په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٢\١٢\٢٠١٠

کەرکوک لە نێوان پایتەختى رۆشنبیریی و مەترسیی قەدەغەکردنى هونەردا.


کــاردۆ      


ئەو کارەى وەزارەتى پەروەردەى عێراق ئەیکات لە هەڵگرتنى پەیکەرەکانى نێو پەیمانگەى هونەرەجوانەکانى بەغدا و دەرکردنى شانۆ و مۆسیقا لە مەنهەجى خوێندن ، پێشتریش رێگە نەدان بە سازدانى فێستڤاڵى بابل و چەندین چلاکیى ترى ئەدەبى و هونەریى ، هیچى کەمتر نییە لەو پەلامارەى کە چەکدارانى تاڵیبان لەساڵى 2001ـدا لە ئەفغانستان کردیانە سەر گەورەترین پەیکەرى بودا لە جیهاندا ،ئەمەى کە لە عێراقدا روودەدات بەتایبەتى لە سەردەمى پاش رووخانى ترسناکترین رژێم و پێکهێنانى پەرلەمانى زۆرینە ، سەرهەڵدانى چەندین رێکخراوى مافى مرۆڤ و کۆمەڵگەى مەدەنى ، هەوڵێکى مەترسیدارە بۆ کوشتنى ستاتیکا و لەناوبردنى هونەر و هەر بزاوتێکى رۆشنبیرى لەم وڵاتەدا ،ئەم وڵاتەى کە خاوەنى چەندین هونەرمەند و ئەدیبى ناودارە لەسەر ئاستى وڵاتانى جیهان و دەورووبەردا ، ئەم هەڵوێستەى ئیدارەى بەغدا و وەزارەتى پەروەردەى عێراق ئەگەرچى لە توندووتیژیى مەزهەبییەوە سەرچاوەى گرتووە ،پێموا یە کارێکى بەرنامەبۆدارێژراوە و لە دەست تێوەردانی ئیقلیمى بەدەرنییە .


بێگومان لەسەر ئاستى وڵاتدا ئاماژەیەکەیەکى مەترسیدار لە ئارادایە سەبارەت بە تەشەنەکردنى ڤایرۆسى دژ بە هزر و کوشتنى ئازادییەکان وقەدەغەکردنى جوانی،ئەشى ئەم هەوڵە ببێتە مایەى تێکدانى چەندین هۆڵى شانۆ و سینەما و ناوەندى رۆشنبیریى ،لە هەموویشى مەترسیدارتر گەیشتنى ئەو ڤایرۆسەیە بۆ ناوەندە کلتوورییەکانى شارى کەرکوک،لەسەرووى هەموویانەوە پەیمانگەى هونەرە جوانەکان ،چونکە هەموومان باش ئەزانین کەرکوک تا ئێستا ناوچەى ململانێ یە و لە بڕیارەکانى حکومەتى ناوەند دەربازى نابێت .


بۆیە لە کاتێکدا ئەگەر هەڵوێستى وەزارەتى پەروەردەى بەغدا ببێتە بڕیارێک و بەسەر پەیمانگاکانى عێراقدا گشتگیربکرێت ئەوا زۆر بەئاسانى پەیمانگەى هونەرە جوانەکانى کەرکوکیش دەگرێتەوە ،بەڵام ئەوەى جێى سەرسوڕمانە تا ئێستا نە پەیمانگەى هونەرەجوانەکانى کەرکوک و نە هونەرمەندانى شارەکە هیچ هەڵوێستێکى دیاریکراویان لەهەمبەر ئەو بڕیارە نەبووە، لەم ساتە وەختەدا بە تایبەتى کە شارەکە پایتەختى رۆشنبیریى عێراقە ، و تا رادەیەک چاوى میدیاکان و رۆشنبیران و بەرپرسانى وڵاتى لەسەرە بۆیە دەکرا زۆرترین ناڕەزایی و خۆپیشاندانەکان لە کەرکوک بوونایە و چەندین یادداشتنامەیان واژۆبکردایە بۆ هەڵوەشاندنەوەى بڕیارەکە ،راستە بەغدا کەرکوکى بە پایتەختى رۆشنبیریى ئەمساڵ دەستنیشانکردووە بەڵام ئەبێ ئەو راستییەش بزانین کە مەترسى ئەوە هەیە لەپاڵ ئەو ناوە زەبەلاحەوە ،سەکۆى شانۆ ى لێ بسەنێتەوە ، مۆسیقاى لێ حەرام بکات و پەیکەرەکانى ئەسیرى و مەلا جەمیلى رۆژبەیانى تێکبشکێنێت.


ماڵپه‌ڕی کاردۆ