|
٢٢\٥\٢٠١٠
کەلتوورى ئاشتیمان
پێویستە.
حوسێن ئیسماعیل خان دەلۆ
سروشتى ژیان پڕ پڕە لە هاوکێشەى جۆراوجۆر ، جگە لە یاساکانى سروشت خودى
مرۆڤەکان داهێنەر و خولقێنەرى ئەو پرنسیپ و هاوکێشانەن ، لە ئەزلەوە
مرۆڤ خۆى لەبەردەم ململانێ و زۆرانبازییەکەى نەبڕاوە و بێپسانەوەدا
بینیوەتەوە تاکو ژیان بەردەوامى هەبێت ئەو ململانێ و کێشمەکێشانە بوون
و درێژەى هەیە ، بە لۆجیکێکى تر ژیان بریتیە لەو بۆربورین و کێبڕکێیە
هەمەجۆر و هەمەچەشنەى نێوان مرۆڤ و مرۆڤ لەلایەکەوە و لە لایەکى ترەوە
لەگەڵ سروشتدا بە سوڕى زەمەنەکەیەوە ، لەناو ئەو هێڵى هاوکێشانەدا دوو
دیاردەى زەق و بەرچاو مەترێز و سەنگەرى دژ بە یەکیان گرتووە ئەویش
لایەنى باش و لایەنى خراپن یان هێزى رووناکى و هێزى تاریکى و ئیرادەى
خێر و ئیرادەى شەڕن ... هتد .
ئێمەى مرۆڤ لەناو ناخى خودى خۆماندا ئەو دوو سەنگەرە ئاوەدانە و هەردوو
لایەنەکەى تێیدا بەرجەستەیە و هەمێشە لە زۆرانبازى و ململانێدان ، بۆ
ئەوەى جوانیەکانى ژیان وەکو خۆى ببینین و تابلۆ و رەنگەکان لەدید و
هزرماندا تێکەڵ و پێکەڵ نەبن بۆ ئەوەى تاکەکانى کۆمەڵگا بە کەسوکار و
خۆشەویستى خۆمان بزانین ، بۆ ئەوەى ناسنامە و بەها مرۆییەکانمان وەکو
خۆى بەدەووربەرمان بناسێنین ، بۆ ئەوەى ژیانى کۆمەڵگا لێوان لێو کەین
لە بەختەوەرى و تێڕوانینى جوان جوان ، دەبێت هەوڵ بدەین لایەنە باشەکەى
ناو ناخەوەمان بەهێز بکەین ، دەبێت هەمیشە لە خو و پیستى مرۆڤدا بین و
نەچینە بەرگ و کەوڵى ترەوە.
کورد لە دێر زەمانەوە دەبێژێ :(سینەى بێ کینە پێعەمبەر سڵاوات) ، ئێمەى
تاکى کۆمەڵگاى کوردى دەبێت لە دەستپێکدا لەگەڵ خۆماندا ئاشت بێنەوە بەو
لۆجیکەى مرۆڤ لەگەڵ خودى خۆیدا ئاشتەوایەک بەرقەرار بکات ، سینەى
لەکینە و رق خاڵى بکاتەوە و ئینجا ئەو ئاشتییەى ناخى نیشان بدات و
نمایشى دەووروبەرى بکات ، هەموو تاکێک وورد و درشت سەنگ و قورساى خۆى
لەکۆمەڵگادا هەیە ، هەموومان رەوڕەوەى ژیان پاڵ دەنێین ، کەم و زۆر
هەموو کەس بەگوێرەى رۆڵ و دەورى خۆى نەخشى لە جوڵانەوەى ئەو رەورەوەیە
هەیە و لەو تەکانەى بەرەو پێشچوونەدا هاوبەش و بەشدارە .
ئەم قۆناغە هەستیارەى کە کورد پێیدا گوزەر دەکات ئاشتبوونەوەیەکەى
هەمەلایەنە و گشتگیر دەخوازێت ئاشتبوونەوەیەک کە بریتى بێت لە داماڵینى
هەموو بوغز و کینە و رقێک بەرامبەر بەیەکتر و چوونەوە سەر کرۆک و
بەدەنە و لاشەى مرۆڤانەى خۆمان ، کوشتنى گیانى ئەنایەت و خۆ بەزل زانین
و خۆ ویستى و خۆ پەرستى ، ئاشتبوونەوەیەک لە پێناو یەکتر بژێن و لە
پێناو یەکتردا بمرین ، ئاشتبوونەوەیەک لە پۆپەى دەسەڵاتەوە شۆڕبێتەوە
بۆ ناوەوەى خەڵک ئاشتبوونەوەیەک هەموو چین و توێژاڵەکان بگرێتەوە ،
ئاشتبوونەوەیەک نەک تەنها وەکو ماچ مۆچەکانى جەژن تەنها رۆژێک بێت
بەڵکو بە دڵ یەکمان خۆش بووێت ، ئەبێت مەبەست و نێەتمان وابێت تاکو
لەسەر گۆى ئەم زەوییەن یەکمان خۆش دەوێت و رەق و کینە لە دڵ و
دەرونماندا گەرا ناخەن و لانە ناکەن .
ژیان هى هەمووانە پێویست ناکات هەوڵى یەکتر سڕینەوە بدەین ، کەلتورى
یەکتر سڕینەوە هى چاخ و سەردەمەکانى پێشوو بوو ، دەکرێ گوێ بۆ یەکتر شل
بکەین وپرنسیپى دیالۆگ و حیوار میتۆد و رێباز و کارنامەى ژیانمان بێت و
فەرهەنگى پێکەوە ژیان و پێکەوە هەڵکردن پیادە بکەین ، دەکرێ یەکتر قبوڵ
بکەین چونکە مێژوو دەرى خستوە قبوڵنەکردنى یەکتر زیانى گەورەى لێداوین
، ئێمەى کورد هەموو پێکەوە گرنگین ، پێکەوە دەتوانین شتى گەورە ئەنجام
بدەین و بەرەو پێش هەنگاو بنێن .
ئێمە دەبێت رۆژێک ئەم سەر زەوییە بە جێبهێڵین بەدڵنیاوە دەڵێم ئەوەى
کردارى مرۆڤانە بێت لە ژیاندا ناخى لیپا و لیپ بێت لە ئاشتى و
خۆشەویستى خەڵک لە کاتى ئاویلکە و گیانەڵادا بەئاسودەى رۆح دەسپێرێ و
بە بەختەوەرى سەر دەنێتەوە ، چونکە سەربەرزە بەرامبەر بەوێژدانى خۆى و
بەر ئازارى ویژدان ناکەوێ .
husin2008@yahoo.com
|
