٢٩\٦\٢٠١٤

کەرکووک ئێستا پێویستی بە وتاری زبر و زەق نییە!

محەمەد بێبەش     

هەموومان ئیستا لەو ڕاستیە تێدەگەین نەک هەر ئێراق، بەڵکو تەواوی وڵاتانی ناوچەکە لە ئاڵوگۆڕی سیاسی و نەخشەو پێکهاتەی نوێدایە، ئێراق یەکێکە لەو وڵاتانەی لە دەستپێسخەری ئەو ئاڵوگۆرەدایە، دیارە ئەمەش جەند هۆکار و فاکتەرێکی بە‌هێز هەیە بۆ ئاڵوگۆری سیاسی و جوگرافی ئێراق، پاراستنی بەرژەوەندی سیاسی و ئابووریی و ئاسایشی دەولەتە زلهیزەکان، نەهیشتنی دەسەڵاتیکی بە هێزی ناوەندیی، پاوەنخوازی لە دەسەڵاتی مەزهەبی لە هیلالی شیعە و سوننە، ململانێ و جەنگی دەسەڵاتی نەتەوە و خاک، جەنگی عەلمانی و ئیسلامی بە توندڕەو و لیبراڵەوە، لە سەرووی هەمووشیانەوە گرێدراوی ئابووریی و ناوچە ۆ دەوڵەمەندەکانی بە کانزا و نەوت، ئەمانە فاکتەری سەرەکین بۆلێکترازانی دەولەتانی ناوچەکە.

بە هەر حاڵ هیچ مرۆڤێکی کورد ناتوانێ حاشا لە میژووی کوردستانی بوونی کەرکووک بکات، کورد پێش شۆرشی پیشەسازی داکۆکی لە کوردستانی بوونی کەرکووک کردوە، بێگومان لە دوای هاتنی بەریتانیەکان و دۆزینەوەی نەوت لەو ناوچەیەدا ئینگلیزەکان بۆ دروستکردنی ئاژاوە و پەیرەوکردنی سیاسەتی (ئاپارتاید) دەسبەسەراگرتنی سەروت و سامان کەوتە پەیرەوکردنی سیاسەتی تەعریب و تەتریک، ئەم سیاسەتەش بوو بە میرات بۆ رژێمە یەك لەدوا یەکانی ئێراق و تاکو ئێستاش بەردەوامە.

ئەوەی ئێستا گرنگە دەبێ وتاری کورد بە شێوەیەك دابرێژرێ کە نەبیتە مایەی شەڕانگێزیی و لە خۆبایی بوون، ئەوەی لەسەر ئیدارەی کورد لە کەرکووک پێویستە دەبی بە کردەوە بیسەلمێنین کە هەر مرۆڤێك لە چوارجێوەی ئەم نیشتمانەدا دەژی یەکسانە لە ماف و ئەرکەکاندا یەکسانە لە پلەو پایەکاندا یەکسانە لە دارشتنی نەخشەی ژیانی ئەم گەلانەدا، هەروەها وتاری دەسەڵاتی سیاسی کوردیش دەبێ بە ئاراستەی راستەقینەی خۆیدا بروات.

ئێمە تا نووسینی ئەم وتارە لە ناو نەخشەی ئێراقدا دەژین و رازبووین بە دەستووری نوێ، کەواتە دەبێ وتاری دەستووری و یاسایمان هەبێ نەك وتاری عەسکەری و شەڕانگێزیی بۆ گەلانی تری ناو کەرکووک و ئێراق، واتە دەتوانین بڵێین ئێمە زیاتر لە دە ساڵ چاوەروانی جێبەجێکردنی مادەی ٥٨، ١٤٠ی دەستووری ئێراق بوون، بەڵام دەسەڵاتی ناوەندو کوتلە سیاسیەکانی تری عەرەب ئامادە نەبوون، گرنگی بەو مادە بدەن و کیشەو گرفتیان رۆژانە دەخستە بەردەم مادە دەستووریەکان، بەڵام ئەگەر ناوەندی ئێراق ئێمە بە خەڵکی ئێراق دەزانێ کەواتە جیاوازی چیە ئەگەر سەرباز ئەو ناوچانە بپارێزێ یان پیشمەرگە، بە واتایەکی تر زیاتر لە دە ساڵ کورد هەوڵیدا بۆ جێبەجێکردنی مادەی ١٤٠، ئاساییە ئەمجا با ناوەند خەمخۆری ئەو مادەیە بێت و بە زووترین کات کاری جێبەجێکردنی بۆ بکات لە ژیر چەتری نەتەوە یەکگرتوەکان، ئێمە کەرکوکمان داگیر نەکردوە، وەك ئەوەی لە راگەیاندنی شۆڤێنەکانەوە دەوترێ بەڵکو ئێمە لە ناو گەل ونیشتمانی خۆمانداین، ئێمە خۆشحاڵین بە ریفراندۆمێك کە بە یاسا و پێوەرە نێودەوڵەتیەکان ئەنجام بدرێ. بەم شێوەیە دەتوانرێ بوتری تا ئیستا کات و سات بۆ ئێمە بە نرخ بوو بەڵام ئیستا کات و سات بۆ بەرانبەرەکەمان بە نرخە.

٢٧\٦\٢٠١٤

bebash-62@hotmail.se