورەوەى ئەو کچە زریزەى خەیاڵ و بیرکردنەوەى ئامادەبووانى لێک ترازاند .


مامۆستاى چاودێرى هۆڵ ، زۆر غەمخۆرانە ئاماژەى بۆ میوانى درەنگ وەخت کرد بچێت لە دواوە دانیشێت ! بەستەزمانە لەوە ئەچوو ناچار کرابێت نەجابەت بنوێنێت ، بۆیە بێبەربەست و بە ئەدەبەوە لە حزورى کچە خوێندکارە خواپێداوەکەیا ، هێمن و لە سەرخۆ فەرمووى : دەفتەرت پێیە ؟ ئەویش وتى : بەڵێ . دیار بوو پیرە دەفتەر بە (پرسیار و وەڵام ) ەوە لەگەڵ خاوەنەکەیا هاتبووە ژوورەوە .


ئەمە گێڕانەوەى کچە خوێندکار ( ؟ _ ؟ _ ؟ _ ؟ ) ە ، کاریگەریى ئەو ڕووداوە هێندە ئاسەوارى بە سەریەوە جێهێشتبوو حەپەسابوو ، نەیئەزانى چاک یان خراپ وەڵامى داوەتەوە ، ئەو کچە تازە هەڵچووەى بە ئومێدەوە لە ئاییندەى ئەڕوانى ئێستا نەفرەت لە دنیاى ناعەدالەتى و نایەکسانى ئەکات ، ئێستا بە گومانەوە لە پیرۆزیى کار و ئەرکى وەزارەتى پەروەردە ئەڕوانێ ! هەنووکە گاڵتە بە ڕێکخراوەکانى یەکێتى قوتابیان و کۆمەڵەى خوێندکارانى یەکێتى و پارتى ( دوو حزبە دەسەڵاتدار ) ەکە ئەکات ، باوەڕیشى بەوە نەماوە بەو شێوەیە مافەکانیان پارێزراو بێت ، بێهیواش بووە لەوەى کەسێک هەبێت گوێ بۆ سکاڵاى شل بکات ، ئێستا دەستە و دوعایە و ڕوو لە خوا ئەپاڕێتەوە پەروەردە لەوە خراپترى بەسەر نەیات !


هێندەم لە دەست هات دڵى بدەمەوە ، پێم ووت : ئەو شتانەى من ئەیبینم بەم دوو چاوە ، مەینەتییەکى سووکە ئەمەى بە لاوە ، جاش و جاسوس و ئەنفالچى دەسەڵاتدارە ، بە پێشمەرگەى کەمئەندام ئەڵێن : بڕۆ بەولاوە !

وێنەیەک بۆ بەڕێزان :
1 د ، بەرهەم ساڵح سەرۆکى ئەنجومەنى وەزیران ، ئەستەمە هەر بیشیخوێنێتەوە .
2 وەزیرى پەروەردە ، لەوانەیە پێى قەڵس و بێزار بێت .
3 پەروەردەى سلێمانى ، بێگومان حاشاى لێ ئەکات .
4 کۆمەڵەى خوێندکارانى کوردستان و یەکێتى قوتابیانى کوردستان ، پێم وایە پێشتر لەوە ئەپێچنەوە کە ئەو خانمەیان سەر بە کامیانە و عائیدى چ بەرپرسێکیانە .
5 مافى مرۆڤى کوردستان ، ئەگەر خوێندکار و قوتابى بە مرۆڤ بزانن .


ماڵپه‌ڕی هیوا ره‌ش